جريدة أحوال مصر
ندخل ف الموضوع على طول ، انا عارف انك قافش مني وعارف ان تصرفي في اخر مرة ماكانش قد كده ، بس والله انا شفطتك لان الانترفيو ده مهم قوي ، والناس التافهة دي بيعلقوا علي حاجات تافهة زيهم ، بس اوعي .. اوعي تفتكر اني بستعر منك .. حاشا لله ، انت عارف اننا اول مابننفرد ببعض ف البيت بسيك علي حريتك وبتاخد مجالك وتمدد براحتك وبفضل اطبل عليك بمنتهي الفخر والاعزاز.
انا عارف انك مفتقد صاحبتي (….) اللي كانت بتقول ” الراجل اللي مالوش كرش مايسواش قرش ” وعارف… كمان انك مش طايق صاحبتي الجديدة عشان كل يوم تقرصك بايديها وتقوللي ” ايه ده !! والنبي مش مكسوف ؟ ” .. بس ياصاحبي انت عارف ان الدنيا كلها شقا وماحدش بيفضل مرتاح وانت عارف اني باكره اللي يهينك زي مانت بتكره الحزام ابو اتناشر خرم.
اسف علي كل بنطلون ضيق .. وكل فورمة ساحل .. وكل شيء ضايقك … عارف ان علاقتنا مرت بمراحل تخبط .. بس احنا كنا محتاجين نختلف عشان نتفق .. محتاجين نبعد عشان نتأكد من مشاعرنا ….
عزيزي الكرش ، بسببك صحابي وقفوني حارس مرمي .. وبسببك مابعرفش احط رجل على رجل مظبوط .. وبسببك باعد كام واحد ف الاسانسير قبل ما اركب وبسببك حاجات تانية كتير ف حياتي عرفت بالوقت اد ايه جميلة ومبهجة .. يافرحتي لما ابقى مسلوع كده والناس مش عارفه انهي رجل اللي حاططها ع التانية ! … هو يحيي الفخراني وحش ؟؟ ابداً ده نجم العالم وجان كمان .. ماحبكتش يعني ابقى مصطفى فهمي مع الأخذ ف الاعتبار ان ممكن مصطفى فهمي يكون عنده واحد شبهك بس بيخبيه بحكم ” الانترفيو”.
انا مش متخيل نفسي غير كده .. مدور من قدام ومستقيم من الضهر .. حاجة كده ملو الهدوم وتشرف .. وباوعدك اني احافظ علي كامل لياقتي الكرشية واحاول الفترة الجاية ارجع ل…. اللي انت بترتاح معاها اكتر.
.. اوعدك بشوكولاتات أكتر وبيتزا ستافت كراست مع بطاطس وودجز ومكرونة بالصلصلة الغرقانة وكل ماتشتهيه الانفس ، وعلى فكرة انا اشتريت امبارح حزام جديد بخرمين بس:) ونويت اسيبك براحتك .. تواجه العالم .. وتبان ف الكادر.
