(عزازيل ) اول فيلم رعب مصري بخبرات كندية

 

اقيم الاثنين الماضي حفل الاعلان عن اول فيلم رعب مصري بمعنى الكلمة وهو فيلم (عزازيل ) بطولة : روان الفؤاد وعلاء مرسي  وايمن اسماعيل ومهجة وجميلة عزيز ، من انتاج الاحمدي للانتاج الفني ومن تأليف / عمرو علي  ومدير التصوير / احمد البدوى ومن اخراج / رضا الاحمدى

(عزازيل) هو فيلم اكشن سيسبينس رومانسي لايت بطولة مجموعة شبابية تقابلوا مع بعضهم من قبل في فيلم (ابن كار) ، وهو ثاني عمل من اخراج / رضا الاحمدي

يدور الفيلم حول (عزازيل) ابن ابليس الكبير الذي تسخره احدى السيدات ويطلب منها قربان فتختار له ابنة زوجها ويعجب بها وبالفعل يمسسها وتتعذب كثيرا حتى تقابل حبيبها منذ الطفولة ويتعرف عليها عن طريق سلسلة كان قد اعطاها لها كهدية قبل هجرتها وظلت معها حتى عودتها لمصر ويتحدا معا في مواجهة عزازيل حتى تتغلب عليه في النهاية

حضر الحفل : الفنان / شريف مبروك – مدير الشركة – ومدير الانتاج / محمود سويلم والمغني / ياسر عدوية والمؤلف / محمود عويس والمصور / مودي الديجوي ، ومن ابطال العمل : عفاف رشاد واحمد الجوهري والملحن / عصام اسماعيل وشاهندة ومصطفى درويش و ندا المصري و فريد عزت وجيسي و شريف رواش  .

وبعد تقطيع التورتة كان لنا هذه الاحاديث الصحفية بشكل حصري مع ابطال العمل :

فتحدثت لنا النجمة / روان الفؤاد وقالت : انا بعيش قصة رومانسية لبنت بتحب ولد وفيه ناس بتكرهم فحضرولها عزازيل اللي هو ابن الشيطان الكبير وبيلبس البنت دي وبيعذبها طوال حياتها فبتمشي على الحيطة وبتقطع ملابسها وبتبقى عايزة تحرق نفسها واللي بينقذها حبيبها في الاخر لما بتشوفه لما كبر لانهم كانوا بيحبوا بعض وهما صغيرين وكان قد اعطى لها سلسلة صغيرة وفضلت في رقبتها لحد ما بتكبر وبيعرفها منها ،والذي جذبني في الموضوع انه هيكون اول فيلم مصري رعب بجد مش زي الافلام اللي اتعملت قبل كدة لان هنا العفريت مصمم جرافيك بالكامل واللي عاملينه كرو من كندا هتشوف شكله قدامك ومشاهد ايذاء البنت وقلب عينيها سودة وحمرة كل ده جديد ، بس اهم حاجة اني مخفش منه اثناء التصوير ، وبالنسبة لملابس الشخصية اغلب ملابسها بيضاء وده دليل على الطهر والبراءة ورغم ذلك يحدث لها ما ستتابعونه ، وبالنسبة لكرو العمل فانا بحب اشتغل معاهم جدا فمثلا مدام / عفاف رشاد هي زي امي بس طالعة في الفيلم ام الولد اللي بحبه واغلبهم اشتغلت معاهم في فيلم (ابن كار) ، وبالنسبة للغناء احتمال يكون فيه اغنية رومانسية هغنيها بيحضرها الملحن / عصام اسماعيل مع المخرج / رضا الاحمدي ، وعن جديدها قالت : انا بعمل 5 افلام في عين العدو خلصت واحد منهم والتاني اهو وفيه فيلم (كلبش) اخراج / بيتر ميمي و(ام الدنيا) اخراج / ابرام نشات و(تاج الجزيرة) اخراج/ خالد مخلص

اما النجم / علاء مرسي فذكر  : انا بثق في المخرج رضا الاحمدي لانه مخرج عارف هو بيعمل ايه وماسك ادواته كويس عشان كدة اول ماجالي الورق وافقت على طول والموضوع كمان جديد يعني هعمل شخصية فيها شكل مختلف ، فدوري ولد مصاب بمس شيطاني بيحركه ويستحوز عليه فده جديد عليا وانا صدقت الموضوع ماحستش ان المؤلف بيضحك عليا ، وبالنسبة لكرو العمل كلهم اصداقئي وانا اشتغلت معاهم كتير جدا ، وعن جديده قال : فيه فيلم مازال في قيد التحضير نتاج ورشة كتابة بقيادة / احمد عبد الله وهو اسمه (قهوة ريتش ) وهو بيدور على قهوة ريتش اللي في وسط البلد والتجمعات الفنية اللي بتبقى فيها وانا كنت من روادها وعارف حواديتها وقعدتها وناسها ، وهيشاركني البطولة : الاستاذة الكبيرة الرائعة / ميرفت امين وا/ احمد بدير وندى بسيوني وروان ومجموعة كبيرة تصل لـ 15 نجم  وهنصور الخارجي في القهوة نفسها وان شاء نبتدي فيه على شهر ديمسبر القادم

وتحدث معنا بطل الفيلم ايمن اسماعيل قائلا : انا بلعب دور (عمر ) وهو شاب ربنا حباه بقدرة يتعامل من خلالها مع الجن والشياطين وهو كان بيحب بنت وهما صغار ويفترقا وتهاجر ويلتقيا بعد 25 سنة وتعود قصة الحب مرة اخرى ويكتشف ان عليها ابن الشيطان عزازيل فبيبتدي يخلصها منه ، واتمنى من ربنا ان الفيلم ده يكون بداية انطلاقة ايمن اسماعيل للبطولة ، وعن جديده قال : انا بعمل دور (صابر الطباخ ) في سيت كوم اسمه (هاني هاني الطالياني ) بطولة : طلعت زكريا وانتصار وتأليف / ايمن خطاب واخراج / رائد لبيب ، وبعمل دور ريجيسير في مسلسل (فرقة المرح ) اخراج / عادل مكين

اما الفنانة الشابة / مهجة فقالت : انا بلعب دور (تيسير) وهي فتاة يقع في حبها ابن الشيطان عزازيل والذي يمسسها وتكون احدى ضحاياه ويعتدي على اي شخص يحاول الاقتراب منها حتى زوجها

وصرحت لنا الفنانة / جميلة عزيز قائلة : انا اشتغلت مع المخرج الجميل / رضا الاحمدي فيلم (ابن كار) وهو لسه في مرحلة المونتاج فعرض عليا فيلمه الجديد (عزازيل) في دور (هدى) وهي الزوجة الثانية لوالد البطلة (روان) بعدما يطلق والدتها وهدى دي اصلا كانت تعمل في مجال الاعمال والسحر فبحضر (عزازيل) وهو بيختار (روان) كقربان له ومن هنا بيبدأ شغل الرعب ، وخصوصا وان ليا صديقة مرت بالتجربة دي وقعدت اسمع منها وازاي خرجت من الموضوع ده عن طريق صفاء القرآن الكريم ، ورسالتي من الدور ده ان كل واحد فينا لو بعيد عن ايمانه او عن ربنا ، فانت هتكون مهيأ للشيطان انه يتحكم فيك

وتحاورنا مع مخرج العمل ا/ رضا الاحمدي والذي قال : فكرة الفيلم جاتلي وابتدينا نشتغل عليها وطلعنا نص ممتاز جدا ، والمشاهد دلوقتي زهق من الافلام التقليدية لكن فكرة الفيلم هتغير حاجات كثير جدا في خريطة السينما المصرية ، انا مش جايب قصة اوروبية وممصرها لأ الفكرة طالعة من جوة بيئتنا المصرية ومعظم الناس عندها الاعتقاد و ده مذكور في القرآن ، وعن الفيلم فعزازيل ده ابن ابليس الكبير وحد بيسلطه على البطلة وهنشوف هيحصلها ايه واللي هينقذها هنكتشف انه حبيبها منذ الطفولة لكنها هاجرت لمدة 25 سنة وحتى عودتها لمصر لم يشاهدوا بعضهم البعض ، اما بالنسبة لتقنيات الفيلم فستتم بكرو كندي مكون من اربع اشخاص بالتعاون مع مدير التصوير المصري الكندي / احمد بدوي لاننا هنعمل تكنيك مختلف تماما عما شاهدته في افلام الرعب بتاعتنا او ما يقال عنها ذلك ، وعن تجربته الانتاجية الاولى قال : انا بنتج العمل ده لان الجمهور زهق من النوعيات التي تقدم له الان ونفسه يشوف حاجة ثانية مختلفة فحتى لو الفيلم لم يحقق ايرادات بس انا يهمني ان الشباب الصغير يلاقي حاجة يشوفها ويتجاوب معاها غير افلام البلطجة حتى ولو مش من اول عمل

وقد ذكر مدير الانتاج / محمود سويلم انه سيتم عقد مؤتمر صحفي لشرح كل تفاصيل الكرو الكندي للتعريف بشكل عزازيل وكيفية العمل عليه قبل بداية تصوير الفيلم خلال اسبوع او 10 ايام على ان يتم البدء في التصوير يوم 18 نوفمبر ومن المفترض نزول الفيلم في موسم اجازة نصف العام ان شاء الله ، وعن جديده قال : بنعمل 2 سيت كوم : الاول اسمه ( إلسع فلسع ) تأليف / محمود فوزي واخراج / ناصر عبد السلام  ، والثاني بعنوان ( العصابة ) – وهذا اسم مبدئي له – تأليف محمد زمزمي ومن اخراج / بسنت ثابت ، وهما يدوران حول احوال البلد من خلال مجموعة من الوجوة الجديدة

واخيرا صرح لنا شريف رواش بانه يقوم بدور شاب فاقد احساسه بالحياة التي حوله بمعنى انه يعيش حياته بالطول والعرض وملهي بالشرب والمخدرات 

يذكر ان نص الفيلم بعيدا كل البعد عن رواية (عزازيل) تأليف الكاتب الكبير / يوسف زيدان

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *