جريدة أحوال مصر
اقيم العرض الخاص لفيلم “مترو” باحدى سينمات مدينة السادس من اكتوبر بحضور معظم ابطال الفيلم ومن تنظيم : الاعلامية ولاء الكومي والصحفي وديع عزمي
فيلم مترو انتاج / اي فيجين – منتج فني صلاح حسن – بطولة : هيام جباعي ، رامي وحيد ، احمد عبد الحي ، نوران كمال ، اسما الشال ، علاء مرسي ، احمد بدير ، سامي مغاوري ،الفت سكر ، بيبرس الشهاوي ، وفاء عمر ، شريف مبروك ، مدير تصوير/ محمد المراكبي ، تأليف/ زايد نايف ومن اخراج/ احمد الشوربجي
مترو هو فيلم تشويقي لايت رومانس يدور حول قصة حب تنقلب الى عداوة بعد تعرض البطلة لحادثة اغتصاب فتتعرض لعقدة نفسية من الرجال تسيطر عليها وعلى البطل ايضا فعدم انقاذه لها ادي به للجنون ودخول السجن ومصحة نفسية بعد اعتدائه على شخص كان يحاول التحرش بفتاة بالشارع ، وينفصل البطل عن البطلة وحينما يلتقيان يقرران الانتقام من بعدهما البعض فمن سيقتل من داخل محطة المترو ولماذا ، فهو كان ومازال يحبها اما هي ؟؟؟
الفيلم يعد التجربة التمثيلية الاولى للبطلة الاردنية هيام جباعي في مصر وكذلك يعد نقلة في ادوار رامي وحيد بطل الفيلم فما بين الرومانسية في اول الشخصية والاكشن في اخرها نرى تحولات كثيرة برع في ادائها رامي حتى في دموعه التي قلما كنا نراها على الشاشة
وقد كان لنا بعض الاحاديث الصحفية مع صناع الفيلم كالتالي :
فتحدث هيام جباعي قائلة : “مترو” يعتبر اول بطولة مطلقة ليا في السينما هنا في مصر وهو فيلم سيسبينس رومانسي انا بلعب دور “داليا” يارب يحبها الناس وهي شخصية معقدة نفسيا مرة سعيدة ومرة حزينة ، وعن تسمية الفيلم بـ “مترو” قالت : 80 % من احداث الفيلم موجودة داخل محطة مترو ،10 % كانت مشاهد داخل محطة مترو حقيقية وهي محطة الاوبرا و70 % كانت ديكور داخلي مبني داخل استوديوهات “سنبل” للفنان محمد صبحي ومن هنا جاءت التسمية ، وعن مشهد الاغتصاب قالت : هو المشهد اللي حول مجرى الفيلم بالنسبة للبطل والبطلة وتم تنفيذه بطريقة غير خادشة للحياء ، وعن جديدها قالت : انتظر تحقيق “مترو” النجاح الذي يستحقه ثم افكر في الجديد
اما الفنان رامي وحيد فقال : انا بقدم شخصية “يوسف” وهو دور صعب لانه كان رومانسي وبيحب اوي وحبه ده بيخليه يدافع عن مبادئ بيؤمن بيها وكمان البنت اللي مرتبط بيها فهنشوف اد ايه هو مؤمن بيها وعمل ايه من اجلها ، ومن اصعب المشاهد بالنسبة لي لاول مرة بعمل مشهد اكشن حقيقي ، فمثلا في فيلم “حلم العمر” كان رياضة مش اكشن لكن في “مترو” هنشوف مشهد اكشن مهم داخل ديكور المترو وانا اتعورت وانا بعمله وكان لازم نكمل ،بالاضافة ان الكلام في الفيلم قليل جدا وحركة العين اكتر من اي حاجة وده كان كلام المخرج والمؤلف ان كلام الشخصية دي نقلله على اد ما نقدر ونخلي الدراما هي اللي تسوق وفي النهاية انا باطبق وجهة نظر المخرج
وتحدث المخرج احمد الشوربجي وقال : الفيلم عبارة عن قصة تدور حول الرومانسية والاكشن فهو عبارة عن حدوتة حب بين شاب وشابة في الجامعة ، وقد وصف كواليس الفيلم بانها: احلى ايام ويتمنى رجوعها مرة اخرى ، وبالنسبة لشخصيات الفيلم فقال : “رامي وحيد” عامل دور يعتبر نقلة له فهو في البداية بيكون طالب في الجامعة وبيمر بمراحل كتير من قصة حب وحادثة لحبيبته ” هيام جباعي ” بتقلب حياته رأسا على عقب وبيتحول لشخصية تانية بتخلق صراع داخله بين رغبته في العودة لحبيبته وبين اللي … هيشوفه الجمهور في صالة العرض لما يجي يتفرج على الفيلم ويارب يعجبهم
وقالت الفنانة الصاعدة / اسما الشال : دي اول مرة ليا اقف قدام كاميرا ، انا كنت مساعدة مخرج قبل كدة في فيلم “كارت ميموري” مع استاذ خالد مهران ودي اول مشاركة ليا في السينما كممثلة ، انا بعمل دور صغير لكني استمتعت بيه جدا ، وعن جديدها قالت :في اول يونيو داخله فيلم جديد اسمه “لعنة ابليس” هيكون مفاجاة للجمهور هاظهر فيه بشكل مختلف
اما الشاعر سلامة علي فقال : المستشار الاعلامي للفيلم /عادل مراد كان كلمني وقالي الفنانة هيام جباعي عايزة تقابلني عشان نبتدي نشتغل على اغنية للفيلم وبالفعل روحت وقريت السيناريو ، والفكرة عجبتني واقترحت عليهم “مدحت صالح” ووافقوا على طول ، وعن الاغنية هي بعنوان “ليه خايفة مني” وهي الحان/ وليد منير وتوزيع/ طارق حسيب ووتريات/ هشام مصطفى ومكساج/ محمود عزت ،وهي بتدور حول حالة الاغتصاب اللي بتحصل للبطلة وبتجيلها حالة نفسية من حبيبها اللي لم يدافع عنها اثناء الحادثة ومن هنا جاءت الكلمات : “ليه خايفة مني .. ليه في كل نظرة بشوف عنيكي بتتهمني” ، فبتعبر عن اللي حصل في الفيلم ، ودي تاني مشاركة ليا في اغاني الافلام بعد فيلم “البلد دي فيها حكومة” اغنية “ولا هناساك” والثالثة هتكون في فيلم “كارت ميموري” اغنية / خالد سليم “الملامح” لحن / محمد يحيى وفيه اغنية خليجي لماجد عادل لحن/ تركي الشريف
واخيرا المغني / نادر ابو الليف كان من ضمن الحضور وقال : انا سعيد اني بشارك اخويا وحبيبي “رامي وحيد” فرحته بفيلم الجديد واستاذ علاء مرسي ودي اول مرة احضر عرض خاص لفيلم وان شاء الفيلم يكسر الدنيا ، وعن دخوله مجال التمثيل قال : انا اتعرض عليا حاجات كتير بس انا مستني رامي يجيبلي حاجة كويسة – مداعبا رامي – وعن جديده قال : بحضر لاغنية سينجل هتكون مفاجأة للجمهور
حضر العرض : الشاعر / هشام الجخ والفنانين : دنيا عبد العزيز ووالدتها ، ومحمد نجاتي وعمرو عبد العزيز وخالد حمزاوي ومحمد احمد ماهر واحمد الجوهري ونادر نور الدين واحمد كامل ، والمخرجين : حازم متولي وعمر زهران واحمد اسماعيل الحريري واشرف عبد المعطي ومحمد مصطفى بكري ،والمؤلف/ عمرو فهمي والمنتجين : عادل حسني و ايهاب اسماعيل ومحمد دربالة ، و”سحر شعراوي” زوجة الكابتن هشام يكن ، و”عصام الوريث” مصمم الاكشن بالفيلم ، وهنا البرنس ، ووالدة البطل رامي وحيد واقاربه
