جريدة أحوال مصر
كل التهاني للرئيس
من مواطن كان يعيش
حلم مسجون ف الضلوع
ييجي يوم ….
يطلع الصوت الحبيس
يرجع الحق لصاحبه
والعدالة متتنسيش
من طفل مهضوم ف الشوارع
صرخته ولا حد سامع
حلمه البسيط
انه ف يوم يقدر يعيش
كل التهاني للرئيس
من ابن موهبته معاه
لكن مفيش ايد وراه
نفسه يكون شيء ف الحياه
غدر ف طريقه ميلاقيش
من قلب أم شبابها تاه
ف عيون ولاد متغربين
متحيرين
بيصدهم كلمة مفيش
كل التهاني للرئيس
للأمل راجع ينور
كل حارة وكل بيت
زغروده حلوه
متغمسه بكلمة يا ريت
ضلمه تاني لأ مفيش
كلنا لازم نعيش
ايد بتبني .. ايد بتزرع
ايد بترفع ع الحدود
راية بلدنا
ايد بتصنع ليك وليا
بكره أحلى
ايد بتحمي م الأذيه
ايد بتدعي ….
ربنا يخلي بلدنا
ربنا يحمي ولادنا
وكل التهاني للرئيس
من مواطن …. حلمه يعيش
