جريدة أحوال مصر
تليفون جالي اوله 34+ الساعه ١ بالليل
انا قلت الله مين هيكلمني من اسبانيا دلوقتي
رديت
المتصل: اتش انت فين “انجليزي مكسر قوي”
انا: مين معايا
المتصل: انا ميسو
أنا: انا ميسو مين؟
المتصل: ايه مش اتش معايا؟
أنا: ايوه بس ميسو مين؟
المتصل: ميسي يا أخي ميسي
أنا: يا نهار ابيض انت غيرت رقمك
ميسي: لا ده التليفون التاني اللي عليه الرومنج
ماجتيش ليه؟
انا: اصلي مشغول عندي تصوير اليومين دول. “طبعا احرجت ااقول لميسي ان محدش عزمني او ااقوله معيش فلوس ادفع حق الكرسي اللي معدي مش عارف كام الف دولار في سعر الدولار بالجنيه المصري.. حيعمل رقم رهيب, بس عموما الرقم ده رايح لعلاج حالات ڤيرس C, و دي حاجه كويسه طبعا”
المهم نرجع للمكالمه
ميسي : انا اتبهرت بالهرم حاجه رهيبه انتو عندكم تاريخ عظيم, ده الهرم عندكم اكبر من استاد Camp Nou بتاعنا في برشلونه.
يعني اللي عنده الهرم بس ممكن يعمل سياحه جامده و يدخل لمصر ايراد اكتر من دخل اسبانيا و الارچنتين من السياحه, ده أستاد Camp Nou بيدخل ارقام رهيبه لنادي برشلونه عندنا
انا : محاولا تبرير ان الهرم دلوقتي مبيجبش الف جنيه في اليوم علي بعض, غير الرحلات المدرسيه الصراحه اللي لولاها مكناش عرفنا نجيب رواتب الموظفين اللي شغلين في الهرم, “بص يا ميسي انت عارف كل دول العالم او شويه منها الصراحه مش كلها مانعيين راعيها انهم يجو مصر لدواعي امنيه, بذمتك مش انت حاسس ان مصر امان”
ميسي: امان جدا.. انت عارف انا كنت سامع ان شوارعكم زحمه.. بس انا جيت من المطار لمينا هاوس في ٢٠ دقيقه..
( شكر خاص لوزاره الداخليه اللي وقفوا الشوارع علشان ميسو يوصل بسرعه )
اهه كمان ميحسش بكارثه الزحمه عندنا
أنا: انت عارف يا ميسو زيارتك دي هتفرق معانا كتير و ان شاء الله هتجبلنا سياحه علشان وجودك النهارده في الهرم بيدي العالم كله رسالة ان مصر امان و ان شاء الله اقتصادنا كمان هينتعش…
ميسي: اقتصاد ايه يا اتش.. ده انا واخد رقم رهيب علشان اجي و كمان جي بطياره خاصه و كان فيه اكتر من ٩٠ كاميرا مستنياني و بتصورني.. ده الاضاءه اللي في الهرم النهارده تكفي اضاءه الارچنتين كلها..
(شكرا المساهمين اللي دفعو لميسي و جابو ميسي بطياره خاصه و شكرا وزاره الكهربا علشان مقطعوش النور في حدث زي ده)
انا: سيبك انت قولي ايه رايك في العشا
ميسي: ده لو لويس انريكي ( مدرب برشلونه ) عرف اتعشيت ايه كان هيجيلو شلل.. يا راجل ده كم الجمبري و الاستاكوزا علي الترابيزات يأكل حي كامل في بيونس ايرس.
اتش عايز اسالك حاجه انا كنت بأسمع حاجات غريبه و بتترجمي حاجات اغرب
انا: يعني ايه ميسو
ميسي: مثلا كان في أغنيه اسمها “الديك بيدن كوكو كوكو في الفجريه”, والترجمه كمان بتقول ان الديك بيدن .. ممكن تترجمهالي يعني ايه و اشمعني الاغنيه دي اللي اخترتوها من التراث
هنا بقي انا معرفتش اجاوب و معرفتش اشكر مين اللي اختار الاغنيه
فقولت لميسي: الو الوووو,, غالبا كرتك خلص يا ميسو
و انا بقفل السكه سامع ميسي بيقول ازاي خلص انا خط مش كارت..بس لازم الصراحه اشكر اللي فكر و ساهم و اجتهد انه يجيب ميسي مصر.. بس المره الجايه مع رونالدو بقي بلاش نغنيلو “ذهب الليلو و طلع الفجرو و العصفور صوصو” علشان لو رونالدو طلب مني اترجمهالو مش هعرف..
و نهاركم سعيد و يومكم بيضحك
