جريدة أحوال مصر
تحاول ان تطير خارج السرب و تصنع شخصية فنية مستقلة لها ، فمن دراستها للآثار تعلمت كيف تبحث وتنقب عن الكنوز فبحثت داخلها ووجدت صوتا مميزا تستطيع ان تدخل به الى اذن مستمعيها بكل سهولة لانه صافي رقيق يلمس القلوب ، تشعر وانت تسمعها براحة نفسية وخفة دم تضفي عليك نوع من البهجة انها المغنية الشابة / شيراز حسني والتي كان لنا معها هذا الحوار الصحفي :
- من هي شيراز حسني ؟
بنوتة عادية بتحب الغنا ونفسها تقدم حاجة كويسة وان شاء الله الناس تحبني وتتقبل اعمالي
- هل تعلمتي الموسيقى اكاديميا ؟
لا ، انا بعيد تماما عن مجال الموسيقى لاني دارسة اثار
- هل مارست مهنة الارشاد او الترميم ؟
لا انا لسه متخرجة قريب دفعة 2011 لسه بشوكي يعني
- متى و كيف دخلتي الى المجال الفني ؟
انا دخلت الوسط من 5 سنين ، وانا في ثانوية عامة كنت في مجال الفنون الشعبية وكنا بنقدم عرض كنت بمثل وانا برقص وده كان ملحوظ بجانب الغنا وشافني ممثل معروف وقالي انت تنفعي ممثلة حلوة اوي وكلمني كتير ان انا امثل
- نقدر نقول انك فنانة شاملة !
يعني تقدر تقول كدة ، هو ساعتها عجبته لاني بسمع الكلام وبرقص عليه وبمثله بوشي فبحس اني مش برقص ، لكن طايرة على الاستيدج – المسرح – فده كان بيلفت النظر ليا وانا حبيت الموضوع لكن لقيت نفسي بتحول للغنا اكتر وحبيت الغنا لاني كمان بكتب شعر واغاني ، وفيه اغاني انا عملتها من كلماتي ولقيت ان صوتي كويس وناس كتير شجعتني على كدة واصحابي ، فابتديت بقى اغني ودخلت مسابقات لحد ما عملت اول كليب من سنة ونص اسمه (ملكش حل ) وكنت ماضية مع شركة ( ميديا هاوس )عقد احتكار وانفصلت عنها عشان كانت عاوزاني ادخل في طريق الشعبي ، وانا كنت داخلة على اني هغني الاستايل بتاعي فبعد ما مضيت العقد طلبوا مني اغنية شعبي بس انا محستش اني هقولها كويس ، صوتي بعيد وشكلي بعيد ، وعملت الاغنية والناس حبوها ، بس مش ده اللي انا عاوزة اقوله
- لاحظت في طريقة كلامك ان لهجتك تبتعد قليلا عن المصرية ؟
فعلا لان جدتي سورية وانا كنت مقيمة برة مصر لفترة طويلة
- هل يعتبر هذا الألبوم اول ألبوماتك الاحترافية ؟
انا كان ليا اغاني قبل كدة سينجلات – اغاني منفصلة – والفترة اللي فاتت جمعتهم في ميني ألبوم ، مكنش في دماغي اني اعمله اصلا بس الحمد لله لقى قبول من الناس وحبوه ودلوقتي اتشجعت اني اعمل ألبوم كامل
- كم عدد اغاني الميني ألبوم ؟
6 اغاني
- هل يوجد من بينهم اغنية من تأليفك ؟
فيه اغنية اسمها (بلادي ) دي الوحيدة اللي كلماتي
- ماذا تقولين بها ؟
بقول : دا حقيقة ولا حلم .. في رصاص وشهيد ودم .. وام هناك بتبكي .. موجوعة وشايلة الهم
- اول كليب لكي منذ سنة ونصف ، لما لم تفكري في عمل اخر ؟
كنت ماضية في الشركة لكنهم جمدوني مكنوش عايزين يعملولي واحد تاني ، فكنت متوقفة تماما ، لا عارفة انتج لنفسي ولا الشركة عايزة تنتجلي ، لكن الحمد لله لسه فاسخة العقد من فترة قريبة وابتديت اشم نفاسي
- اصبحت حرة الان !!
اههههه ، بقيت حرة خلاص
- مع من تعاملتي من الملحنين والكتاب في الميني ألبوم ؟
اتعاملت مع ملحنين كتير بس ابرزهم الملحن / مجدي ابو عوف عشان هو عامل العدد الاكبر من الاغاني وفيه بنا كيميا حلوة ، فاهم صوتي وان شاء الله اتعامل مع ملحنين تانين
- ما هي نوعية الاغاني التي تفضلي غنائها ؟
بحب اغاني الرومانس والدراما اللي فيها قصة وطبعا المقسوم بس بحب وانا بختاره يكون فيه موضوع ، فيه فكرة مش واحد اتنين ثلاثة ، كلمات مرصوصة وخلاص
- من مثلك الاعلى في الغناء ؟
فيروز ومن مصر : ام كلثوم وفايزة احمد
- ومن الجيل الجديد ؟
انا بحب شيرين وإليسا اوي وبحب المنطقة بتاعت الغنا دي اللي فيها شوية احساس عالي وفيها مواضيع بس طبعا انا بحاول ابقى شيراز فبحاول ابعد تماما
- ما هو جديدك في الفترة المقبلة ؟
بحضر للأبوم ، ولسه مخلصة اغنية (سعادة البيه) بس هتنزل برة الألبوم وهي مقسوم رومانس وفي انتظار تصوير الكليب وفيه اغنية جديدة هتبقى مفاجأة و هي من نوعية المقسوم بتدور حول البنات والمطبخ ، ولسه مخلصة دويتو مع (رامي رفعت) بعنوان ( لخبطة ) وده هينزل في فيلم ( لخبطة ) قريبا ، والفيلم بطولة :غادة إبراهيم وانتصار وخالد محمود ومحمد متولى ومها عثمان وإخراج / عبد الله فضل.
- ما رأيك في حال الفن الان في مصر ؟
الفن دلوقتي بقى في انحدار ، اغاني هابطة وكليبات مليئة بالعري والاسفاف ، المفروض الفن يرتقى بذوق الناس مش العكس زي ما المنتجين بيقولوا الناس عايزة ده
و اثناء تواجدنا في مؤتمر حملة نورت مصر لدعم السياحة المصرية والمشروعات الصغيرة قد تقابلت الفنانة / شيراز مع مدير الانتاج / محمود سويلم والذي عرض عليها المشاركة في بطولة سيت كوم جديد بعنوان ( إلسع فلسع ) وقد رحبت بذلك ، ثم تصادف وجود المغني / ياسر عدوية مع الملحن / مجدي ابو عوف واثناء حديثي اقترحت عليهم عمل دويتو غنائي وتم الاتفاق مبدئيا على ذلك وهذا حصري لنا
يذكر ان الميني ألبوم بعنوان (حاجات شخصية ) وهو يضم مجموعة من الأغاني مثل : سيباه ، بلادي، اسجد وادعي، الحاج جمعة، وأغنية حاجات شخصية التي تحمل نفس اسم الألبوم ، والميني ألبوم من توزيع / اسلام الحسن . والحان الملحن / مجدى ابوعوف و الذي يعكف الان على تلحين اغاني باقي الألبوم لشيراز بجانب اغاني جديدة للنجم / مجد القاسم والفنانة / زهور نبيل
