بالصور .. أبطال “المرافعة” يدلون بشهاداتهم للتاريخ ، والحكم بعد المشاهدة !!

اقيم امس لقاء صحفي لمجموعة من فريق عمل مسلسل “المرافعة ” بحضور الفنانين : تامر عبد المنعم ، دينا ،دوللي شاهين ، نرمين ماهر ، عماد زيادة ، شادي شامل ، طارق والي ، والمنتج / وائل ابو حسين ، وابنتي الفنان / تامر عبد المنعم
وقد احتفل الجميع بنجاح المسلسل وتحدثوا عن ردود الفعل عليه وكواليس التصوير  وكيف تحقق النجاح بتضافر كافة جهود العاملين به من : ممثلين وكاست اخراج وكاست انتاج على مدار سنة من العمل الدؤوب
مسلسل “المرافعة” تدور احداثه في إطار سياسي تشويقي، عن رجل أعمال فاسد ، مشهور بعلاقاته النسائية المتعددة، رغم اعتراض زوجته وعلمها بالأمر كله، حتى يتزوج من فنانة مغمورة ، لكنها تُقتل، ليتم اتهامه بقتلها مع آخرين، حتى يتم التوصل في النهاية إلى القاتل الحقيقي . فـ “باسم” أمر و”تامر” نفذ والجريمة حدثت والكاست شهد و”فاروق” دافع عنهما في “المرافعة” والحكم سيصدر بعد المشاهدة ؟!
المسلسل بطولة : فاروق الفيشاوى ،باسم ياخور ،شيرين رضا ،دينا ،دوللي شاهين ،طلعت زكريا  ،أحمد راتب ،منة جلال ،عمر حسن يوسف ،عماد زيادة ،نرمين ماهر ،دينا الجارحي ،نيفين محمد ،الهام عبد البديع ،احمد عبد الوارث ، كريم كوجاك ، شادي شامل ، مجدي عبد الوهاب ،والكويتي / عبد الامام عبد الله ، ومحسن محى الدين – بعد عودته – مع الفنانة القديرة / سميحة ايوب ، انتاج : تامر مرسي ومدينة الانتاج الاعلامي واحمد لطفي وتامر عبد المنعم ووائل ابو حسين وسمير يوسف ، ومن تأليف / تامر عبد المنعم واخراج / عمر الشيخ

وقد اعترف كلا من صناع المسلسل بفعلتهم وشهدوا بالاتي سواء من حضر او الذين تغيبوا ، فقد وصلنا اليهم وشهدوا بالاتي :
الشاهدة الاولى : دينا : انا في “المرافعة” بجسد شخصية الزوجة الثانية لـ “جمال ابو الوفا” اسمها “نادية ” وهي رومانسية اوي وعندها صراعات نفسية بينها وبين نفسها و”تامر عبد المنعم” كاتب ورق حلو اوي رغم انه كاتب مشهد اتضربت فيه بالقلم بس الدور حلو اوي والشخصية كانت صعبة بالنسبة ليا لان خبرتها مش موجودة عندي لانها محرومة من الخلفة ومقهورة وضعيفة وده مش انا ، والحمد الله رد الفعل من اصدقائي على الدور اني اديته بشكل جيد واني اثبت اني ممثلة كويسة ، وعن “باسم ياخور” قالت : هو كان مركز اوي انه مايغلطش في اللهجة وهو ممثل متعاون جدا ومواعيده كويسة جدا وقالي لو حسيتي ان فيه كلمة فارقة في اللهجة قوليلي والمخرج / عمر الشيخ كان مركز جدا معاه ، ولما يبقى الورق كويس كل حاجة بعد كدة بتزود من نجاح المسلسل ، وعن مسلسلات رمضان التي تشاهدها قالت : “سجن النسا” فـ “نيللي كريم” ممثلة على حق ، كويسة اوي وتقدر دلوقتي تعمل اي دور ومسلسل “عد تنازلي” كندة علوش وعمرو يوسف رائعين ، وعن جديدها قالت : انا بقرأ 3 افلام ولو وافقت على حاجة منهم هيتعرض على العيد الكبير ان شاء الله ، اما في التلفزيون ففي مسلسل “الضاهر” من تأليف / تامر عبد المنعم فيه دور مختلف تماما اتمنى اني اعمله وهي من اسرة مصرية من اسر المسلسل
ورغم انها المجي عليها الا انها كتبت في وصيتها : دوللي شاهين : انا بلعب دور مغنية مغمورة بيتم قتلها نتيجة مشاكل كثيرة ، وردود الفعل على المسلسل كل يوم احلى من اليوم اللي قابله ورغم ان جريمة القتل حدثت في البداية الا ان الناس حابة تعرف ايه اللي حصل وادى الى قتلها ، وحتى الان انا لم اشبع طموحي كفنانة لاني باعتبر نفسي لسه في البداية رغم  كل الاعمال اللي عملتها لاني لسه عايزة اثبت لنفسي اني ممثلة ، يمكن خلال الخمس سنين القادمة احقق ده ، وعن جديدها قالت : الالبوم الجديد هينزل على العيد وهو فيه 14 اغنية وهو متنوع بين اكثر من لهجة ولغة ففيه اغاني : مصري ولبناني وخليجي وعراقي ، وفرنساوي وانجليزي ، وهو متنوع ايضا في نوعية المزيكا ففي اغاني : استايل وتكنو وسلو وفيه شعبي طربي والدبكة اللبناني ، وانا بحب التنوع ده لان الفنان هو اللي يقدر يقدم كل حاجة سواء في الغناء او التمثيل ، وعن المسلسلات التي تتابعها في رمضان قالت : مسلسل “عد تنازلي”
الشاهدة الثانية : نيفين محمد : “المرافعة” واحد من اقوى المسلسلات المعروضة في رمضان والحمد لله ردود الفعل حلوة اوي عليه وانا باشكر استاذ / عمر الشيخ واستاذ / تامر عبد المنعم على ترشيحهما ليا في العمل ، وانا بلعب شخصية فيها تحول ففي الاول كانت هادئة وسمعت كلام والدها وارتدت الحجاب مجبرة وبعدما تزوج غير امها قررت انها تتمرد وتخلع الحجاب وبعدين حدثت علاقة حب بينها وبين “اشرف” الذي يلعبه استاذ / تامر عبد المنعم ، وتابعوا بقى التطورات اللي هتحصل لغاية الاخر ، وعن جديدها قالت : انا لسه مخلصة دوري من اسبوع  ومحتاجة اخد اجازة الفترة الجاية وبعدين اشوف الجديد

الشاهدة الثالثة : نرمين ماهر : انا بلعب دور “سالي” هي بنت مستواها المادي ضعيف جدا فعندها الرغبة في الصعود لمستوى اعلى وعندها تطلعات جامدة اوي وان تحصل على المال باي طريقة مهما كانت ، وصوليين ، وبتحب ابن باسم ياخور ولكنه يرفضها، فتقلب العائلة على بعضهم حتى تتزوج من عمه اخو باسم “محسن محي الدين ” وهو رجل محافظ فتترك الفن وتتحجب من اجله ، بالاضافة الى ذلك فهي تشارك ايضا فى رمضان في مسلسل “ابو هيبة في جبل الحلال “مع الساحر / محمود عبد العزيز ، كما تنتظر “نيرمين” عرض أحدث افلامها السينمائية وهو “واحد صعيدى” مع النجم / محمد رمضان والذى تقدم من حلاله شخصية “هبة” الفتاه البسيطه والتى تعمل باحد الفنادق وتقع في مشكله ويساعدها محمد “رضا” في حلها و من المقرر عرض الفيلم مطلع اغسطس المقبل
الشاهد الرابع : عماد زيادة : انا بلعب دور “زكريا ” ودي اول مرة ألعب دور شرير ويارب الناس متكونش كرهتني فيه وهو الذارع الايمن للشيخ العراقي الذي ينافس “باسم ياخور” ، وانا بكون المحرك في كل المشاكل اللي بيعملها الكيان الخليجي في مصر والعراق

الشاهد الخامس : شادي شامل : انا بلعب شخصية “مروان” ابن “باسم ياخور” وهو صاحب محطة فضائية ورجل أعمال شهير ويقع في حب فتاة فقيرة اسمها “سالى” التى تجسدها “نيرمين ماهر”، ويكتشف خيانتها له من خلال مشاهدة فيديو فاضح مصور لها أعطاه له والده ، فيضربها ويقطع علاقته معها. وانا باظهر بشكل مختلف تماما  وذلك لقيامي بتحويل شكلي إلي بطل كمال أجسام عن طريق الرياضة والمكملات الغذائية ، وأشار شادي إلي سعيه لفتح مساحة جديدة له بعدما سبب مسلسل “العندليب” تضييقا له في الأدوار السينمائية مع الجمهور ومع المنتجين . وتمني شادي بأن يعود مرة أخرى لعالم الغناء ولكن ظروف الثورة وحال البلد جعله يؤجل هذا المشروع مستقبلا ، وعن اسباب غيابة الفترة الماضية عن الساحة الفنية قال : يعود ذلك الى ظروف شخصية لزواجي وسفري الى  دبى.
الشاهدة السادسة : شيرين رضا : “تامر عبد المنعم” عرض عليا المسلسل وانا وافقت ، وانا عاملة في المسلسل دور “جليلة” وهي مرات “باسم ياخور” فهي زوجة وام لولدين ومحجبة ومغلوبة على امرها وقاعدة في البيت وده دور جديد عليا وهي متزوجة منه من 25 سنة ، وعن جديدها قالت : انا مخلصة فيلم “الفيل الازرق” من السنة اللي فاتت والمفترض عرضه في عيد الفطر المبارك وانا بلعب فيه دور “ديجا ” رسامة التاتو

الشاهدة السابعة : منة جلال : انا بلعب شخصية ” فاطمة ابو الوفا ” الاخت الوسطى لباسم ياخور واستاذ/ محسن محي الدين ، وهي شخصية معقدة ومتسلطة واخدة قوتها من اخوها “جمال ابو الوفا ” باسم ياخور ” وعندها ولد ودي اول مرة اطلع ام في الدراما وباشكر استاذ / تامرعبد المنعم انه وثق فيا وانه اداني دور بهذا الشكل والحجم لانه غيرني 90 درجة فهو دور جديد عليا وخايفة من رد فعل الناس اللي بيشفوني دلوقتي

الشاهدة الثامنة : دينا الجارحي : انا دوري في المسلسل طالعة موديل اسمي “شاهندة” ،احنا المفروض من عائلة بسيطة من منطقة شعبية بس شكلنا ولبسنا بيختلف عن المكان اللي احنا ساكنين فيه لاننا بنحاول نجيب الفلوس باي طريقة حتى لو كانت غير شرعية لظروفنا المادية بعد وفاة والدنا وانا عايشة انا واختي وامي ،وانا بحلم بالتمثيل واختى واخدة فرص كتير اوي انا مش عارفة اخدها ، لكن اختي لما هتتزوج حد من المناصب العليا فانا هبتدي احقد عليها لانها خلاص اتجوزت والمفروض اخد فرصتي انا كمان في شغلي على الاقل اللي كان بيجي لها ،واختي في المسلسل هي “نرمين ماهر”

الشاهدة التاسعة : الهام عبد البديع : انا عاملة دور “شيرين” وهي طالبة في الجامعة الامريكية بنت استاذ / احمد راتب ، وهي بتحب زميلها في الكلية وهوابن “باسم ياخور” اللي هو “عمر حسن يوسف” وبيحاول يخطبني بس بيحصل مشاكل نتيجة توجهات بابا السياسية وامي المذيعة ، فوالده بيرفض ، بالاضافة لذلك انا طالعة بدور بنت اشرف عبد الباقي في سيت كوم “انا وبابا وماما ” ويارب اكون خفيفة عليكم في رمضان

الشاهد العاشر : كريم كوجاك : مسلسل “المرافعة” مسلسل مختلف مكتوب بحرفية عالية ، عنصر التشويق في الورق اللي كاتبه “تامر عبد المنعم” كان مفاجأة للجمهور وانا بلعب شخصية “ياسر”وهو الذارع الايمن لجمال ابو الوفا وهو شخصية شريرة لكن من النوع الغير صريح فشره بين السطور ، بالاضافة الى ذلك فانا بلعب شخصية رئيس تحرير متسلط على طليقته في مسلسل “ابن حلال” مع محمد رمضان وريهام سعيد ، ويارب اكون عند حسن ظنكم
واخيرا اعترف بطل ومؤلف ومنتج المسلسل الفنان المتهم / تامر عبد المنعم بالاتي : كممثل : انا بلعب شخصية “اشرف” وهو ظابط امن سابق وهو الذراع الامني لرجل الاعمال “جمال ابو الوفا” سواء في مصر او في العراق يتخلل شغله مواقف كتيرة من جريمة القتل اللي هي جزء من احداث المسلسل ، وكمؤلف : المسلسل ده انا كاتبه من سنة  2010 وانتهيت من اخر مشهد فيه في مايو 2014 وانا بصور وانا كان معايا 22 حلقة وكنا هنصور في 2012 والحمد لله انه اتأجل ودخلناه 2013 وخلصنا وعرضنا في 2014 فانا حاولت على اد ما اقدر اني ارصد كل ما حدث في 2010 تمهيدا لاحداث 2011 سواء اخطاء او كواليس وده هيبان في الحلقات القادمة نتيجة دخول الاخوان وعلاقة امن الدولة بهم و الحركات زي 6 ابريل لان النشطاء دول حكموا البلد سنة والاخوان حكموا سنة ، والحمد لله ربنا رجع البلد تاني لاهلها فانا استفدت كمؤلف من التأجيل اني شفت المشهد احسن ولسه هنشوف اكتر ،فانا لم اتوقع للحظة ان واحد زي “حسني مبارك” يتنصف على حياة عينه فالناس بقت تقول احنا عايزين نعيش زي مكنا ايام مبارك فحقه رجع له ، وبالفعل كان هناك اخطاء في الحزب الوطني ، وانا مع إن “جمال مبارك” عقلية اقتصادية فظيعة وسوزان مبارك عملت للثقافة المصرية اللي ماحدش عمله وفاروق حسني اهم زير ثقافة جه حتى هذه اللحظة ، وانه كان فيه فساد ودلوقتي لسه فيه فساد ،كانوا بيقولولك ان مبارك واخد فلوس البلد اهو مبارك مشي فين الفلوس ؟ وانا في المسلسل مخبط في “احمد عز” وقايم بدوره “محمد مرزبان ” فبرضوا مشي طب ايه مازالت البلد كما هي ودخلها كما هو ، اذاً ليس في الامكان افضل مما كان ، احنا عايزين نرجع تاني لـ 24 يناير وده هدفهم في الحكومة ، انا كنت ضد مجئ السيد/ جمال مبارك رئيسا لمصر ، عيب انه يجي  لان دي مصر مش الدوحة ، وحتى تعامل “حسني مبارك” مع “ايمن نور” و”البرادعي” كان صح واحنا مكناش واخدين بالنا ، ايه المشكلة لما كان يمشي في شهر سبتمبر ويجي رجل دولة زي : السيسي او طنطاوي او عمر سليمان او شفيق او عمرو موسى ، مع ان “جمال مبارك” كان افضل من 13 مرشح اللي نزلوا الانتخابات مع ان انا  كنت مناصر لشفيق ، والكلام انه هو وعلاء اهدروا المال العام وحبيب العادلي ده كلام فارغ ، واحد زي حبيب بياخد 2 مليون لانه لازم تملئ عينه عشام مايخونكش ، هيغسل اموال باربعة مليون طب ازاي!! وبعد اربع سنين لو خرجوا و مش عليهم  حاجة وحب ينزلوا الانتخابات ينزلوا ، وانا بعتب على الاحزاب الجديدة بيتبرأوا من الحزب الوطني ، طب ما تقولوا انتوا الحزب الوطني الجديد مهو كان فيه شرفاء ، فالمفروض اللي يتمنعوا الاخوان لانهم خونة هما اللي عملوا الثورة وفتحوا السجون ولبسوها لحبيب العادلي ، وشباب الثوار اول ما خدوا مناصب سكتوا ، وانا لما سيبت قصر السينما قامت له قومة – خالص – اهو اللي حصل في القصر .. حصل في مصر !! لاني عيبي اني بحب “حسني مبارك” ، طب انا راجل وواقف بقول كدة ومغيرتش رأيي زي ناس ، وغيري كانوا بيبوسوا ايد الريس وبعدين بخ ، “عبد المقصود” لما قعد في وزارة الاعلام هل بقى “صفوت الشريف” او “انس الفقي” يا جماعة فيه رجال دولة ، لكن “السيسي” و”صدقي صبحي” والمجلس العسكري هما دول رجال الدولة واللي احتفظوا بهيبتهم حتى الان ، ففي حد ينجح مكان وفيه حد يسقط مكان لفلو اللي هينجح المكان ده “فلللووول” خليكوا رجالة وجبوه ، وعن سؤالي هل ممكن تترشح لمجلس النواب القادم قال : مليش انا في الكلام ده مش شغلي ، واضاف ان قمة الديمقراطية لما “هشام طلعت مصطفى” يتحاكم وامه صاحبة السيدة الاولى وهو على علاقة بالريس وعضو في الحزب الوطني والمسلسل مش قصة حياته ومين “سوزان تميم” عشان اكتب عنها مسلسل ، هو كل مغنية تذبح تبقى “سوزان تميم” ، وعن الاعتذرات عن المسلسل قال : “قمر” مشيت عشان كانت حامل و”اميرة فتحي” مشيت عشان وفاة والدها ، وعن جديده قال : بنحضر لمسلسل “الضاهر” بعد 3 شهور من الان هنبدا تصوير وبنفس شركائي في الانتاج : تامر مرسي – سينرجي – اكبر منتج تلفزيوني ، وانا وائل ابو حسين وسمير يوسف – ماركيز هاوس – ، واحمد لطفي – كيز بروداكشان – وبدون مدينة الانتاج وتقريبا تم التعاقد مع القنوات اللي هتعرضه كمان وده اكبر دليل على نجاح “المرافعة” رغم عدم تحقيقه الارباح المتوقعة له والعرض التاني له هيكون على قناة “ام بي سي مصر” ومسلسل “الضاهر” هو من تأليفي ويدور حول اسرة يهودية راجعة تعيش في مصر تاني واحداث كتيرة هتكون مفاجاة للجمهور وجزء كبير من كاست “المرافعة” هيكون فيه ، وعن رجوع لكتابة سيناريهات كوميدية قال : انا ضد كتابة كوميديا للتلفزيون لان الكوميديا معتمدة على ضحك الجمهور ودي عدوة ، فلازم تكون يا اما في المسرح يا في السينما ، وعن اشتراكه في برنامج “شكلك مش غريب ” كي يساعده في انتاج المسلسل قال : اطلاقا ده شغلي ودي مهنتي اني بقلد وكنت مذيع وبمثل ومش محتاج اعمل ده ، وعن مشاكل البرنامج قال : لا يوجد مشاكل اطلاقا “هيفا” صديقتي وعن لقطة القبلات بيني وبينها : ده هزار ومفهوش حاجة وانا كنت بقلد الزعيم بس ده مايمنعش اني احب ابوس “هيفا” !! واستاذ / عادل امام كلمني بعد الحلقة الاخيرة وقاللي : انا روحت بيروت امتى ؟! دا انا  ، و عن رأي حماه المحامي الكبير / فريد الديب في المسلسل واداء المحامي “فاروق الفيشاوي” واداءه قال : “فريد الديب” عنده حضور اكتر ، وعن المسلسلات التي يتابعها في رمضان قال : “صاحب السعادة” للزعيم / عادل امام ولكن “العراف” كان احسن منه ومسلسل “سجن النسا” واشاد بمريم نعوم ونيللي كريم ومسسل “السبع وصايا” وعلق : بس محتاج متابعة وتركيز ، وعن السينما قال : تم تأجيل فيلم “المشخصاتي” الجزء الثاني لان السوق لا يتحمل ، واتمنى اني اشتغل مع “السبكي” لانه اكبر منتج سينما ، وقد ناشد الفنان / يحيى الفخراني بان يرجع الى اعماله الكوميدية الجميلة وان يتوقف قلقيا عن الاعمال الثقيلة دي قائلا : وحشتنى بقى يا استاذ / يحيى ، وباشكر “طلعت زكريا” لانه كمل دوره المحامي فاكهة المسلسل وله 200 الف جنيه مخدهمش وعمره ماعملها مع حد  ، واشار “تامر” الى ضيقه واستياءه من برامج المقالب سواء “فؤش” او “رامز” لانهم لو مخبيين على الضيف هيكونوا بايخين اوي وبيعرضوهم للخطر لكن البرامج دي ناجحة ، وعن الاوضاع السياسية الان قال : الجيش افسد المخطط الدولي للمنطقة في مصر وقريبا ستسقر الاوضاع في سورية والعراق ، اما تركيا وقطر وفلسطين سيدفعوا ثمن ذلك وفي الختام وجه “تامر عبد المنعم” رسالة للارهابيين قائلا : عيب بقى وكفاية .. مصر ماما ياله .. انزلوا من فوق كتافنا بقى .. عيب يا قطر ؟!