جريدة أحوال مصر
بدأت مشواها الفني منذ الخامسة من عمرها ظهرت بالاعلانات وانكشف الحجاب عنها واصبحت السندريلا و احتارت بين تامر وشوقية وقررت المرور من على المطب الصناعي لتستقر مع راجل وتصبح من ضمن ستاته الستة وانطلقت من بيته حتى وصلت الان الى بيت العمدة وخالفت القوانين وتزوجت وهي قاصرة في الصف الاول الاعدادي ، هي تكن الفضل للعديد من الشخصيات مثل : اسد فولاد كار واشرف عبد الباقي ومجدي ابو عميرة وتحلم بدخول كلية الاقتصاد والعلوم السياسية فهي لا تحب ان تعتمد كليا على حياتها الفنية ، انها النجمة الشابة / منة عرفة والتي كان لنا معها هذا الحوار الصحفي والذي جاء كالتالي :
- منذ ولادتك وانت تعشقين الاضواء والتمثيل والشهرة ؟
والله بص هو مش من ساعة ماتولدت اوي هو تقدر تقول الموهبة كانت عندي من وانا صغيرة اوي وحابة الموضوع فانا ابتديت من وانا عندي 5 او 6 سنين ولغاية دلوقتي مستمرة فيه لحبي له
- ما هو اول موقف جعلكي تحبين الفن ؟
مكنش فيه موقف محدد هو اللي حببني في التمثيل لكن من وانا صغيرة حابة التمثيل والفن بشكل عام والاضواء والشهرة
- هل هناك احد في العائلة يمثل ؟
اختي الكبيرة كانت بتعمل اعلانات فكان ليها في الميديا شوية بس مش قوي وهي انسجبت دلوقتي عشان اتجوزت وخلفت وكنت على طول معاها بشوف النجم / محمد هنيدي وهو بيجي يتفرج على الافلام بتاعته
- ذكرينا بها ظهرت بأي فيلم ؟
والله انا مش فاكرة اسمه ايه ، اصلها بتمثل من زمان اوي ، لكن انا حبيت التمثيل منها وكنت كل ماشوف حاجة عجبتني اقعد اقلدها
- عندك جينات الفن ؟
اه بالظبط وبعدين اصلا مامتي وهي صغيرة كانت بتمثل مسرح
- اذا الموضوع وراثة ؟
تقريبا لكن ساعتها جدتي منعت مامتي من الشغل عشان كانت خايفة عليها من المجال والحمد لله انا طلعت وكملت
- منة الطفلة الشقية تفاجئنا بها في شخصية في مسلسل (القاصرات) برغم انك مازلت صغيرة ما السبب وراء هذه النقلة ؟
هي مش نقلة ، القصة اني وانا لسه طفلة عن دلوقتي لان ملامحي اتغيرت شوية عن ما كنت باشتغل في افلام : (مطب صناعي) و (الحب كدة) فدول كانوا في فترة واحدة الشغل كان ورا بعضه في نفس السنة
- مظهرك لم يتغير كثيرا ؟
فعلا فالناس مكنتش بتلحق تنساني وبعد كدة قعدت فترة سنة ونص مكنتش باشتغل خالص كنت ساعتها في ستة ابتدائي شهادة بقى ودراسة ، في الفترة دي ملامحي اتغيرت وشكلي اتغير ، هو اه متغيرش كتير لكن هو عشان الناس كانت واخدة على حاجة وفجأة اتغيرت لانهم فضلوا سنة ونص يتفرجوا على نفس الافلام اللي عملتها
- انت امام اعينهم الطفلة الصغيرة ؟
بالظبط ، هما فاكرين اني انا زي مانا وكمان (راجل وست ستات) 6 اجزاء ورا بعض فاتعودوا على شكل معين ليا لكن هما عشان مكنوش بيشوفوني وانا بكبر سنة سنة وفجأة لقوني في مسلسل (القاصرات) بناقش قضية جرئية شوية
- تعودنا منك تقديم ادوار كوميدية ومرحة لكن الان تقدمي ادوار جريئة ، فنوعية ادوارك اختلفت هل السبب وراء ذلك هو السن ؟
انت بتتكلم اني خلاص بطلت العب ادوار العسولة وكدة ، لا خالص انا ماخدتش طريق الادوار الجريئة ، الفكرة اني اتعرض عليا حاجة وهي زواج القاصرات والقضية دي عمرها ما طرحت قبل ذلك في الدراما ، اه كانوا بيتكلموا عنها في الميديا انه ماينفعش وغلط لكن مكنش فيه حد بياخذ خطوة انه يحسن من الوضع او يقدم المشكلة في مسلسل او سينما ، فاتعرض عليا الاسكريبت في الدور ده وكنت مبسوطة جدا انه اخراج ا/ مجدي ابو عميرة وانا بحترمه جدا وبحبه وجلست انا وماما نقرأ الاسكريبت عشان نشوف الدور مناسب ولا ، مؤثر ولا لأ في العمل فقرأنا حوالي اول خمس حلقات واتخضينا جدا وكنا هنرفض
- لماذا كنت سترفضين المسلسل بعدما قرأت اول 5 حلقات ؟
اول حلقة كانت جريئة جدا واثرت في الناس اوي لدرجة الناس ماستحملتش وقالوا المسلسل كله كدة واحنا مش هنتفرج ولا هنفرج ولادنا لكن اللي تابع المسلسل حتى الحلقة 30 متهيألي عرف كويس قوي ان دي قضية وان هو من الاول كان لازم يفرج ولاده عليها علشان يعرفوا ان ده غلط ويحصل لهم توعية لكن فيه ناس كتير شاهدوا المسلسل واشمئزوا ، الاشمئزاز ده حصل عشان هما وصلت لهم الرسالة ان دي حاجة غلط ، فساعتها بابا اعترض على الدور عشان هيبقى دور زوجة وهتلبس قمصان نوم لكن لما كملنا قراءة الاسكريبت لقينا مفيش مشاهد قمصان نوم والحاجات دي خالص وده اللي حصل فمثلا اقصر حاجة لبستها كانت قمصان بنص كوم
- اكيد لان البيئة صعيدية ، فطبيعة اللبس محتشم ؟
وكمان ا/ مجدي مستحيل يخدش حيائنا كممثلين او كجمهور عشان احنا في الاول وفي الاخر اطفال لسه فيه حاجات منعرفهاش
- بعدما اصبحت نموذج للاعمال العائلية ، الان بعد عمل للكبار فقط ما هو شعورك لعدم مشاهدة الاطفال لكي ؟
على فكرة كلمة للكبار فقط دي مكنتش موجودة في اول حلقة لكن لما حصل الصدمة والناس علقت على تويتر والفيس بوك وان ده حاجة فظيعة راحوا بعد كدة عدلوا التتر وكتبوا للكبار فقط عشان يريحوا الناس
- عبارة للكبار فقط هل افادت المسلسل ام ضرته ؟
ولا فادته ولا ضرته لانها معملتش فرق لكن هي بس حددت عمر الجمهور اللي قعد يتفرج وهما الكبار بس لكن انا مش شايفة ان كان فيها حاجة تكسف مكنش فيه مثلا مشاهد في غرف نوم لان ا/ مجدي وا/ سماح الحريري – المؤلفة – كانوا عارفين ان المسلسل ده هيمثلوا اطفال ، فالزوجة دي في الاول والاخر هي طفلة فمينفعش تعمل حاجة هي مش فهماها او مش مدركاها ، فكلمة للكبار فقط دي … ؟؟ المسلسل مفهوش حاجة تكسف خالص ، بالعكس
- نحن نتحدث عن المسلسل اكثر لانه استحوذ على نجاح كبير في رمضان وخاصة وهو بطولة مجموعة لم تبلغ سن المراهقة بعد ، فكيف كانت العلاقة بينك وبين باقي مجموعة القاصرات ؟
انا كنت مع : ملك زاهر وحنان عادل ومي الغيطي ، والحاجات اللي كتبوها في الجرائد ان (منة) بتغير من ملك ، و (ملك) بتحقد على منة ، طب احنا هنحقد على بعض ليه احنا في الاول وفي الاخر اخوات وبعدين كل ممثل له الكاراكتر بتاعه فانا ماينفعش اعمل الادوار الي بتعملها ملك ولا ملك تنفعل تعمل ادواري لاني اكبر من ملك وهي اصغر مني فهي ممكن تعمل دور طفلة اوي ، وانا كنت مبسوطة جدا واحنا بنشتغل مع بعض لان لما بيكون في العمل حد في سنك بنعقد نلعب ونهزر مع بعض بنبقى فاهمين بعض وكل واحد فينا كان بيدي نصائح للتاني وبيصلح له فكان عمل حلو اوي اتبسط بيه
- اعتقد ان اصعب مشهد لكي هو مشهد القتل ، احكي لي عنه ؟
هما مشهدين ، القتل ده كان في اخر حلقة وكان صعب علينا كلنا وكان فيه مشهد في الحلقة 16 لما (رباب) ماتت اللي كانت قايمة بدروها ملك – بعد الشر عليها – فـ (امينة) – اللي هي انا – من كتر حبها في صاحبتها رباب مش متخيلة انها ممكن تسيبها في يوم من الايام وبعدين رباب كانت على طول مسانداها في البيت ومن ساعة ماتجوزها وهما على طول مع بعض بيقشروا ثوم مع بعض برغم من انهم ضرائر لكنهم اطفال عايزين يلعبوا مش فاهمين ، فهما المفروض في الصعيد لما بنخرج من البيت عشان نجيب حاجة ونرجع بنلبس جلابية وعباية وطرحة كذا حاجة يعني فهي من كتر الصدمة خرجت تجري في الشارع بلبس البيت حافية وبتفضل تصوت والناس بتتفرج عليها فكان مشهد صعب جدا وتأثرت به جدا لاني حطيت نفسي مكانها لو فقدت صديقة وحبيبة لي
- ما الرسالة التي تبعثيها لكل الاباء الذين يزوجوا فتياتهم وهم قصر ؟
الموضوع كله بيرجع للاب والام هل متعلمين كويس ولا لأ ، لانهم لو متعلمين كويس اكيد هيعرفوا ان ده غلط على البنت وعلى نفسيتها وعلى المجتمع لكن فيه ناس بسطاء جدا مش مدركين ان ده ممكن يبقى ضرر ليها ، فعايزة اقول لهم ان هذا خطأ فادح فبدلا من وضع رؤسكم بالتراب وتقولون لن افرج بنتي على المسلسل فبالعكس المفروض تتفرج عشان تعرف ان ده غلط وبعد كدة لما باباها يقولها انت هتتجوزي وانت صغيرة فتقولوا لأ عشان انا مش عايزة يحصلي زي اللي حصل لرباب ، فالمسلسل بيعلم الصغير قبل الكبير
- المصادفة ايضا ان فيلم (تتح) تزوجت به وانت صغيرة ؟
ده كان فلاحي وده كان صعيدي بس هي صدفة اني وانا بصور المسلسل اتعرض عليا الفيلم فقلت لماما لا ده هيبقى نفس القصة وهطلع بنفس الشخصية مرتين فقالت لي فيه شباب مابحبوش يتفرجوا على المسلسلات وبيبقوا عايزين يدخلوا السينما ، فنجبر الناس في كل حتة يشوفوا دورك ده
- ظهورك بفستان الفرح وانتشار الصور على الانترنت واعتقادهم انك مازلت طفلة ، كيف كان رد فعل الناس عليه ؟
هي الصورة الوحيدة اللي نزلت ، المدرسة بتاعتي كانت عاملة حفل تخرج لستة ابتدائي فكانت فيه مجموعة فقرات فكان فيه ديفليه وفقرة غناء واستعراضات ، فكان من ضمن الديفيله كان كل واحدة بتلبس ازياء مختلفة رياضية و سواريه وواحدة بتقدم فستان الفرح ، فالـ ميس اللي منظمة برنامج الحفل اختارتني انا عشان البس فستان الفرح وعملت لي ميك اب وشعر فانا واصحابي اتصورنا ونزلنا صورنا على النت فالناس افتكرت اني اتجوزت
- يمكن اعتبارها اول اشاعة بحياتك ؟
يمكن اه هي و موضوع الغيرة من (ملك) لكن طبعا ده كلام فارغ دول اخواتي
- لو رجعنا للبداية واول عمل لكي وهو مسلسل (السندريلا) وتقديمك لشخصية الراحلة / سعاد حسني وهي صغيرة ، اكيد كانت مسئولية كبيرة ؟
انا من صغري بحب (سعاد حسني) فمن وانا صغيرة بحب مجال التمثيل واللي دخلني في الاول كانت الاعلانات وانت عارف ان في مجال الاعلانات بطلة الاعلان هي الهيرو فكنت معروفة بس في مجال الاعلانات وعرفت ان فيه كاستنيج لمسلسل (السندريلا) اخراج / سمير سيف فرحت انا ومامتي ، وانا كنت معروفة كان وشي معروف بس للناس اللي جوة المجال ولما رحت لقيت بنات كتير جدا وبالفعل دخلت قابلت ا/ سمير وقعد يتكلم ويهزر معايا وشاف اني لبقة شوية و شقية فاختارني للدور ، وانا في المسلسل كان طبعا معايا (منى زكي) كانت عاملة السندريلا وهي كبيرة فاحمد حلمي كان طالب بنت لمطب صناعي فهي رشحتني له وانا كنت عاملة حلقة في سيت كوم (تامر وشوقية) كان اخراج / شريف عرفة فهو كمان رشحني لاحمد حلمي في الفيلم فدخلت عملت الفيلم والحمد لله اشتهرت وبعد كدة الاعمال بقت تيجي ورا بعض
- ماذا عن مشهد الغرق في حمام السباحة في فيلم (مطب صناعي) ؟
اكثرية الناس ماتعرفش اني لما عملت المشهد ده فعلا مكنتش بعرف اعوم ساعتها – اه والله – والبيسين كان غويط وانا عقدت اغرق وسابوني ، فاكرين اني بمثل وكانوا عايزين ياخدوا الشمس ومستعجلين فالمخرج قالي يا منة انزلي هتنطي في البيسين وتعملي نفسك بتغرقي وتقعدي تضبشي ولما نزلت كلهم عمالين يسقفولي واحمد حلمي هينزل ينقذك وكدة فقلت طيب كنت فاكراه طولي ، فنزلت وكان باين عليا اني بغرق
- كان غرق حقيقي !!
اه ، وهو واقف برة وانا بفرفر وبموت في المية ومدير الاضاءة عمال يظبط وقفة حلمي وانا بغرق فقاله يا عم البنت بتغرق وراح نط وانقذني فدي كانت اول مرة فلما طلعت كانوا عايزين يعيدوها تاني فانا قلت لالالالا
- وماذا عن موقف والدتك ؟
ماما هي اللي زقتني تاني مرة في البيسن – والله – كانت مستغنية عني لانها عارفة اننا لو ملحناش الشمس النهاردة هنظطر نعيد تاني بكرة
- ربما كانت فرصة لكي تتعلمي السباحة ؟
هههههه اتعلم ايه بس انا كنت بموت
- سيت كوم (راجل وست ستات) والنجاح الاكبر ودور بطولة ومؤثر في الاحداث اليومية ، نقدر نقول من الجلدة للجلدة ؟
طبعا الفضل كله يرجع لربنا ولـ ا/ اسد فولادكار – المخرج – هو بيحبني جدا وانا بحبه جدا والمسلسل ده دخل كل بيت مصري ، وخصوصا المسلسلات بتكون اهم حاجة في رمضان بجانب الصوم والصلاة وهو كان بعد (مطب صناعي) بس شهرني اكثر بكتير وعرف الناس عليا وعمل معايا فرق كبير ونقلة ونجومية ليا لان مطب صناعي قعد شوية في السينما واتشال ونزل غيره لكن الناس كلها مكنتش عرفتني لكن السيت كوم عملي انتشار اكبر وزود من نجوميتي
- كيف كان التعامل مع النجم / اشرف عبد الباقي وما هي اطرف المواقف اثناء التصوير ؟
كنا دائما بنعمل مقالب في بعض بس عمو / اشرف بحبه جدا جدا وهو انسان محترم جدا وكل سنة كان بيعملي عيد ميلادي في الاستوديو وكان مدلعني جدا عمري ما ادلعت كدة في عمل وكان بينصحني ويقولي اعمل ايه في المشهد عشان الناس تضحك وانا بضحك عليه وابوظ لهم المشهد ، استمر النصوير حوالي ثلاث اربع سنين في 8 اجزاء فده كتير جدا كل يوم بنشوف بعض نفس الناس خدنا على جو وطريقة تعامل ، وانا بعد كدة لما عرفت ان مفيش راجل وست ستات زعلت جدا
- هل اثر عليك انسحاب النجم / سامح حسين من السيت كوم ؟
اه طبعا زعلت جدا ، هو شخصية ظريفة جدا ومحترم جدا ، كان بيحب كل الناس والناس كلها كانت بتحبه ، انا مش عارفة ايه اللي خلاه يمشي ، وانا اشتغلت معاه بعد كدة اعلانات شيبس كانت حملة قاعدت حوالي سنتين وكنا بنهزر وبنلعب فمكنتش بعتبر ده شغل سواء في الاعلان او السيت كوم لانه كان بالنسبة لي فسحة مش تصوير او شغل لاني مكنتش بروح اقعد احفظ واعمل شعري وكدة لأ لو الناس تلاحظ انا فكة شعري كأني في بيتي لبسة البيجاما بتاعت بيتي
- بطبيعتك ؟
اه
- فيلم (القشاش) احدث اعمالك السينمائية ، احكي لنا عنه ؟
هو نزل في العيد ، من اخراج / اسنماعيل فاروق ، بطولة : حورية فرغلي ومحمد فراج ، انا خلصت التصوير فيه من شهرين وكان دوري حلو اوي اول مرة اعمله طالعة فيه محجبة ، بنت راجل متعصب دينيا جدا ودائما بتضرب فكانت حياتي مأسوية جدا كلها عياط ولطم وصويت والناس هتكرهني والمفروض اختي هي صاحبة (حورية) وهي بتبقى حامل وبتموت وهي بتولد وانا بزعل عليها جدا وافضل اعيط والفيلم كل اللي فيه ضيوف شرف ماعدا حورية وفراج فانا كنت ضيفة شرف
- اكيد احلى ضيفة شرف في الفيلم ؟
ربنا يخليك ميرسي لذوقك
- من وحي الفيلم والاب المتشدد ، كيف تري المشهد الجاري في مصر الان ؟
انا مابحبش اتكلم في السياسة لكن انا طبعا مع ثورة 30 يونيو وتسلم ايادي جيشنا طبعا اللي وقف مع الشعب ضد الارهاب والتطرف ، انا كنت لسه في زيارة لمصابي الشرطة وحزينة جدا عليهم ويارب يحفظ مصر
- ما الدور الذي تودي تقديمه سواء في السينما او التلفزيون ؟
برغم كل الشخصيات الي انا قدمتها والادوار الي عملتها بس انا نفسي اعمل فوازير ، فيه ناس كتير قوي جربت انها تعمل فوازير لكنها فشلت الى حد ما ، مفيش حاجة الناس اعتبرتها زي بتاعت زمان فنفسي اعمل حاجة مختلفة الناس دايما تفتكرني بيها
