جريدة أحوال مصر
اقيم اول امس حفل تكريم الفنان / حمادة هلال عن مجمل اعماله وحصوله على لقب احسن سوبر ستار في الغناء لعام 2013 من جريدة الموجز
حضر حمادة رغم مرض زوجته وتكلم مع الحضور بكل صراحة في شتى المواضيع وتحدث في البداية وقال : انا باشكركم على التكريم ده ورغم الظروف اللي الواحد فيها الا انكم اسعدتوني بجد وبالنسبة لسنة 2013 فانا بعتبر كل سنين ربنا سنين جميلة اه هي كان فيها شوية لخبطة لكن في حاجات بتجيلك بتبقى فارقة فمثلا انا في 2013 ظهوري في مسلسل (العراف) مع الزعيم / عادل امام بغنوة (تعالالي) انا بعتبرها مفاجاة وصدفة ليا وانها تحصل على احسن اغنية في 2013 في الاوديو فحسيت ان ربنا عوضني عن ألبوم (ماتقولهاش) لانه لما نزل حصل فيه مشكلة في دعايته وانا بتكلم معاكم بصراحة لانه نزل وكانت في احداث سياسية واستفتاء زي اللي كنا فيه ده وشوية لخبطة في البلد ، فانا بعتبر 2013 كان فيها صعوبات على كل الفنانين وباشكركم مرة تانية على التكريم ده
وعن موجة اغاني المهرجانات قال : مود الناس بيتغير بين اللحظة والتانية فتلاقي اغنية مكسرة الدنيا فتقول ده نموذج ممكن تشتغل عليه بشكل تاني فتلاقي الناس ذوقها اتغير بعديها بشهر ، فاغنية (تعالالي) عجبت الناس رغم كل ده وهي كتبها الشاعر/ محمد جمعة وانا لحنتها وغنيتها وتوزيع / نور وهندسة صوت / هاني محروس وانا بحاول اراعي ان الجيل اللي طالع بين 15 و18 سنة انه يحب الاغاني اللي بقدمها وانا بجتهد وباكون فرحان لما بسمع مزيكا كويسة من ناس تانية ، انا بعتبر ان اغاني المهرجانات دي ان الزمن بيعيد نفسه فيها فكان في التسعينيات كانت فيه موجة اغنية ( اى اا اى ) بتاعت (ابو الليف) بس طبعا مكنش فيه ساعتها تغيير الاصوات باوتو تيون فكان الموضوع كله انالوج ودلوقتي رجعت تاني بشكل جديد ، وعلى فكرة هما بيفهموا لانهم نجحوا يوصلوا للناس
وعن سؤاله عن تلحينه لاغنية (انا باربي) لـ مي كساب واوكا وارتيجا قال : انا عملتها بطريقة تانية وقلتهم انتوا هتغنوها بالطريقة بتاعتي والناس وافقت ، وسمعت صوتهم لقيتوا عجبني وهما بيجتهدوا لانهم بيحبوا شغلهم ، والقنوات الفضائية حققت احلام ناس كتير منهم نفسها تظهر في التلفزيون وفيه ناس بالنسبة لها ده حلم انها تظهر في التلفزيون قدام اهلها وتتفشخر ان غنوتها بتتذاع فيه على حد قوله ، بس انا شايف في الاخر انها موجة وهما لازم يستغلوها ويستفادوا منها وهي دي عادة كل فترة بتحصل حاجة وبعدين ترجع الامور لطبيعتها
اما بالنسبة للسينما فقال : انا دلوقتي شغال على فكرة (حلم العمر) الجزء الثاني بطريقة مختلفة عن الجزء الاول ووان شاء الله تعجب الناس وللامانة المنتج ممد السبكي راجل بيحب السينما والفن لكن في الاخر لازم يكسب ، اما عن نجاح اخر افلامه (مستر اند ميسز عويس) قال : الفيلم حقق ايرادات كويسة لشركة نيو سينشري رغم الظروف اللي نزل فيها وهما عرضوا عليا فيلم قريب وانا باتمنى اشتغل معاهم تاني ، بس هو غصب عني انا مش هتشتغل مع اي حد غير لما يعجبني الورق ، وكمان خلال الفترة اللي فاتت الجمهور قلقان من دخول السينما نتيجة عدم الامن غير في فترة العيد وبعدين حصل اللي حصل ، فانا باجتهد دلوقتي على فيلم كويس عشان لو حصلتله مشكلة في السينما زي ما حصل مع (حلم العمر) انه محققش ايرادات عالية وكان صدمة عمر في السينما لكن دلوقتي من احسن الافلام اللي بتكلم عليها بعد نجاحه على المستوى الجماهير لما اتذاع في القنوات فهي دي المعادلة انك تعمل ورق كويس نزلت في السينما وربنا كرمك خير وبركة ، لأ ، اديه اتحط في السي في بتاعك انه عايش بدل ماتملى السي في افلام تستعر منها
اما عن الدراما فقال : فيه ناس كتير اوي بتفتكرني بهرب من الدراما فكل ما اجي ابدأ عمل من 3 سنين اجلس واشتغل على الورق وفي الاخر اقول لأ فالناس طلعت عليا اني بهرب ، لان في الاخر التلفزيون ده انا اللي داخل للناس بيوتها مش هما اللي نازلين لي السينما وهيستحملوني لو الفيلم طلع وحش لكن في البيت لو معجبتكش من غير ريموت دلوقتي بايدك تغير القناة وانا باتمنى يارب ألاقي عمل كويس وشركة كويسة ودور كويس العبه واجتهد عليه في مسلسل يعجب الناس
وعن عدم غنائه اغنية لـ 30 يونيو قال : انا لم اقصد عدم الغناء لثورة 30يوينو لكن انا لما غنيت في 25 يناير وعملت (الله اكبر) و(شهداء 25يناير) اللي عملت ضجة كبيرة على جملة – اللي ماتوا في احداث يناير- وفيه ناس مكنتش تعرفني في العالم العربي وعرفتني بعدها وفيه ناس كانت فاكراني قاعد في البيت وعمال اعيط فكان فيه شعراء معترضين وفيه قال مفيش مشكلة تكرار الكلمة ، واحنا الفترة دي كنا مستعجلين وعايزين نحمس الناس فكان غصب عني ومكنش فيه غير (محمد منير) ساعتها الي عمل حاجة وساعتها كان كل الناس واحد في الميدان لكن دلوقتي الشعب منقسم
وعن عدم مشاركته في اوبريت تسلم الايادي قال : انا لا احب العمل في الاوبريتات ، انا راجل ممكن اكون بحب نفسي وعايز اعمل حاجة لوحدي لكن غنائي لاوبريت (اخر نفس فيا) كنا سعاتها عايزين نطلع شباب جدد انا و(خالد سليم) ، و(لطيفة) جت في الاخر بالصدفة ، وانا كنت بغني للبلد وانا غنيت للجيش (تحية للعلم المصري وللجيش المصري ) لان ده جيش بلدي ، يعني احنا هنبقى ضد جيشنا
وعن ثورة 30 يونيو انا عمري ما بعارض حد بيقول رأيه ، هو كل الناس بتحب حمادة هلال ؟ فيه وفيه ، فاللي مابيحبنيش اقوله انك عميل ؟! ، يوم 30 نزلت اغنية (تحية للعلم المصري) ومش انا للي نزلتها كمان ده (محمد جمعة) الشاعر قالي هنزلها قلت اوكيه فاحنا مش عايزين الناس تصطاد في المية العكرة لانهم في 25 قعدوا يصطادوا لفنانين يقولك ده فلول ، فاحنا بالعكس احنا في ايام بنقول يارب تعدي على خير وفيه شباب كتير معارضة للي بيحصل ولازم نحترم رأيها وهي دي الديمقراطية واحنا بنحترم الاستفتاء وبنحترم كلمة نعم واهم حاجة الناس كلها تعيش وتستقر يارب
وعن نزوله الاستفتاء قال : في خبر نزل قبل الاستفتاء اني نازل اقول نعم وانا بحترم كل واحد يقول نعم او لا لكن مافرضش عليه حاجة ، فلو رجعنا للاستفتاء اللي قبل اللي فات الناس كانت تقولك ماتقولش ماتوجهش حد ، ليه دلوقتي بيعملوا العكس ؟ لازم الناس هي اللي تقرأ وتختار ، فسواء نعم او لا دي حاجة شخصية واللي عايزه ربنا هيكون ، وانا راجل مليش في السياسة لان لما باتكلم في السياسة باتعور انا بشوف شباب اصغر مني وبيكونوا مثقفين وفاهمين عني في السياسة لكن انا طلعت مابحبش غير فني واني اغني وعمري ماكنت بحب انضم للسياسين او احضر حفلاتهم عشان اتقرب منهم لاني بحب شغلي وهو ده الي هيدخلني لقلوب الناس مش الواسطة
وفي ختام الحفل سلم الزميل الصحفي / محمد رضا – فرعون – درع التكريم للنجم / حمادة هلال ، وتم اخذ صور تذكارية له مع الحضور ، وفي ختام كلمته بعث برسالة لكل المصريين في 2014 وهي : يارب يوحد الناس كلها والناس تحب بعض وتكون ايد واحدة وتستحمل بعض وتسمع لرأي بعض وتحترمه لانه مش عدو ، انت تبع فلان لأ انت تبع علان ، لازم نسمع بعض من تاني
