جريدة أحوال مصر
اقيم منذ ايام الاحتفال الثاني لبدء تصوير مسلسل (ابن حلال) الذي اقامه بطل المسلسل النجم / محمد رمضان على طريقته الخاصة بذبح عجلين في احدى استوديوهات الجيزة بمشاركة ابطال العمل
المسلسل بطولة : محمد رمضان وهالة فاخر وسهر الصايغ واحمد فؤاد سليم وحسام داغر وريهام سعيد ومحمد الجوهري واسلام جمال ومحمد نصر ومراد فكري وحنان سليمان ووفاء عامر وميرهان حسين ، وهو من انتاج شركة صادق الصباح وشركة المتحدين للانتاج الاعلامي ، مخرج منفذ / علاء وجدي وتأليف : حسان دهشان واخراج / ابراهيم فخر
وبعد ذبح العجول واخذ الصور التذكارية كان لنا هذه الاحدايث الصحفية مع ابطال المسلسل :
فتحدث لنا بطل المسلسل النجم / محمد رمضان قائلا : مسلسل (ابن حلال) اسمه بيفسر نفسه وانا بلعب فيه شخصية (حبيشة) حد فطري جدا على سجيته من صعيد مصر جه القاهرة يبحث عن قوت يومه بيصرف على امه – هالة فاخر – واخته – سهر الصايغ – وبنشوف معاناة فئة الشباب اللي سابوا بلدهم وجائوا الى العاصمة ليبحثوا عن وظيفة لان الصعيد الان اصبح من المحافظات الطاردة والمشاكل التي يواجهوها ، بيتم اتهامه بجريمة قتل لا ذنب له بها لانه ملوش ظهر وخاصة وهو بعيد عن عائلته ، فكيف سيتعامل مع هذه التهمة وكيف سيثبت برائته وتتوالى الاحداث ، وعن تغيير جلده وخروجه من عباءة البطلجي قال : السيناريو هو اللي بيفرض عليك طبيعة الشخصية لما بتيجي تذاكرها من خلال ابعادها النفسية وسلوك الانسان وده بينعكس في ابعاده الجسمانية وحركته فلما عملت (عبده موتة) الناس صدقتني لكن هنا العكس تماما البطل مابيشربش سيجارة ابن حلال مصفي وثقة في الله الناس هتصدقني برضوا ، وعن باقي نجوم العمل قال : انا ماشي بقولة : ان تكون فرد في جماعة الاسود افضل من ان تكون قائدا للنعام ، فلما اكون وسط ممثلين اقوياء ده بيعليني ، فمعايا : محمود الجندي واحمد فؤاد سليم وهالة فاخر وحنان سليمان وفاء عامر ، وريهام سعيد وسهر الصايغ وسارة سلامة واحمد حاتم واسلام جمال ، وعن ملابس الشخصية قال : معايا استايلست / منى الزرقاني شاطرة جدا وهي اللي بتختار الملابس سواء الصعيدية للبيت او الحضارية للشغل في الشارع ، وعن اكسسوار الشخصية تماشيا مع الثعبان والاسد في اعماله الاخيرة فقال : فيه شومة هتكون معايا اقصد مع حبيشة وده حصري ليكم ، وعن ذبحه لعجلين قال : دي عادة عندي في بداية تصوير كل عمل جديد وبتتوزع على العاملين فيه ، وعن تردد بعض الاقاويل ان المسلسل يدور حول حادثة قتل ابنة الفنانة / ليلى غفران قال : الكلام ده غير صحيح على الاطلاق وهي صديقة لي وانا لن اسمح اني اعمل عمل اجرح بيه مشاعر اصدقاء ليا ، وعن جديده قال : فيه فيلم كنت مصور جزء منه من فترة اسمه فرد امن وتحول اسمه الى (واحد صعيدي) بعد وفاة منتجه وانتقال الفيلم الى جهة انتاج اخرى فالسنة دي كله صعيدي في صعيدي وهينزل في ابريل القادم ان شاء الله
وصرحت لنا النجمة / وفاء عامر قائلة : انا بلعب دور ممثلة عندها بنتين بتتعرض لمجموعة من المواقف وهنشوف بقى هتقف مع الظالم ولا المظلوم وهي بعيدة كل البعد عن قصة حياة ليلى غفران تماما ، وعن تعاملها مع محمد رمضان فقالت : محمد رمضان نجم مختلف عن كل الممثلين اللي موجودين في الوسط فهو نجم بطعم الحارة المصرية مجنون مغامر وانا متفائلة خير بالعمل معه ، وعن فكرة البطولة المطلقة بعد مسلسل (كاريوكا) قالت : كلمة البطولة المطلقة دي انا مابحبهاش لاني كدة هألغي كل واحد شارك في العمل معايا وانا هنا حاسة اني بطلة برضوا مع رمضان وكمان في مسلسل (ابو هيبة) مع النجم / محمود عبد العزيز حاسة اني بطلة فالشغل الجماعي بيبقى طعمه احلى بكتير فانا في اي مكان هبقى وفاء عامر وده مش غرور لاني باشتغل مع ابطال والدور هو البطل لان استان سلافسكي قال : مفيش دور صغير ودور كبير فيه ممثل صغير وممثل كبير ، فانا في (ابو هيبة) مثلا طالعة صعيدية زوجة ابو هيبة بتتعرض لمجموعة من الواقف فبيقف جانبها وده تاني عمل لي مع (عبد العزيز) بعد فيلم (رحلة) من 11 سنة ، وعن الازمة المالية في البلاد قالت : مصر محتاجانا واحنا كلنا مخفضين اجورنا للربع وانا مسئولة عن كلامي ده ، فلازم مانبصش لنفسنا عشان مصر تقف على رجليها من تاني
اما ميريهان حسين فذكرت : انا سعيدة جدا اني هاشتغل مع الكاست الجميل ده وترشيحي جه من استاذ / ابرايم فخر ، واستاذ / صادق الصباح المنتج لاني اشتغلت معاه مسلسل (ادم وجميلة) اللي بيتعرض دلوقتي على الفضائيات وليا الشرف اني اشتغل معه للمرة التانية ويارب اعجب الناس ، وانا دوري بنت شعنونة شوية ومختلف عن كل الادوار اللي لعبتها قبل كدة ، وعن بعدها عن السينما قالت : انا بدايتي كانت سينما في فيلم (عمر وسلمى 2) لكن السينما دلوقتي حالتها وحشة والافلام اللي اتعرضت عليا حطاني في نفس قالب (عمر وسلمى 2) ، وعن جديدها قالت : بعمل مسلسل (اكسلانس) مع النجم / احمد عز ، وعن بعدها عن الغناء بعد تألقها في برنامج (استار اكاديمي) قالت : كل حاجة محتاجة تركيز سواء غنا او تمثيل وانا حابة التمثيل اكتر ، وعن متابعتها للموسم الجديد من البرنامج قالت : عاجبني جدا محمود ورنا وسكينة وبانصحهم ان الوسط الفني في الواقع غير ما كان في البرنامج لازم تركزا وتخلوا بالكم الناس اللي حوليكم
والاعلامية / ريهام سعيد صرحت بالاتي : ان شاء الله المسلسل يكون رقم واحد في رمضان ويحقق نسبة مشاهدة عالية لانه عمل مكتمل العناصر وانا سعيدة اني باشتغل مع ا/ ابراهيم فخر لانه كان مخرج منفذ في العمل اللي عمل نقلة في حياتي في مسلسل (شارع عبد العزيز) وكمان شركة انتاج قوية ومع محمد رمضان نجم سينما وكاست هايل : وفاء عامر وهالة فاخر ، وعن دورها قالت : انا بلعب دور (فاطمة) وهي صحفية ماشية في ظهر (حبيشة) بتعمله دعم وبتحاول انها تدور على حقه فهو دور حلو اوي عاطفي هيعلق مع الناس ،
واخيرا تحدثنا مع الفنان / احمد فؤاد سليم والذي قال : محمد رمضان ممثل تقيل وليه بصمته وحتى مقارنة الناس بينه وبين العظيم / احمد زكي جاية من انه قريب من الناس في الشارع بادواره مش عشان اسمر زيه او بيعرف يقلده فقط ، وعن جديده قال : انا بعرض دلوقتي مسرحية (المحاكمة) على مسرح ميامي وباقي فيها اسبوع وبيشاركني بطولتها استاذ / اشرف عبد الغفور واخراج / طارق الدويري ، وداخل مسلسل (ابو هيبة) مع النجم / محمود عبد العزيز ومسلسل (السيدة الاولى) مع النجمة /غادة عبد الرازق ان شاء الله
