جريدة أحوال مصر
– اسمك وسنك وعنوانك
* اسمي مصري وسنِّي سبع آلاف سنة وعنواني مصر .
– قول والله العظيم أشهد بالحق .
* إشمعنى انا اللي هقول الحق ياسعادة البيه ؟
– لإنك جاي تشهد بالحق .
* و بعد كلامي فيه حاجة هتتغير ؟
– مش شغلك . إنت عارف تهمتك إيه ؟
* قالولي السبب كتابي ” إنهيار الأمم ” .
– كويس إنك عارف ، جاوب كيف تنهار الأمم ؟
* تنهار الأمم بتدمير الشباب .
– وكيف يتم تدمير الشباب ؟
* بإفساد أخلاقه
– أيوه ، إزااي ؟
* لما ينشغل الأب والأم اللي محتاجين تربية أساساً بحياتهم الخاصة ومش عارفين يربَّوا أولادهم ، ده غير إن دور المدرسة في التربية تقريبا اختفى .
– وإيه تاني يافيلسوف ؟
* برامج ودراما التليفزيون والسينما ياباشا .
– انت ناسي إن فيه رقابة فنية على الأفلام والمسلسلات ؟
* لا يافندم . بس الرقابة ” حِنَيِّنَة ” لما بيتعرض عليها فيلم أو مسلسل متكلَّف ملايين قلبها بِيرِقْ و بيصْعَب عليها المنتج فتوافق له على العرض .
– وهل توافق الرقابة على عرض إسفاف وتحريض على العنف والعري وإدمان المخدرات ؟
* لا يافندم ، لكن بعض المنتجين بيعرضوا على الرقابة نسخة محذوف منها المشاهد الممنوعة .
– ولماذا لا توقف وزارة الاعلام إستمرار العرض؟
* معرفش سيادتك إن فيه وزارة إعلام .
– وأين الأزهر ؟
* في شارع الأزهر يابيه
– إنت هتهزر ، أين شيوخٌه وعلماؤه .
* أظن خايفين يتهموهم بكَبت الحرِّيات ومحاربة الإبداع .
– مين اللي هيتهموهم ؟
* اللي عايزين يدمَّروا مصر اللي بيطالبوها بحقوق الانسان وهم في بلادهم ماشيين بكيفهم ، ده غير شيوخ السبَّوبة هيطلع منهم اللي يقول ياجماعة ماتضيقوش على الناس و بحبحوها شوية .
– إيه دي اللي يبحبحوها ؟
* الجاكتة سيادتك .
– جاكتة إيه يا أخينا . لتاني مرة بأحذَّرك . إتكلم كويس إنت باين عليك مُتعِب وغَلَباوي .
* لا يافندم أنا مواطن خايف على أولادي و أحفادي وعلى البلد كلها .
– لا إطمئن البلد بخير وهتفضل بخير .
– يارب يا بيه .
– هل لديك أقوال أخرى ؟
* أيوه ، عايز أقول إن أنا وغيري بنكتب ونتكلم من سنين وزودنا الكلام بعد الهوجة إياها . نُحَذِّر ونترجَّى أهل (العفن) يراعوا الشباب العاطل اللي أي عمل إجرامي على الشاشة بيُحَفِّزه ويُحَوِّله لإنسان عُدواني ، يُقلِّد (عبده مُوتَه واللي مالوش كبير) وأبطال الأفلام اللي كلها خيانة زوجية وإدمان وفيها البلطجي وتاجر المخدرات بيطلعوا فرسان وقدوة للشباب ، دراما بتغِّيرالشاب الفقير المسالم إلى مجرم حاقِد على أصحاب القصور أم حَمَّامات سِباحة وكِلاب حِراسة ، باختصار الشاب هيفقد إنتماؤه للبلد و مش هيكون قلبه عليها . لذلك بنقول لكل أفَّاقين الفَن الرَّدئ خدوا بالكم ، الأطفال بيقلدوكم ، وخَرَبتوا عقول جيل كامل .
– من غير شتيمة .
– حاضر ، بس أعمل إيه المَرارة مفقوعة منهم ، ربنا يُستُر على البلد من صُنَّاع البلطجة والإرهاب خريجي “مدرسة المشاغبين ” وناظرها ” الهلفوت ” .
– كفاية ، عندك حاجة تانية عايز تقولها ؟
* عندي أمْنِيَة أو سَمِّيها صَرخَة مواطن موجوع . أرجو من السيد الرئيس إنه يأمر بتشكيل لجنة من علماء الإجتماع ورجال الدين وأهل القانون لإعداد تقريرعن البرامج والمسلسلات والأفلام اللي هتتعرض في شهر رمضان والعيد ، ويقوموا بزيارات مفاجئة للمدارس الحكوميِّة ويتجَوَّلوا في الشوارع يراقبوا أخلاق الناس وبناء على التقرير يتحاكم من يُظْهِر المصريين في أسوأ حالة ويساعد في نشر الإنحلال والفساد من خلال عمل فني قذر أو ..
– بَس بَس إنت طِلِعتلْنا منين . إتفضل رَوَّح مع السلامة .
* ماشي يا فندم ، السلام عليكم .
الكاتب الصحفي - عبدالسلام بدر
