جريدة أحوال مصر
التهانى مهمه ما فيش كلام .. والهدايا بتفرح و تسعد ..
و النبى عليه الصلاة والسلام قال : تهادوا تحابوا ..
و اللمه الحلوه اللي معموله مخصوص علشان الام مطلوبه و ضروريه ولابد منها ..
بس الاهم من كل دة إنك تتأكد من رضا امك عليك .. تتأكد انك سبب سعادتها او رضاها او طمأنتها او فرحتها فى الدنيا !
تتأكد انها فرحانه و فخورة بيك ..
تكون واثق انك عند حسن ظنها ال 364 يوم فى السنه مش بس يوم عيد الام لانك كسفتها بترحة صلاه ولا بحلتين انت المستفيد بيهم برده وانت اللي هتاكل منهم !
إسأل أمك ايه اللي نفسها فيه و اعمله .. ايه اللي بيزعلها و حاول علي قد ما تقدر حتى ما تعملوش قدامها ..
أسأل امك عايزة ايه فى عيد الام .. يمكن يكون طلبها اسهل و ارخص مليون مرة من اللي عمال تحوش له و تدور عليه !
يمكن تكون سعادتها فى انها تشوفك ساعه .. أصل انت مابتلحقش تعدى عليها و لو ساعه فى الشهر !
و يمكن يكون فرحتها فى انها تشوف ولادك اللي ما عندهومش وقت غير للنادى و اعياد الميلاد ! لكن تقولهم نروح لامى يقولولك : لا آحنا بنزهق !
بيزهقوا من اللي خلفتك يا دكر و ربتك و لحم كتافك من خيرها لغاية ما بقيت اب ملو هدومك !
“أمك طخينه اوى يا ممتاز”
معلهش يا ستى استحمليها لو ده مشكلتها الوحيده !
إستحمليها يا سمباتيك يا شياكه يا اله الجمال يا محور الكون !
خللي عيد الام غايه .. خلليه تصحيح مسار .. إملاه حب و عاطفه ..
يا جماعه عيد الام بقي حلل و طرح و ايشاربات و تورت و جاتوهات … رخيصه او غاليه .. النظريه واحده !
يوم يغلب عليه الارهاق الجسمانى و المادى اكثر بكتير من الحب العادى !
أقولك .. لو لسه مش فاهم ..
إسمع إغنيه ست الحبايب بصوت الوسيقار عبد الوهاب .. خلود الاغنيه دة بالذات نابع من صدقها الشديد .. عبد الوهاب كان دايما بيسأل أمه طول السنه عايزه إيه !
إسأل أمك .. قبل ما ربنا يسأل أمك عنك .. و يسألك انت عنها !
