دنيا النشار : انطلقت من (الرحايا) ، و(الركين) فاجئني وضربني ، و(يسرا) كادت ان تصبح ضرتي ، وعيني على الاوسكار

22/11/2013 - 11:07:23

دنيا النشار دنيا النشار

كتب محمد بدر :

 


منذ كانت في العاشرة من عمرها ، زرع بوجدانها حب البالية ودراسته وعندما كبرت قدموا لها النصيحة لدخول مجال التمثيل ، فانتشلت قلبها من بين الرحايا وتراقصت على انغام ترالم لم ، فعاشت احلى ايامها في مصر وحضارتها وتركت الطائرة تطير لانها ستكذب حين تقول انها تكرها ، ومن منا يكرها فمن الوزير الى الركين كلنا نعشق تراب بلدها ، هي الفنانة الشابة / دنيا النشار ، والتي كان لنا معها هذا الحوار الصحفي من داخل مملكتها الفرعونية :



  • ما هو الشيء الملفت لكي في العصر الفرعوني ؟


بالتأكيد ، الملابس الفرعونية ، بص ، طوال الوقت المصريين عموما بيميلوا لاجدادهم ولاصلهم ، اه احنا مرعلينا كثير؛ رومان وعثمانين بس دائما باميل للفرعوني لاني بحس انهم كانوا متقدمين جدا ومتحضرين جدا وفعلا مفيش احسن من مصر



  • وخاصة بنات هذا العصر ايضا كان جمالهم طبيعي ، مثل نفرتاري !!


فعلا الجمال المصري كان جمال يتحب مش جمال تشمئز منه وعموما مقاييس الجمال بتختلف من شخص لشخص ومن دولة لدولة فانا شايفة ان مقياس الجمال عن حق هو الجمال الفرعوني الي كان مايل للسمرة الحلوة



  • مثلك تماما !!


ههههههه مش قوي كدة يعني 



  • لاحظت ان لون بشرتك فاتح ولكن قبل الحديث قمت بوضع مكياج بدرجة اغمق من لونك الطبيعي فما السبب ؟


انا بحب السمر ، مع ان ماما بتقعد تقولي يا بنتي البنات كلها بتفتح نفسها وانت بتغمقي ، لكن انا بحب احط فاونديشن غامق



  • هل هذه اول مرة ترتدين ملابس فرعونية ؟


لا ارتديته قبل ذلك في عرض من عروض البالية ، كنت برقص فرعوني



  • كيف كانت بداية دنيا النشار ؟


انا دارسة بالية من الصف الثالث الابتدائي وكنت بحب اتفرج على برنامج اسمه (مكان في القلب) وكان مستضيف (سحر رامي) فكانوا بيتكلموا عن معهد البالية وقعدت تعزف على البيانو وتقول هنا كنا بنقعد وهنا بنعمل حركات بالشكل الفلاني ، والذي بنجح في ثانية ابتدائي وبيدخل ثالثة بالية على طول وانا كنت لسه مخلصة ساعتها ، ودخلت



  • هل تعتبر الدراسة بالمعهد بمثابة شهادة عادية مثل الثانوية العامة ؟ وما هي المواد التي يتم دراستها بها ؟


اه ، هي هي بس بندرس زيادة عليهم مواد مثل : البالية الكلاسيكي والبالية المودرن والبالية التاريخي و الرقص الشعبي العالمي ، طبعا بجانب العربي والرياضيات وكدة



  • كيف كانت دراسة البالية مفيدة لكي ؟


اتعلمت الاحساس ، دي اهم حاجة اتعلمتها من البالية ، لان المفروض انت واخد بالك ومركز في المزيكا ، وحركات الرقص لازم تكون ماشية مع المزيكا ، والتكنيك بتاعك صح ولا لأ ، متوافق مع باقي زملائك ، وبتشوفهم في المراية بطرف عنيك



  • ما اهم ما يميز الرقص الفرعوني ؟


فيه ميزة في راقص البالية المصري مش موجودة عند مختلف دول العالم ، لانه بيتعلم كل حاجة حتى لو هو مش ممتاز فيهم كلهم بس بيبقى عنده فكرة عنهم ، مش متخصص في نوع واحد ، فاحنا لما بنعمل فرعوني لا نرقص فرعوني صرف ولكن بنرقص بالية عادي مطعم بحركات فرعونية



  • كيف حدث التحول من دراسة البالية الى دخول مجال التمثيل ؟


من وانا في البالية ، المدرسين بتوعي وزمايلي ، كانوا دائما بيقولولي انت مكانك في المسرح ومعهد فنون مسرحية مش بالية ، وبالفعل التحقت به ، لانه فيه نوعان من المهارة والشطارة ان يكون لديك احساس وان يكون لديك تكنيك جيد



  • بالنسبة لكي ، ايهما افضل : التكنيك ام الاحساس ؟


انا بحب الاحساس لانه بيوصل للناس اسرع ، والاحساس الحلو بيطلع تكنيك حلو



  • مثال على ذلك العندليب الاسمر ، كان لديه احساس مرهف بالرغم من ان طبقة صوته لم تكن قوية !!


بالظبط كدة ، لان الاحساس هو الذي يدخل القلب ، وعلى مستوى التمثيل (احمد زكي) كان امبراطور التمثيل بالاحساس



  • ما هو اول عمل قدمك للجمهور ؟


انا عملت تجارب صغيرة في البداية مع ناس من معهد سينما في افلام قصيرة واشتغلت مسرحيات لكن اول عمل كمحترفة وحقق نسبة مشاهدة عالية كان مسلسل ( الرحايا ) وكنت طالعة بنت استاذ / نور الشريف



  • لابد وانها كانت صدمة لكي ، فانت كنت ابنته ؟


بصراحة اكيد ، بس استاذ / نور بجد ، كان اب لي وهو فنان بمعنى الكلمة ، انا اول يومين كنت رايحة متوترة وخايفة وكان مشهدي معاه فكنت مرعوبة ، فلقيته جالي وانا كنت ماسكة طرحة لانها كانت محجبة وشايلة ابنها البيبي وماسكة شنطة ، فلقيته قعد يظبطلي الطرحة بايده وقالي متخفيش ودي كانت اول مرة اشوفه قدام الكاميرا ، والحمد لله اليوم عدى على خير واتبسط مني وكل اللوكيشن قالوا لي انت ممثلة شاطرة وهيكون ليكي مستقبل



  • في رمضان الماضي  شاهدنا لكي 3 مسلسلات وسيت كوم ، عرفينا بهم ؟


السيت كوم ( احلى الايام ) اخراج / اسد فولادكار ومسلسل (طيري يا طيارة ) مع استاذ / مصطفى فهمي ومسلسل (الركين ) للمخرج / جمال عبد الحميد ومسلسل (نكدب لو قلنا ما بنحبش ) مع العملاقة / يسرا  



  • انت محظوظة !!


الحمد لله ، الله اكبر ، فعلا لان الاربع مسلسلات كلهم مع ابطال متشافين ومخرجين معروفين



  • ايا من هذه الاعمال حقق نجاح كبير ؟


لو هنتكلم على نسبة المشاهدة فالذي شوهد اكثر هو (الركين) لكن (نكدب لو قلنا ما بنحبش) هو حقق نجاح بس للاسف اتظلم لان شبكة تلفزيون (دريم) كان حصري عندها فاتظلم في المشاهدة لكن هو اتعرض على شبكة تلفزيون (الحياة) تاني الحمد لله



  • حديثينا عن مسلسل ( الركين ) ودور (فوقية) ، وماذا عن معاناتك في مشاهد الضرب داخله ؟


مبدئيا الكاست كان هايل جدا واستاذ / جمال عبد الحميد بجد اب واتعامل معايا على اني بنته وكان بيخاف على كل اللوكيشن بصراحة وبيركز جدا في التفاصيل ، فقبل العلقة المفروض استاذ / محمود عبد المغني هيضربني ، وهو بيلعب دور (جيكا) اخويا اللي هو الركين ، وانا المفروض روحت تزوجت عرفي من وراهم فهو بقى جاي يضربني ، فاستاذ / جمال قاله : بقولك ايه ما تضربهاش ، فقاله : لا مش هضربها ، وقالي : متخفيش انا مش هضربك ، وهو المفروض جاي من برة البيت متعصب ومندفع وهما بيحاولوا يحشوه وبيفشلوا في ده فبيجي يضربني ، فبدأ المشهد ودخل بس استاذ / جمال قال : استوب انا عايزك تخش باندفاع اكثر وانا جوة خايفة لان اندفاعه وحماسه ده هيجي يتطلعوا فيا انا ، ففضل يشحن فيه يشحن فيه لغاية ما دخل اداني العلقة التمام ، علقة بجد



  • هو كان يقصد انك تتفاجئ بالضرب ؟


ده حقيقي لاني اكتشفت بعد ذلك انهم كانوا متفقين عليا ، اننا هنضرب بجد عشان رد فعلي يكون طبيعي ، وبعد ما خلص المشهد ، قعد استاذ / محمود يقول لي انا اسف معلش ، بس بعد ايه كنت خلاص ، رجعت البيت جسمي مكسر ومش قادرة واصحى من النوم وكأني مغمى عليا ، كل ذلك نتيجة الضرب الذي اخذته



  • هل يوجد مشاهد غير ذلك كانت صعبة بالنسبة لكي في رمضان الماضي ؟


فيه  مشاهد غيره مكنش فيهم ضرب وعنف ، اول مشهد منهم  كان في (الركين) وهو مشهد السطح الذي من المفترض اني باروح لـ (جيكا)  وبعتذر له بعد ما بحلم ببابا وقالي اجي اعتذر لك واطلب منك السماح ، صعوبة المشهد ده اني جيت على الهوا – اتصلوا بي فحضرت على الفور - وخدته قبلها بساعة ومكنتش عارفة انا هعمل ايه وكان اخر مشهد في الاوردر – يوم التصوير – والناس تعبانة وحفظت وانا قاعدة والمشهد صعب جدا وكان الساعة 4 الفجر وفي مدينة الانتاج والهوا كان فظيع و شعري اصبح في حالة يرثى لها وكان راكور – بشكل معين لا يمكن تغيره - ، اما المشهد الثاني فكان في مسلسل (نكدب لو قلنا ما بنحبش) كنت عاملة دور (سماح) كان فيه مشهد بيني وبين (احمد داوود) وهو المفروض طالع حبيبي بس هو بيحب (يسرا) حب مريض لانها المفروض طالعة اد والدته وعندها في المسلسل ولاد قدنا بس هوعايز يتجوزها ، فكل الناس بيقنعوه ان انا الانسب له ، فبيخطبني ويدبس فيا ، وانا ببتدي اتقل عليه بناءا على نصيحة العظيمة / رجاء الجداوي وهو بيلاحظ ده فيأخذني عشان نتناقش في الموضوع ده فبواجهوا وده كان اصعب مشهد لي



  • ماذا كنت تقولين له في هذا المشهد ؟


ان انت عملت كدة عشان الناس اللي بتحبك شايفين ان انا كويسة ومحترمة ومحجبة لكن انت مابتحبنيش ، انت بتتعامل مع اخويا ومع والدي وجيت خطبتني رسمي لكن انت مش عارف تحبني . فكانت لحظة المكاشفة فبيرد عليا ويقولي : لأ ، الكلام ده مش صحيح  ، وبكمل له : لكن انا الي حبيتك وجريت وراك واختك تشهد على كدة



  • ازمة الحب من طرف واحد يعيشها شباب كثر ، كيف ترين تأثير هذه الحالة على البنات ؟ هل يدفعها ذلك لتصرفات لا ترغب بها ؟


صعوبة الموضوع ان دي حاجة بتمر بيها بنات كثيرين فلازم تبقى صادقة جدا وحقيقية جدا لكي تصل للطرف الثاني ، لكن مؤلف المسلسل استاذ / تامر حبيب كان كاتب كلام قريب جدا من الذي اراه في الحقيقة ، والصعوبة اكثر لما تكون البنت هي اللي بتحب من طرف واحد فده احساس صعب جدا ، خصوصا لو عملت اي تصرف لكي تجعله يحبها بس ده غلط ، وده اللي اكتشفته (سماح) من خلال الاحداث انه ماينفعش انك تعملي حاجة لكي تلفتي نظر شخص لكي وهو مابيحبكيش ، فيعتبر ده تقليل من نفسك وبتعلقي نفسك بحاجة هي مش موجودة اصلا ، فـ (سماح) في وقت من الاوقات حاولت ايهام نفسها انه بيحبها عشان تعرف تعيش  



  • اين دنيا النشار من السينما ؟


انا عرض عليا افلام كثيرة بعد مسلسل ( الرحايا ) لكن كانت تحتوي على مشاهد اغراء ، ولكني ارفض ذلك وعندي خطوط حمرا لا اتخطاها ، وادى ذلك الى تأخري كثيرا في السينما



  • من مثلك الاعلى في التمثيل قديما وحديثا ؟


في الابيض والاسود طبعا (سعاد حسني) اما في الجيل الجديد فبحب كل ادوار (حنان ترك) قبل ارتدائها للحجاب



  • هل يمكن ان تتركي الفن من اجل تكوين اسرة ؟


زوجي لابد وان يوافق ان اكمل في مجال التمثيل فهذا شرطي الوحيد لقبول الزواج منه



  • هل يوجد احد في عائلتك كان يعمل في المجال الفني ؟


والدي هو المخرج / محمد النشار وهو مخرج سابق بالتلفزيون المصري



  • هل لو عرض عليكي دور في احد الافلام الموجودة على الساحة تقبلي به ؟


افهم قصدك ، انا لا اكره الافلام الشعبي التي يقدمها (السبكي) ولا (محمد رمضان) وهو كان زميلي في المعهد وانا نفسي اعمل دور شعبي في السينما



  • ما هو جديدك في الفترة القادمة ؟


انا مركزة دلوقتي في المعهد بكمل دراسات عليا وتمهيدي ماجيستير عشان عايزة اتعين في المعهد و بحضر لمسلسل مع استاذ / جمال عبد الحميد لرمضان المقبل ، وفيه فيلم جديد بقراه دلوقتي هو من اخراج / .... هقولك اول حرف من اسمه لغاية ما امضي ان شاء الله وهو (ع ) والشاطر من قارئي الخبر يخمن هو مين ؟



  • بماذا تحلم دنيا النشار ؟


انا طموحي ملوش حدود ونفسي اخذ جائزة الاوسكار


يذكر ان (دنيا) تشارك في بطولة مسرحية (عاشقين ترابك ) بالاسكندرية وهي تنتمي  للكباريه السياسي ، وتشمل 8 لوحات ، الأولى عن الثورة المضادة ، بينما تناقش اللوحة الثانية الصراع بين الأحزاب الدينية والمدنية ، كما تناقش اللوحة الثالثة الانتخابات والديمقراطية ، والرابعة الاستبداد، والخامسة تبحث عن قارب النجاة ، والسادسة أمن الدولة ، والسابعة تدور حول ممثل يتمرد على سلطة المخرج ، بينما تعبر اللوحة الثامنة والأخيرة عن محاولة لترجمة ما نادى به الشعب في ميدان التحرير بصورة فنية ، لتقدم لوحة لمصر في عام 2050.


المسرحية من إنتاج فرقة ” الساحة “، وبطولة جماعية لمجموعة من خريجي المعهد العالي للفنون المسرحية وطلابه، ديكور ”صبحي عبد الجواد“ ، تأليف ”ياسر علام“، إخراج ”محمد الشرقاوي”.