( إلهام شاهين ) تكشف في ( يوم للستات ) : انه مش كل واحدة تغطي رأسها تكون بالضرورة متدينة

احتفلت اسرة فيلم (يوم للستات)  بانتهاء تصوير نصف مشاهد الفيلم في بلاتوة (نحاس) باستوديو (النيل) بحضور معظم ابطال الفيلم

الفيلم بطولة : الهام شاهين واحمد داوود ومحمود حميدة وفاروق الفيشاوي ونيللي كريم واحمد الفيشاوي واياد نصار وناهد السباعي وسماح انور وهالة صدقي والفنانة القديرة / رجاء حسين ، ميكياج / محمد عشوب ، انتاج / الهام شاهين ، تأليف / هناء عطية واخراج / كاملة ابو ذكري

تدور أحداث الفيلم  فى 7 أيام ، حيث تحاول سيدات الحصول على يوم واحد ليتحررن فيه من المجتمع ومن العادات والتقاليد، ويناقش الفيلم علاقة المرأة بالقيود العديدة المفروضة عليها من خلال خمس علاقات بين نساء ورجال تربطهما منطقة واحدة وظروف معيشية متقاربة

قبل الاحتفال اجرينا هذا الحوار الصحفي مع النجمة / نيللي كريم والتي ذكرت فيه : السيناريو كاتباه / هناء عطية واخراج / كاملة ، وده ثالث تعاون بينا بعد فيلم (واحد صفر) ومؤخرا مسلسل (ذات) واللي حقق نجاح كبير في رمضان الماضي ، وفكرة الفيلم هنا بسيطة بس في نفس الوقت تنفيذها صعب بتتكلم عن الحياة ، حياة ناس بسيطة مهمشين بشكل ما في المجتمع وقد ايه يوم معين في حياتهم بيفرق ، هو مش بيتكلم عن المرأة لكن بيتكلم عن حياة ناس رجالة وستات الحلو اللي فيها والوحش اللي فيها والدموع والفرحة وكل التفاصيل ومن ضمنها حقوق المرأة بشكل ما ، وانا لسه مخلصة مشهد بيتكلم ان كيد  الستات واكيد الستات بقى عندهم حرية عن زمان وعن اسم الفيلم قالت : هو اه اسمه (يوم للستات) بس فيه رجالة كتير زي استاذ / محمود حميدة واستاذ / فاروق الفيشاوي واياد نصار واحمد الفيشاوي ، وعن دورها قالت : انا بعمل شخصية (ليلى) هي بنت مرت بمأساة في حياتها واليوم ده بيفرق معاها وحياتها بتتغير بشكل ما لفترة قصيرة وبعد كدة بترجع لمأساة اخرى والفيلم مليئ بالاحداث والشخصيات ولا يوجد به لحظة ملل لان احنا حياتنا كدة شوية بنفرح وشوية بنحزن ، وانا بحب عموما اشتغل افلام فيها مواضيع زي (واحد صفر) و(ستة سبعة ثمانية) ، وعن جديدها قالت : مسلسل (سجن النساء) بنحضر له ، اما عن فيلم (صنع في الصين) فقالت : هو لم يعرض عليا بالاساس والاخبار المتداولة انا غير مسئولة عنها

وذكر احمد داوود : انه يجسد شخصية (ابراهيم) وهو ميكانيكي له مشاهد مع معظم ابطال الفيلم وتحديدا (ناهد السباعي) و(نيللي كريم)

وبعد انتهاء النجمة / الهام شاهين من تصوير مشهدها مع النجم / محمود حميدة ، بدأ الاحتفال وتم تقطيع التورتة واخذ صورة تذكارية مع كرو عمل الفيلم على سلم البلاتوة ، وكان لنا مع منتجة الفيلم وبطلته الفنانة /الهام شاهين هذا الحوار الصحفي والتي قالت به : انا بسجل معاك بلبس الشخصية ومكياجها وعياطها ، فيلمنا فيه ست نساء كل واحدة فيهم عندها مشكلة وكل مشكلة فيهم تعمل فيلم واكيد مفيش مشكلة لمرأة الا ومرتبطة برجل فاكيد فيه معانا ابطال رجال وعندهم قضايا مهمة جدا فاحنا طارحين قضايا المجتمع عموما ، شخصيتي معتمدة على الناس اللي بتأخذ بالمظاهر وما بيدوروش في عمق الانسان ده ايه ، فالمسألة مش مسألة مظهر مش كل حد متغطي لابس حجاب او نقاب بالضرورة يكون روحانياته عالية واخلاقه كويسة ومتدين حقيقي ومش كل اللي مش عامل ده انه يبقى العكس ، فشخصيتي بتتظلم اوي شكلها متحررة بروج احمر وانها ملفتة للنظر فالناس دائما بتحس ان فيه وراها حاجة فيه شيء يقلق ، مع انه بالعكس فيه ناس تقلق ومظهرها لا يدل على ذلك  ، لكن هي الوحيدة الصريحة والواضحة ، الفيلم مش بطولة فردية ولكنه بطولة جماعية وانا احد عشر ابطال موجودين فيه ، وعن توقعاتها لايرادات الفيلم والمنافسة في السوق عند نزوله قالت : توقعاتي اني هخسر لما ينزل السوق لانه فيلم محترم والافلام المحترمة بتخسر ومع ذلك مصرة ان السينما المصرية اللي اديتني حاجات كتير حلوة في حياتي اني انا ارد لها الجميل ، والفيلم مش هينزل قبل شهر فبراير ، وعن احوال البلد السياسية قالت :عايزين بسرعة يبقى عندنا رئيس عايزين السياحة ترجع والبلد يكون فيها استثمارات ، كفاية بقى ، لازم نفكر في بكرة ، وانا كل حاجة في الدستور الجديد موافقة عليها لاني خلاص عايزة عجلة الحياة تمشي ومعنديش حاجة اعترض عليها فيه

يذكر ان جهاز السينما قد انسحب من انتاج الفيلم بعد ان كان الانتاج مشترك بينه وبين الفنانة / الهام شاهين ، وكان من المفترض تصويره اوائل هذا العام .