جريدة أحوال مصر
هو ابن الكاتب الراحل / سمير سرحان , اكتشفه الزعيم / عادل امام بعد ان شاهده في عرض “جزيرة القرع” على مسرح الهناجر ، وقدمه فى فيلم “رسالة الى الوالي” ثم شاركه العديد من الاعمال , حتى انطلق تلفزيونيا بست كوم “العيادة” , ليقوم بعدها باداء اول بطولاته فى فيلم “الدكتاتور” ، انه الممثل / خالد سرحان ، والذي يشارك هذا العام في 3 مسلسلات هي : صاحب السعادة ، سرايا عابدين ، الصندوق الاسود و قد خصنا “خالد” بهذا الحوار المطول والذي جاء فيه :
- ما هو احساسك بعد عودتك للتمثيل امام الزعيم / عادل امام ؟
انا بقالي فترة طويلة ماشتغلتش مع الاستاذ / عادل امام من سنة 2005 في فيلم “السفارة في العمارة” فبقالي 9 سنين ، اتشتقت ان اشتغل معاه جدا والحمد لله عملت معاه “صاحب السعادة” - احكي لنا عن كواليس “صاحب السعادة ” ؟
دائما التصوير مع الفنان / عادل امام كواليسه بتكون هادئة جدا وكلنا بنكون مركزين في الشغل وهو مابيحبش التهريج اثناء التصوير ، ولا انا بصراحة ، فانا بحب ابقى مركز وانا بصور فببدأ في معادي وبخلص شغلي وامشي ، وانا استفدت حاجات كتيرة منه طول عمري لانه هو اللي اكتشفني وكان له فضل عليا كبير بعد ربنا – سبحانه وتعالى – - وماذا عن صعوبات المسلسل ؟
كان فيه بعض الصعوبات لاني بلعب دور عازف آلة موسيقية وهي آلة “الترومبون” في اوركسترا القاهرة السيمفوني ، فكان بيحتاج مني تدريب على الآلة دي وكنت باستعين بواحد عازف في اوركسترا القاهرة اسمه “محمد جمال” وكان بيجي يدربني في البيت وفي الاستوديو ووقت التصوير وانا بعزف كمان - احكي لنا عن دورك في مسلسل “سرايا عابدين” ؟
انا ضيف شرف في مسلسل “سرايا عابدين” بلعب شخصية اخو الخديو “اسماعيل” وهو الامير “مصطفى فاضل” وهو شايف نفسه انه اولى بالحكم والعلاقة بينه وبين اخوه ملئية بالمؤامرات لانه بيتعاون مع الباب العالي في تركيا السلطان “عبد العزيز” ضد اخوه ليخلعه من الحكم ويجلس مكانه فالخديوي يدبر لي مكائد وانا ادبر له مؤامرات ، بس هو اللي بيكسب في الاخر - ما رأيك في تواجد الممثل كضيف شرف في الاعمال ؟
دي مش ظاهرة جديدة فمن زمان جدا بنلاقي نجوم كبار بيظهروا ضيوف شرف فمثلا “رشدي اباظة” ظهر مع “فريد شوقي” في عمل في اخر مشهد في الفيلم ، فمعنى ضيف الشرف انهم محتاجين للشخصية دي حد مميز عشان المنطقة دي تنور - ماذا عن الاخطاء التاريخية الموجودة في المسلسل ؟
الناس مبسوطة من العمل وانا مش عارف حجم الاخطاء اد ايه وهل موجودة ولا لأ ؟ ، لكني سعيد بالدور وفي الاول والاخر دي دراما لازم تخرج برة سياق الواقع قليلا ، يعني انا دوري المفروض انه هيتنفي الى تركيا لكن هرجع تاني ومش عارف في الجزء الثاني من المسلسل هيكون وضعي ايه ؟ - ماذا عن فكرة البطولة المطلقة ، ألا ترواضك من جديد ؟
اتعرض عليا قبل كدة بس اطار العمل محبتوش واذا كنت هعمل بطل لازم يكون فيه كل العوامل المساعدة سواء كان كتابيا اواخراجيا او انتاجيا وده عشان اتصدر العمل ، لكن انا حابب جدا البطولات الجماعية اللي كترت دلوقتي زي مسلسل “الصندوق الاسود” اللي انا بشارك فيه وهو بطولة جماعية مع : رانيا يوسف وتامر هجرس وزكي فطين عبد الوهاب فمثلا انا بشجع اعمال زي مسلسل “السبع وصايا” ده بطولة جماعية ، ووالله العظيم الموضوع مش فارق معايا فانا لما عملت “الدكتاتور” كبطل كانت الشخصية كدة لكن مش فارق معايا اكون بطل او لأ فلو اتعرض عليا ده هعمله وارجع تاني للادوار التانية فمفيش اي مشكلة فالمهم عندي الدور لاني بحب التمثيل فمش هعقد جنب عمل كام سنة وابطل شغل لغاية ما يجي دور بطولة تاني ليا فانا بشفق على بعض الابطال اللي بيعملوا فيلم ويعقدوا جنبه سنتين ثلاثة عشان يعملوا واحد تاني ، امال هيمثل امتى ؟ فلازم تمتع الناس بموهبتك ، فبالعكس انا عايز اظهر للناس على طول ومع ذلك بظهر قليل !! - وماذا عن تأجيل مسلسل “الصندوق الاسود”وعدم عرضه في رمضان ؟
احزنني جدا جدا انه مانزلش رغم قرب الانتهاء منه لكنه لم يلحق بالركب واحنا مستمرين في التصوير في رمضان ويمكن يتعرض بعد رمضان ونخلق موسم جديد لان المسلسل الكويس بيفرض نفسه فالمسلسل ورقه حلو اوي واحداثه شيقة وقوية جدا وانا كان عندي احساس انه لو كان نزل في رمضان كان هيحدث ضجة كبيرة - هل ترى ان الجمهور يتابع المسلسلات بعد رمضان ؟
انا شفت ان عمل زي “ذات” اتشاف اكتر بعد رمضان والناس بتتفرج على المسلسلات التركي بنسبة مشاهدة عالية جدا بعد رمضان بالاضافة الى المسلسلات المصرية الطويلة الـ 90 حلقة اصبحت بتتشاف كويس زي “آدم وجميلة ” ، واتمنى النجاح للصندوق الاسود لما يتعرض والعمل التشويقي الكويس هيلاقي جمهور - كلمنا عن دورك في مسلسل ” الصندوق الاسود” ؟
انا بلعب فيه شخصية مجرم قاتل لكن بيضعف اوي امام الشخصية اللي بيحبها واللي بتجسدها “رانيا يوسف” رغم انها بتحب تامر هجرس فشخصيتي لها جانبان : جانب رقيق وجانب قاصي جدا
- نفسك تشتغل مع مين من الفنانين ؟
مفيش حد بعينه بس انا نفسي اشتغل مع اي فنان موهوب سواء كان نجم او مش نجم لكن المهم بالنسبة لي : ما هي طبيعة الدور - ما رأيك في السباق الرمضاني هذا العام ؟
انا شايف إن كتابة المسلسلات اتحسنت ، فمن المسلسلات الجيدة “سجن النسا” و”السبع وصايا” و”سرايا عابدين” و”صاحب السعادة” و”المرافعة” - اين “خالد سرحان” من السينما الان ؟
انا بحاول اعمل ورشة لكتابة اكتر من فكرة وانا هتعاون مع شباب كتير في الفترة القادمة اننا نعمل عمل جماعي ان شاء الله - وماذا عن الجزء الثالث من مسلسل “العيادة” ؟
كان هيتعمل وتوقف رغم ان الفكرة كانت جيدة فكنا هنربطه باحداث ميدان التحرير بس ماعتقدش انه هيتعمل تاني - في ما السبب وراء تدهور حال المسرح الان ؟
لما يعود جمهور المسرح سيعود المسرح ، الناس انصرفت عن المسرح فلازم يكون في اعادة نظر في منظومة المسرح بشكل عام ، وده مش بايدي ولا بإيد اي فنان ، فده في ايد وزارة الثقافة ومنتجين المسرح ، وبإيد الضرائب واللي مفروضة بشكل رهيب على المسرح ، فلازم تقل عشان المنتج يكسب والفنان يكسب والتذكرة يكون ثمنها معقول فهي منظومة كاملة لازم تتعدل عشان نقدر نرجع تاني ، لكن انا دوري كفنان اني ألاقي نص كويس في اطار كويس وده كمان مش موجود دلقوتي خالص وانا نفسي المسرح يرجع - ما رأيك في تجربة الفنان / اشرف عبد الباقي ؟
تجربة ناحجة جدا بس هي ورائها محطة كبيرة زي “الحياة” بتصرف عليها ولو اني كنت بشفق على التجربة دي لانها في الخفيف – وعلى حد قوله “تيك اواي” – لانهم مظلومين بيعملوا بروفات 3 ايام وبعيدين يعرضوا فده في حد ذاته يضيع اي مسرحية بالتأكيد ، وكتر خيرهم انهم وصلوا للنتيجة دي - اين خالد سرحان من التأليف الان ؟
انا مش مؤلف انا بقول فكرة ، فلازم يكون فيه سيناريست معايا عشان يكتبها واي فنان لازم يبقى عنده افكار ويكون خياله واسع - ما رايك فيما تحقق من احداث فيلم “الدكتاتور” والذي عرض في 2009 وتحققه على ارض الواقع في 2013 من خلال حكم الجيش ثم الانقلاب عليه ثم عودة الجيش مرة اخرى ؟
انا اللي ألفت الفيلم وتعبت جدا اني اجيب ورشة عمل عشان يكتبوه ، فغيرت اكتر من كاتب وموصلتش للنتيجة اللي انا عايزها بالظبط لانه داخل الاحداث اللي كنت عايزها دراما اكتر من كدة كمان وكانت قريبة من الواقع اللي عايشينه اكتر ، فاللي ظهر من العمل 60 % مما كان في خيالي فمش كل الظروف ساعدتني في العمل ومنها الرقابة لكن اظن ان نهاية فيلم “الدكتاتور” لسه لم تأتي حتى الان - هل كنت تقصد تشبيه الابطال بمبارك وعلاء وجمال ؟
خالص ، ده كان حال العالم التالت فانا مشفتش رئيس ملوش ولدين وكل الرؤساء حصل عليهم انقلاب ، فالربيع العربي حصل على رؤساء كتير فالفكرة كانت اعم واشمل واعمق من اننا نقول انهم : علاء وجمال ومبارك - هل تنتظر رجوعهم تاني وفقا لقصة الفيلم ؟
انا مابضربش الودع ، لكن الفيلم بيقول كدة لكن الواقع لا يعلمه الا الله لكن الفيلم كان مجرد رؤية كاتب فقط لا غير
- ماذا ينقصك في الفترة القادمة ؟
انا محتاج كاتب كويس .. كاتب كويس ، وطبعا مانكرش اني محتاج مخرج كويس لكن فيه بارقة امل السنة دي ، زي الكتاب : مريم نعوم ومحمد امين راضي ، ولا يزال “يوسف معاطي” كاتب كوميدي ساخر كبير ولكننا محتاجين ناس اكثر تنوع - وماذا عن رد الفعل السيء للناس تجاه “صاحب السعادة” ؟
ممكن يكون فيه خضة من نوعية المسلسل لانها جديدة على الناس لانه واخد الشكل الامريكاني اكتر ، فهو اشبه بالسيت كوم الامريكي اللي دمه خفيف بيضحك ، ففي المسلسل احداث بتمر من خلال اسرة وبتعاني الكثير وبيتسائل هل الفلوس مصدر السعادة ؟ هنشوف ده ، وايه مشكلة الاسرة اللي فيها بنات فكل اسرة مصرية فيها : مطلقات و اثنين منتظرين الخلفة ، فالمسلسل مليء بانماط من هذا المجتمع ، فمثلا لاول مرة هيناقش مشكلة الاولتراس ، ووجود عازف اوبرا اول مرة اشوفه في مسلسل ، ولما هيتنقلوا لمنطقة الوراق وتتغير حياتهم ، ففي كل يوم هتلاقي تطورات كتيرة لسه هتبان في المسلسل - هل ستتجه في الفترة القادمة نحو التراجيديا والشر مثل دورك في مسلسل “سرايا عابدين” ؟
ممكن جدا لان فيه مناطق كتيرة فيا عايز اكتشفها وعايز الناس تكتشفها معايا فبعد ما عملت شخصية “شحتة السويسي” في مسلسل “الصندوق الاسود” – واظهر لنا اللوك بتاع الشخصية وهو بشعر كثيف اكرت وبشنب ، قاتل بمعنى الكلمة لن تعرفوه من اللوك الجديد – فمشتاق اني امشي في سكك كتير وعمرى ما بحب اني اكون مضغوط في سكة واحدة - الكثير من الاطفال يضحكون كلما ضربك الزعيم بالاقلام ، فهل كانت ضرورية ؟
اذا كان انا خربت البيت ، انا خليته يتقفش في شقة دعارة وخليت الست تسيب البيت ورغم كل ده رجعوني تاني ، فالاقلام دي ابسط حاجة ، فالضرب هنا له مبرر في الدراما لاني جوز بنته وحتى لما كان في فيلم “التجربة الدنماركية” ، لان المقصود هو اضحاك الجمهور وده مش اسفاف ،الكوميديا دي اصعب حاجة في الدنيا وبالذات في الاوقات اللي احنا بنمر بيها دلوقتي دي فانت بتسعد الناس في وقت فيه كئابة - ماذا عن حياتك الاجتماعية هل هي مثل شخصيتك في مسلسل “صاحب السعادة ” ام مستقرة ؟
انا مش متزوج : فحياتي مستقرة ، واكيد هيحصل ان شاء الله في الفترة الجاية واتمنى ذلك - ألم تعجب بأي من فتيات المسلسل ؟
لا والله ، كلهم اخواتي - وعن غيباه سنتين من بعد في فيلمي : “بابا” و “تيتا رهيبة” ؟
احنا كنا عايشين 3 سنين اللي فاتوا في كئابة فكنت مشدود ومكنش جو ابداعي ، فكان جو خوف ورعب على البلد والحياة ، فكنت بهرب من ده بالسفر للبحر في العجمي وبالذات في سنة حكم الاخوان ، وخلال الفترة السابقة عملت اعمال ضيف شرف سواء مع احمد حلمي “اكس لارج” و”بابا” مع احمد السقا و”تيتا رهيبة” مع محمد هنيدي ، وفي مسلسل “الريان” في دور “الحاج /اشرف السعد” ، لكن انا دلوقتي حاسس ان البلد والناس نفسها مفتوحة على الشغل بعد ما عدينا مرحلة كبيرة - هل شاركت في الانتخابات الرئاسية الماضية ؟
انا شاركت فيها وانتخبت المشير / السيسي - هل ترى ان القرارات الاقتصادية التي اخذت ، تمت في وقتها ؟
حاستها سريعة شوية بس يمكن هو معندوش غير الحل ده والله اعلم بما يحدث داخل الكواليس ، وانا اقتنعت لحد كبير بخطابه للناس بعد القرارات دي لما اتكلم على ديون البلد
- هل يمكن ات تخرج مظاهرات مناهضة لتلك القرارات بعد العيد ؟
لا اتوقع ذلك لو كانوا هيعملوا كانوا طلعوا من ساعاتها ، وبالعكس الناس عايزة تستقر دلوقتي واحنا عارفين مين بيشعل الامور دلوقتي في البلد
- هل ممكن نرى “خالد سرحان” ممثلا عن الشعب في مجلس النواب القادم ؟
لا يمكن اكون اي حاجة تانية في حياتي ، غير اني اكون ممثل - واخيرا هناك اكثر من حساب باسم “خالد سرحان ” على الفيس بوك ، ايهم الاصلي ؟
انا معنديش اكونت او حساب او صفحة على الفيس ، اخش منين على الفيس وموبايلي اهو – واشار بجهاز التلفون وتبين انه من الجيل الاول للتلفونات المحمولة – فهدخل منين يعني ؟؟ ، كل الصفحات دي مزيفة
يذكر ان مسلسل “صاحب السعادة” بطول : عادل امام ، لبلبة ، ادوارد ، محمد امام ، تارا عماد ،امينة خليل ، نادية خيري ، انجي وجدان ، ومن تأليف / يوسف معاطي ،واخراج / رامي امام ، اما مسلسل “سرايا عابدين” بطولة : يسرا ،قصي خولي ،غادة عادل ، نور ،نيللي كريم ، ومن تأليف /هبة مشاري حمادة ،واخراج / عمرو عرفة ، ومسلسل “الصندوق الاسود” بطولة : رانيا يوسف
،تامر هجرس ،ايهاب فهمي ،زكي فطين عبد الوهاب ،ومن تأليف / طارف بركات ، واخراج /عادل الاعصر
