(رامي وحيد) يسوق لـ ( شط vip ) بمساعدة بعض المهمشين ارضاءا لمجموعة من الاغنياء المستهترين

15/11/2013 - 4:28:09

تصوير : محمد راضي تصوير : محمد راضي

كتب محمد بدر :

 


اقيم الاسبوع الماضي باحدى فنادق الجيزة مؤتمر الصحفي للاعلان عن بدء تصوير سيت كوم ( شط vip )، من انتاج / مجموعة هايدن الدولية للانتاج الفني ، بطولة : رامى وحيد ، راندا البحيرى ، عمرو عبد العزيز ،  محمد الصاوى  ،  عبد الله مشرف ،  نهى اسماعيل ،  دينا ابو السعود ، رانيا الملاح  ، محمد عامر ،  ندى عبد الله ، سيلين ، مونيا مونير ، محمد عباس ، هيدى سليم ،  ايمى طلبة ،  وليد بدر ، ايمان الحلو ، عبير الشاعر ، ياسيمن ، المغني / حسام الشرقاوي ، كمال السيد ، احمد نصار ، يسري رمضان ، شيماء سيف  ، نهلة ، قصة وسيناريو وحوار / عمرو فهمى .. مخرج منفذ / ايمن خطاب ، مدير تصوير / اكرم ممدوح ، واخراج / اشرف عبد المعطى


المسلسل عبارة عن 30 حلقة متصلة مدة كل منها 20 دقيقة ، يدور حول مجموعة من الشباب الاغنياء المستهترين لا يعبئوا بمشاكل الدنيا ، كل حلمهم مصيف لطيف لهم بمفردهم وعمل المقالب لبعضهم البعض دون مراعاة للعاملين في مشروعهم الوهمي وهي قرية سياحية خاصة وذلك في اطار من الكوميديا السوداء على واقعنا الأليم ، المسلسل يعتبر اول اخراج للمخرج / اشرف عبد المعطي في مصر وهو من انتاجه وهو مرشح للعرض خلال إجازة منتصف العام الدراسي


وقد صرح لنا ابطال العمل بعد تقطيع التورتة بالاتي :


فقال المخرج / ايمن عبد المعطي : باشكر كل كرو العمل اللي معايا هما اه اتخروا شوية لكنهم في اللوكيشن بيجوا قبل معاد التصوير وملتزمين جدا وبيبقوا بعد التصوير عايزين يقعدوا ومش عايزين يمشوا من المكان ، و تحدث عن فكرة المسلسل الذى تدور أحداثه حول الصراع الطبقى بين الطبقة الغنية والطبقة الفقير ، وعدم الشعور بمعاناة الأخر ومدي المسئولية تجاهه ، في إطار كوميدى .


اما السيناريست / عمرو فهمي فقال : برحب بكل ضيوف الحفل : المغني / حمدي الجنايني ومحمد غربالة -المدير الاقليمي لشركة ايه جيوز- وان شاء فيه فيلم عالمي هنعملوا معاهم من بطولة / رامي وحيد وراندا البحيري ، وتحدث عن المسلسل قائلا : مسلسلنا اسمه (شط vip ) بنحاول  من خلاله  نخلق البسمة في وقت مصر محتاجة للكوميديا محتاجة للضحك ، عايزين نبعد شوية عن الاعمال الدرامية الموجودة ، بنقول ان مصر فيها اماكن سياحية حلوة اوي تشجع السياحة وشباب قادر على تحمل المسئولية ، احنا بنناقش هنا الصراع بين الطبقات طبقة مش حاسة بمعاناة الشعب وطبقة فقيرة بتحاول تعيش وسط مجتمع اصبح  قاسي جدا


وذكر رامي وحيد  : دي تجربة جديدة عليا في الدراما اني اعمل حاجة كوميدي بعد عرض مسرحي كنت عاملته انا وعمرو عبد العزيز وهو ( ولاد اللذينة ) من فترة طويلة ،وبذلك اكون قد اخرجت نفسي من قالب ادوار الشر الذي سجنت به طوال الفترة الماضية ، فانا  بلعب شخصية (سيف) وهو مدير تسويق اشتغل في قرى سياحية كتيرة فعنده خبرة ودي اول مرة يعمل قرية سياحية ويديرها هو فبينظم الجيست – النزلاء – والغرف والدعاية ، هما مجموعة شباب لسه متخرجين من الجامعة مش لاقين حاجة يعملوها فاضين فعايزين يعملوا حاجة جديدة يضايقوا بيها اصحابهم ، واحدة منهم عندها الارض والباقي جمعوا الفلوس عشان يعملوا القرية فراحوا لاقوا القرية خلاص خلصت ومدير التسويق ده قاعد فيها فخصموله 5 ايام كدة ، وعن الكواليس قال : احنا بنصور 12 ساعة متواصل والمخرج / اشرف عبد المعطي بيشغلنا بنظام برة من تصوير وزوايا الكاميرا والحركة فكل حاجة مدروسة فهو شخص محترف جدا مبدع وسايب لنا مساحة الارتجال بس في اطار المشهد فالمسلسل طالع كوميدي جدا وانا مبسوط جدا بالكاست الجميل ده  ، عمرو فهمي – المؤلف - كاتب كل حاجة داخل المسلسل الكوميديا وقصص الحب كتير في المسلسل من اول الجرسونات لحد اصحاب القرية كلهم في علاقات جوة الشغل ، فما بين ناس جاية تشقى وتتعب وتاخد اجر وناس جاية تهزر بنقول ده بشكل كوميدي ونبعت رسالة للناس يا جماعة لازم كل واحد يعمل اللي عليه عشان في الاخر نلاقي ثمرة مجهودنا ده ، وعن جديده قال :  مازلت بصور فيلمي : (المماليك) وهو فيلم شعبي بس قصته فيها مضمون مش زي افلام الايام دي ولسه بنخلص فيه ، و(مترو) وهو عبارة عن قصة حب لها مراحل عدة تؤثر على طرفي الفيلم


وتحدثت نهى اسماعيل قائلة : اللي عجبني في المسلسل الورق حلو اوي اللي كاتبه عمرو فهمي وكواليس العمل لطيفة جدا سعيدة اني بشتغل مع رامي وحيد وهو صديق عزيز عليا والمخرج / اشرف عبد المعطي اللي عامل صورة حلوة جدا للمسلسل


اما عمرو  عبد العزيز فقال : احنا بنعمل مسلسل كوميدي دمه خفيف محترم ملوش اي علاقة بالسياسة ،  انا مش هاحرق الدور بس في المسلسل استاذ / رامي وحيد واخد كل بدلي في التصوير ههههه ، وانا حابب كواليس العمل جدا لدرجة اني شايل هم اخر يوم تصوير لاننا كنا بنقعد مع بعض نهزر ومبسوطين وباشيد بورق عمرو فهمي وبصورة المخرج / اشرف عبد المعطي طبعا ، وع جديده قال بحضر لعرض (الشعب لما يفلسع ) مع النجم / احمد بدير


وذكرت ندى عبد الله : باشكر المخرج / اشرف عبد المعطي والسيناريست / عمرو فهمي والنجم / رامي وحيد على اختياري لمشاركتهم بطولة المسلسل والذي يعتبر اول تجربة ليا كدراما وانا مستمتعة جدا بكل كاست العمل ، انا دوري فيه كوميديا لذيذة وهي بنت بشتغل عندهم في القرية من ضمن الاستاف وبتحب واحد معها في القرية وبيتجوزوا في النهاية ، وعن جديدها قالت : انتهيت من تصوير دوري في فيلم (المماليك) وانتظروه قريبا


وصرحت دينا ابو السعود : انا مبسوطة جدا لوجودي ضمن الكاست ده مع رامي وراندا ونهى واجمل مخرج في مصر استاذ / اشرف عبد المعطي وعمرو فهمي السيناريست القوي جدا ، انا بلعب دور (هايدي) وهي بنت مستهترة شوية وبتقرر تعمل القرية دي هي واصحابها وبيواجهوا مواقف كتيرة في الحلقات وبيحصل شيفت – تحول – في الشخصية وان شاء الله يعجبكوا


اما راندا البحيري فقالت : انا بنت اسمها ( رنا )، صاحبة فندق كبير بس هي تافهة شوية معندهاش طموح في الحياة بتحاول يبقى ليها هدف بس مش قادرة بس عندها استعداد انها تبقى احسن ، اللي شدني في الدور الاسكريبت كله لان الورق مكتوب حلو اوي والكاست بتاع المسلسل لذيذ جدا وكلنا اصحاب فهو مسلسل كوميدي بجانب بعض المشاهد اللي فيا احساس عالي


وقالت رانيا الملاح : انا بلعب دور (جيسي) وهي بنت دلوعة وشقية بتحب تعمل مقالب في اصحابها بنت غنية عمرها ماتحملت مسئولية فقررت هي واصحابها يعملوا المشروع ده عشان يتغيروا


وذكر محمد عامر : انا بجسد شخصية (نادر) وهو غني جدا مش شايل هم الفلوس لانه عنده بابا وماما ، وهو واصحابه في الجامعة زهقوا من السفر كل مرة في حتة فقرروا يعملوا قرية ليهم وفيه مواقف كتير درامية ورمانسية وكوميدية بتقابلهم


وصرحت ايمي طلبة : جديدي اصور فيلمين : (ناشط في حركة عيال) وفيلم (حلاوة روح) مع المخرج / سامح عبد العزيز


اما سيلين فقالت : جديدي انهيت من تصوير فيلم (ابن كار) ومن المتوقع نزوله في يناير المقبل


يذكر ان المخرج / اشرف عبد المعطي قد عاش لمدة 28 سنة ما بين  المانيا والنمسا واخرج العديد من الافلام هناك ونال جائزة احسن مخرج في مهرجان فنيسيا السينمائي الدولي