بالصور ..تعرف على عروس بورسعيد الفائزة بلقب عروس العاصمة

28/11/2017 - 4:08:43

هبه عروس العاصمة هبه عروس العاصمة

امنية قاسم






التقيت بها  فوجدتها فتاة رقيقه فى بداية العشرينات من عمرها ، معها خطيبها  ، حصلت هبة  على لقب عروس العاصمة ، فمن هى هبة؟ و ما هو لقب عروس العاصمة ؟ ذلك ما ستعرفه عزيزى القارئ فى السطور القادمة.


فى البداية اتعرف عليكوا؟


ردت بخجل و بصوت رقيق ، اسمى هبة ابراهيم سعد  معهد فنى تجارى، و رد خطيبها اسمى السيد محمود المليجى، موظف بشركة حاويات بورسعيد


مخطوبين بقالكوا قد ايه؟


رد السيد ،، حوالى سنه و نص ، و المفروض نتجوز على نهاية السنة ان شاء الله.


ازاى عرفتى بقا عن مسابقة "كونى عروس العاصمة"؟


عرفتها عن طريق اختى وفاء ، شافت الاعلان فى التلفزيون وشجعتنى اقدم، وحتى هى اللى بحثت و اشتركتلى اصلا ،  و فعلا اتقبلت و الحمد لله وصلت للنهاية.


و انت يا سيد قبلت انها تشترك عادى؟


فى البداية احنا الاتنين كان عندنا شك ، مصدقناش ان الموضوع يكون بجد ، لكن روحنا و جربنا و ضخنا التجربة ، هى تجربة جديدة علينا ، قولنا نغامر و نشوف ، مش هنخسر حاجه.


احكيلى عن فكرة المسابقة اصلا ؟


هى مسابقة اسمها كونى عروس العاصمة ، ظهرت من خلال برنامج "حلاوة الدنيا" اللى بتقدمه الاستاذة ميار الببلاوى ، على فضائية العاصمة.


ايه المراحل اللى تمت بها المسابقة؟


بعد ما قدمنا و اختاروا المشتركات ، كنا حوالى 10 مشتركات ظهرنا فى حلقة فى البرنامج ، و بعدين ظهرنا فى حلقة تانية ، علشان نتعرف على بعض ، كل المشتركات كانوا من القاهره الا انا كنت من بورسعيد .


كنت بسافر كل فتره ، و اتقابل مع المشتركات ، و كنا بناخد دورات و كورسات تأهيلية عن الزواج ، و الاتيكيت ، و كل حاجه تقريبا تخص العروسة.


و فى النهاية حضرنا حفلة كبيرة كان فيها رجال اعمال و رعاة و فنانين ، و كانت لجنة التحكيم بتختار العروس الفائزة ، و كان على مدار الفتره دى حصل تصفيات ووصلنا ل 5 عرايس بس، و اثناء الحفل قمنا بعرضين على المسرح ، عرض بفستان سوارية ، و عرض تانى بفستان زفاف، و على اساس العرضين تم اختيار العروس الفائزة بتصويت لجنة التحكيم و الحضور.


و كانت شروط المسابقة اصلا على موقع الفيس بوك ، هو تصويت المتابعين للعروس " بلايك ، و كومنت ، و 2 شير فقط للعروس الواحده ، مع هاشتاج باسم العروسة"،والحمد لله حتى على السوشيال ميديا كان الشير ليا كتير.


ايه المميزات اللى هتحصلى عليها كعروس فائزة؟


اولا هحصل على لقب عروس العاصمة لعام 2018 ،و هلبس التاج كأول عروس للعاصمة،  ثانيا فرحى هيكون فى  هلنان لاند مارك التجمع الخامس ، و هيكون فى بعض الاثاث و الاجهزة ، كهدايا من الرعاه ، و رحلتين عمرة ليا و لخطيبى ، و رحلة لشرم الشيخ اسبوع.


و كل الحاجات دى استلمتيها فعلا؟


لا للاسف تانى يوم حفل التصويت ، الاستاذة ميار الببلاوى حصلها حادث كبير اوى ، و هى حاليا فى الخارج للعلاج ، و احنا منتظرين عودتها بسلامه ان شاء الله ، لان كان المقرر حفل الزفاف يكون يوم 12 ديسمبر القادم، ان شاء الله ترجع معافاه و بخير ، و نكمل باقى التجهيزات للحفل.


شكرا ليكوا ، و نتمنى السلامه لاستاذة ميار و ترجع بسلامه، و حفل الزفاف يتم فى ميعاده ان شاء الله .