جريدة أحوال مصر
أقيم بإحدى فنادق القاهرة المؤتمر الصحفى للفنان “يوسف الشريف ” للحديث عن آخر أعماله التلفزيونية ” الصياد ” بحضور زوجته / انجي علاء والمنسقة الاعلامية له / مروة يحيى ، وللعام الثاني على التوالي تواجدنا معه هناك
بدأ المؤتمر بترحيب ” يوسف ” بالحاضرين وقال : إن “الصياد” تجربة جديدة ومخاطرة جديدة مثل : مسلسلي : “اسم مؤقت” و” رقم مجهول “, وقدم الشكر لكل العاملين فيه والمؤلف والمخرج وشركتي الانتاج : “اروما بيكتشرز ” تامر مرتضى واحمد المناويشي ، و “راديو وان” خالد حلمي واحمد نور , ومدير التصوير / احمد جبر ،ومهندس الديكور / ايمن فتحي وكل الممثلين المشاركين معه : أحمد صفوت ومى سليم ودينا فؤاد وتامر ضيائي وايناس كامل وأمير صلاح الدين ومحمد العمروسي وباقي الكاست
وقد كان لنا هذا الحوار المطول معه والذي جاء فيه :
- من اين جاء “الصياد” ؟
الصياد رحلة طويلة ابتدت من شهور من ساعة ما اخذت القرار ان ابقى متواجد السنة دي في رمضان ابتدت بفكرة كانت عندي منذ 3 سنوات لكن مش مكتوبة وبعد مافشلت اني الاقي حدوتة اعملها فقرأت 48 معالجة درامية ، رفضتها لتشابها مع اعمال انا عملتها قبل كدة ، فكلمت عمرو سمير عاطف عن الفكرة لانه عبقري ولثقتي الشديدة فيه وده تاني تعاون بينا بعد مسلسل “رقم مجهول” ومع انه في البداية احبطني لانه خاف من ان المجرم هيحبط الناس لكنه بعد كدة تحمس للموضوع ونسج الشخصيات وعمل مسلسل حلو
- وماذا عن تعاونك مع المخرج / احمد مدحت للمرة الثانية بعد فيلم “العالمي” ؟
انا متحمس له جدا وهو مخرج قوي جدا وهو عمل بصمة قوية في فيلم “العالمي” وده كان في دماغي ، ولما جت الفرصة اننا نشتغل مع بعض تاني ماترددتش لحظة وهو اثبت نفسه جدا في الصياد
- كيف تختار اعمالك ؟
بعد المعيار الاخلاقي وده خط احمر عشان باتقي ربنا ، بحط نفسي مكان المشاهد وبتخيل المسلسل المكتوب كصورة واتفرج عليه وبشوف العمل ده هيشدني ولا لأ
- هل يمكن ان نرى “يوسف” في فيلم شعبي من نوعية رقصة واغنية ولو لمجرد التواجد ؟
ده مستحيل لاني في لحظة ما بعد فيلم “هي فوضى” – وليس بسبب الفيلم – اخذت قرار اني اخد بالي كويس قوي من اني اعمل اعمال لا يتخللها مشاهد فيها اباحية ، فقالوا لي انت كدة هتبطل سينما ، لكن اقتنعت ان ده غلط وحرام والمفروض اتقي الله في شغلي اللي هيدخل رزق لبيتي ، ومن ساعاتها عندي استعداد اني اعتزل لكن الظروف ساعدتني ، وبقيت اكتب ده في العقود ان مفيش مشاهد فيها كذا وكذا بمسياتها فبقى الموضوع مسئولية المنتج
- هل سنرى “يوسف” يخلع عباءة دراما التشويق ويتجه الى نوع اخر في الفترة القادمة ؟
أنا أحب نوعية الأعمال التشويقية فى هوليود وكيف سيحل اللغز في النهاية ، وأهم شيء أن يكون الموضوع يليق بالمشاهد ، فمش فارق معايا النوعية ولكن لو عرض عليا مسلسل بعيدًا عن التشويق سأوافق عليه لو عرفت إنها فيها وعي وهدف ، واهم حاجة تكون بعيدة عن الكوميديا لأنى لا أرى نفسي في الكوميديا مطلقا , اتمنى اني اغير من نوعية الدراما اللي بقدمها لان مسلسلات التشويق والسيسبنس بحر كبير جدا ممكن العب فيهم مليون شخصية ولا واحد فيهم شبه بعض ، لكن معنديش مانع العب اي نوع من الانماط التانية من الدراما
- ما هو الهدف من مسلسل “الصياد” ؟
فى الفترة الأخيرة وجدت الناس تتعاطف مع شخصية ” سيف عبد الرحمن ” فنحن شعب عاطفى جدًا ولكن يجب أن نفكر بعقلنا فهو فى النهاية مجرم ، فرسالة المسلسل لا ترسخ لفكرة اللإنتقام فاى محنة هى إبتلاء من الله والثأر يأخذ شكل من أشكال الكفر ولا يوجد مبرر للإجرام بأى حال من الأحوال ولو كل إنسان عمل كده سنكون مجرمين . فـ ” المنتقم ما هو إلا مجرم “
- هل الدراما التلفزيونية كان لها الفضل في نجاح “يوسف الشريف” ؟
الدراما أعطتنى أكثر من حقى وأشعر بفضل الله وإطراء الناس عليا أكثر مما استحق وقارن هذا بالسينما ، فده مش فارق ولكن لو فيه إمكانية لتقديم موضوعات الدراما ده فى السينما فيجب أن تكون جيدة وبشكل يرضي الناس .
- هل يمكن ان يعود “يوسف” بهذه النوعية من الدراما الى السينما ؟
اتمنى اني اعمل سينما قريبا فمن بعد فيلم “العالمي” الظروف هي كانت الحائل بيني وبين السينما سواء الظروف السياسية واللي اخلت بالحالة الامنية بتاعت البلد ، والفترة اللي فاتت عشان تعمل سينما كان فيه شروط واضحة وصريحة لازم تتعمل عشان الفيلم ينجح ، وانا مش هقدر ما احترمش المشاهد او اضحك عليه فاهعمل نفس فكرة الصياد او رقم مجهول بس على اختزال ونلم الدنيا ونضحك على الناس ، وانا مقدرش ألوم المنتج في ده لانه بني آدم ومش مضطر انه يرمي فلوسه على الارض ، لكن دلوقتي فيه بصيص من الامل بعد تحسن الحالة الامنية نسبيا والبلد باذن الله ماشية لقدام واظن ان السينما هترجع تاني ، لكن الدراما دلوقتي هي المكان اللي نقدم فيه اللي نقدر نحترم بيه الناس
- هل رجوع ابطال ككريم عبد العزيز واحمد السقا الى السينما يمكن ان يكون دافع لك للعودة مرة اخرى ؟
اكيد هيكون دافع قووي جدا جدا ليا واظن ان وجود كريم عبد العزيز واحمد حلمي واحمد السقا هيفرق مع السينما وهيفرق معانا كلنا اننا نبدأ نقدم مواضيعنا فيها ان شاء الله
- هل “الصياد” مقتبس من مسلسل “ذا مينتاليست” كما قيل ؟
لو فكرنا بتلك الطريقة فلن أمثل ويجب أن نعرف أن التيم السينمائية قليلة جدًا لا تتعدى 24 تيمة ولكن طريقة المعالجة نفسها هى التى تختلف فالموضوعات فى كل العالم ولكن كيف أسرد الحدوتة وإلا أصبحت كل أفلام هوليود مقلدة ولكننا لا نشعر بذلك أبدًا وهذا حدث بداية من “المواطن إكس” و”رقم مجهول” و”اسم مؤقت”
، وقد حضرت محاضرة للمخرج / مارتن سكورسيزي فى مهرجان قطر من خمس سنين – وهو رشح لـ9 جوائز أوسكار – وقال انه لم يقدم أى فيلم فى تاريخه أصلى ومكتبسة من السينما الكورية وانا بشوف افلامه انها اصلية جدا فالفكرة كلها في طريقة المعالجة والسرد وتناول الموضوع ، فنفى مطلقا اي علاقة بين مسلسل “ذا مينتاليست” و”الصياد” وواضاف : فيه ناس قالت انه شبه مسلسل “ديكستر” و فيلم “ريد لايتس” وفي الاخر لو احنا شبه كل دول فمن بابا اولى ان الاعمال دي هي اللي شبه بعض وسارقين من بعض
- هل لو عرض عليك عمل بطولة جماعية ، ستوافق عليه ؟
انا لا أحرص على تقديم أعمال بطولة مطلقة ولكن طبيعة سيناريو ” الصياد ” ليس بطولة مطلقة كبيرة ولكن أدوار باقى الممثلين فى المسلسل لا تقل عن دور “سيف عبد الرحمن ” وادوار باقى الممثلين كلها مهمة . فمسلسل ” المواطن إكس ” طبيعة السيناريو فيه مختلفة وليس سهلا أن تجد سيناريو مثله يحافظ على نفس الخطوط الدرامية . لكنى لو وجدت سيناريو جيد به بطولة جماعية فلن أتردد
- ما رأيك في بيع المسلسل حصري لقناة واحدة ؟
العرض الحصري للحياة كان محترم جدًا ولكن ذلك لا يخصنى أبدًا فدومًا أركز على ما هو فى يدي . وذلك لم يؤثر على نجاح المسلسل حتى على مستوى الإستفتاءات .
- ماذا عن كواليس تصوير المسلسل ؟
كانت كلها تركيز وبالطبع هذا سيولد محبة لأن لدينا نفس الهدف لأن كلها مركزة جدًا ليخرج المسلسل ، فكنا نعمل لـ 18 ساعة فى اليوم ، وكان فيه مباريات تمثيلية وكنت منبهر جدًا من عرض العمل وكل الناس أدوا جيدًا . والتصوير في رمضان كان صعب جدا بس الحمد لله عدى على خير
- وماذا عن الشخصية واستعدادك لها ؟
هي كانت بالنسبة لي رعب وكنت خايف كدة ازاي هعمل شخصية واحد اعمى فدي اول مرة همثل من غير ما استخدم عيني وان اهم اداة عندي هي توصيل المعلومة بالعين وكنت اتعلمت ده من المخرج / يوسف شاهين ، فكان في بروفات فيلم “هي فوضى” بيخليني امثل المشهد بعيني من غير ما اقول الحوار فعنده اهم حاجة في الممثل عنيه بيحب يوصل بيهم الكلام ، ومن ساعتها وانا باعتمد على ده جدا وفوجئت ان السنة دي اني هبقى محروم من ده تماما ، وجربت التمثيل وقلت انا هجرب واقول الكلام بان بان مابنشي خلاص ، وبعدين بدأت اجتهد في التكنيك ازاي اتعمل برة والممثلين عملوه ازاي هناك ،فهو لو اعمى ازاي بيستخدم باقي عضلات وجهه واستخدام العصا في المشي ، ومن ناحية تانية الجزء السيء في الشخصية انه مجرم وفقد آدميته
- ماذا عن لوك الصياد وخاصة عدسات العين البيضاء ؟
العدسات التي استخدمت لها شقين شق تابع لانجي علاء زوجتي والاستايلست بتاعتي وانا كان عندي مشكلة في لبس العدسات لاني عمري ما لبست عدسات في عيني وبالذات اني بلبسها في ساعتين بس هي خلتني اخذ الجرأة وفي الاخر اكتشفت ان الناس بتركب العدسات دي وهي سايقة والموضوع عادي فالعيب كان عندي انا ، اما الشق الثاني في اختيار العدسات فانجي اجتهدت في ده واشتغلت كانها اول مرة بالنسبة لها وانا عامة بحب الناس تكون في شغلها بتشتغل كاول مرة عشان تقدر تثبت نفسك ، ومن الناس دي ايضا “عمرو سمير عاطف” فاغلبية الكتاب بعد عدد معين من النجاحات بيكون الشغل فيه آلية ميكانيكية شوية ، فعليه يسلم كام حلقة امتى عشان كذا ، فانجي وهو عندهما طموح فبدأت تعمل دراسات عن عمل العدسات دي وفين مكانها برة ، لكن اولادي : جني و عبد الله و عبد الرحمن – عندهم اربع سنين – اول ما شافوا عنيا خافوا جدا لما لاقوها بيضة فبطلوا يتفرجوا على المسلسل
- ما السر وراء المظهر والقوام المثالي الذي تحافظ عليه دائما ؟
السر ان ورايا استايلست جامدة وزوجة عظيمة ربنا يخلهالي وانا بحاول على اد ماقدر اجتهد لان الجمهور يستحق مني ده لان برضوا في الاخر محدش يفتكر ان الموضوع سهل انك تظهر للناس بشكل اللي منتظراك عليه فده بياخذ مجهود من الواحد في التمرين والمشاهد يستحق ده ويستحق اني انا مهملوش رغم اني بحب الاكل جدا والحلويات ،
- هل يمكن ان نرى “انجي” تعمل مع ممثل غيرك ؟
بيتهيلي .. انها هتفضل مع “يوسف الشريف” على طول !! وهي كانت في الفترة الماضية شغالة معايا انا بس لكن السنة دي هي الاستايلست للمسلسل ومفيش مشكلة طالما انا في المسلسل
- ماذا تقول لزوجتك بعد نجاح “الصياد” ؟
انا بأشكر زوجتى ” إنجى ” لأنها أخذت مخاطرة ومسئولة ككبيرة السنة دي أنها تكون ستايلست المسلسل كله ، وبقولها ان النجاح والمجهود اللي بان ده بفضلها وربنا يخليكي ليا وكل سنة وانت طيبة
- ما السر وراء نضوجك الفني في السنوات الثلاثة الماضية وحتى الان ؟
السر ان الواحد بيدعي ربنا كتير مش اكتر وبحاول اعمل مجهود على اد ما بقدر ومقصرش سواء في مرحلة كتابة العمل وهي مرحلة مهمة جدا بحاول ابذل فيها اكتر مجهود ممكن ، وتاني حاجة تنفيذ العمل نفسه وباهتم بكل تفصيلة وبدعي ربنا انه يوفقنا ، وعلى المستوى الشخصي بحاول ادرب واطور من نفسي وبتابع سواء برة اوهنا ايه الادوات اللي ممكن تخليني احسن وبعمل ابحاث ازاي الممثلين برة بيقدروا يوصولوا للمستويات دي
- لماذا تم كتابة “ان هذا العمل لا يمت لوزارة الدخلية” في تتر البداية ؟
فكرة التنويه دي حصل مننا ولم يطلب احدا ذلك مع ان المسلسل اجيز رقابيا ولا يمت للواقع بصلة كما حدث مثلا في مسلسل “المواطن اكس” والذي كان فيه نقد لاذع للداخلية وفيلم “هي فوضى” ، وكان فيه تماس للواقع في “اسم مؤقت” مع الانتخابات الرئاسية ، لكن الصياد ورقم مجهول هي دراما تخيلية من خيال الكاتب وليس من الواقع ، ففي الصياد واحد قاعد بيدي خبرته لناس حتى يصلوا لمجرم ويتضح في النهاية انه هو المجرم الذي يبحثون عنه ، وانت حتى كمشاهد مش عارف الجهاز ده ايه هل وحدة مكافحة الارهاب ولا الامن الوطني فاحنا راعينا ان الديكور يكون شكله غريب عن كل مباني الداخلية التقليدية
- لماذا تم الكشف عن حقيقة “الصياد” في الحلقة الثانية عشر ؟
لو تم اكتشاف ان الصياد هو انا في اخر حلقة هنبقى عيدنا مسلسل “رقم مجهول” ومكنتش هعمله بصراحة ، لاني اتشديت للشخصية بعد الحلقة 12 لاننا في الاول كنا خايفين على سيف من الصياد لانه الوحيد اللي شافه وكمان عشان ظروفه الصحية وسهل اوي الصياد يتغلب عليه ، وبعدين اكتشفنا انه هو الصياد فبقينا خايفين على كل ابطال المسلسل ، فحسيت ده قوي جدا
- هل لك حساب على مواقع التواصل الاجتماعي ؟
اصبح الان لديى حساب على تويتر وصفحة – بيدج – على فيس بوك والاتنين مفعلين رسميا
- لماذا لا تبلغ الدكتورة النفسية عن الصياد وهل سيقتلها في النهاية ام هي من وحي خياله المريض ؟
دور الدكتورة سيكتمل تماما في الحلقة الـ 30 ، فمش هينفع احرقه دلوقتي لكن الدور اكتر دور كنت حريص على تواجده في الورق لانه مهم جدا وبيوضح جزء كبير من هدف المسلسل وهواكتر مشاهد فنية بحبها في المسلسل وكانت صعبة جدا والحمد لله طلعت بشكل كويس ، وهي مش فلاش باك لانها سابقة الاحداث ، واضاف : إن “صفاء الطوخي” لم يظهر دورها بعد فى المسلسل ولكن تلك الشخصية كنت حريص جدًا عليها فقد أدت الصوت فى “رقم مجهول” فأحب أن يكون لها شكل فنى فى المسلسل
- ماذا تقول عن فريق عمل المسلسل ؟
السنة دي كل اللي اشتركوا في العمل من اول المخرج والكاتب والاستايلست والديكور والممثلين كلهم ليهم دور اكبر مني وسبب رئيس في نجاح العمل ده ، وانا مصدق ده جدا ، والممثلين بالخصوص كلهم كانوا اقوياء جدا ومركزين جدا وعملوا ادوارهم على اكمل وجه ابتداءا من “احمد صفوت” وانا اتبسط جدا لما تعاونت معاه وكمان لما شفت العمل على التلفزيون ، فهو عامل دور هايل واضاف كتير جدا للمسلسل ونفس الكلام لـ : دينا فؤاد ومي سليم وايناس كامل واشرف مصيلحي وتامر ضيائي وامير صلاح الدين ، وقبلهم كلهم صفاء الطوخي لانها كارثة عاملة دور هايل فكل الممثلين السنة دي كانوا هايلين
- من الممثل الاجنبي الذي تحتذي به ؟
“ال باتشينو” وخاصة في الفترة الماضية كنت متابعه جامد عشان الدور اللي عملته في “الصياد”
- كيف سيتنهي دور “مي سليم” ومن هو الظابط الكبير هل يكون فيصل غلاب – ابو احمد صفوت – العاجز ؟
هتعرفوا ده يوم 30 ، النهاية ستكون مقفولة, وواضحة وصريحة !!
- هل تتابع باقي المسلسلات المنافسة لك في رمضان ؟
انا مش متابع ولا مسلسل لكن فيه ردود افعال حلوة على اكثر من عمل ومعجب جدا بـ “ابو هيبة” للنجم / محمود عبد العزيز ، وعن المنافسة فمن نفس نوعية مسلسلي زي : “عد تنازلي” و”فرق توقيت” فرد الفعل حلو عليهم ، وانا باتفرج علي كل المسلسلات دي بعد رمضان
- وفي الختام ما هي الرسالة التي توجهها لكل جمهورك ؟
انتم فوق رأسي ، فانتم الدافع الوحيد اللي بيخلي الواحد يشد حيله واتمنى اني دائما اكون عند حسن ظنكم ، ولو قصرت في حاجة في “الصياد” او اي عمل قبل كدة فسامحوني على التقصير ده ، واتمنى اكون معاكم على طول ، وان شاء الله اللي جاي يعجبكم زي اللي فات
