جريدة أحوال مصر
أكبر مغامرة أن تحاور حشاشاً وهذا ما تعرضت له عندما قررت أن أجرى حواراً مع حشاش لكى أصور للقارىء طريقة حديثة عندما يكون متعاطى المخدرات.
أبو العفاريت يقول أن الحشيش مزاج العباقرة وأسألوا ((شكسبير)).
أبو العفاريت هو أخطرمروج للمخدرات وهو مقيم فى أحدى المناطق الشعبية.
أسمك أيه؟……>>>>>أبو العفاريت.
طيب ليه سموك أبو العفاريت؟……>>>>>لا أنا أسمى حسن وبيدلعونى بسكر.
عندك كام سنه؟…….>>>>>يمكن 30أو 40أو أكثر أو أقل.
أنت مدمن حشيش؟….>>>>>>((لا)).
أمال بتشربه كل يوم ليه؟
بشربه من عشرين سنه وبابيعه لكن عمرى ما أدمنته.
من عشرين سنه بتشرب حشيش كل يوم وتبيعه وما أدمنتوش..دى نكته يا راجل .
يبتسم اَه نكته لكن أنا اللى عملتها..تصدق فعلاً من عشرين سنه بشرب حشيش لكن مش ممكن أدمنه أبداً..!!!
بتبيع بكام كل يوم ؟
دا رزق…أيام ببيع بمية وأحياناً بألف حسب السوق كده يعنى؟
بتشرب فين وأزاى؟
بشرب فى أى حته لكن بعيد عن البيت علشان عيب محبش الجماعة يشفونى وأنا بشرب ولا ولادى أنا راجل عندى أخلاق وضمير يمكن أشربه فى المكتب كتيمى كده وأحياناًعلى القهوة من غير محد يحس وأحياناًمع أصدقاء عمرى.
وأنت بتشرب حشيش مع أصدقائك بتكلم فى أيه؟
بتكلم فى كل حاجة فى الدنيا والاَخرة والسياسة والعيش والملوخية والبنات والستات والحاجات.
سيبك من العيش والملوخية خلينا نتكلم شوية فى السياسة؟
أيه رأيك فى اللى بيحصل فى فلسطين؟
أنا مش فاهم همه بيتخانقوا مع بعض ليه ..بيقولوا علشان الكرسى طيب ما ييجوا نديهم عشرين كرسى..أنا شخصياً أعرف واحد صاحبى بيبيع كراسى زان ميه ميه ..ممكن أشترى دستة كراسى وأبعتها بس بشرط يفضوها سيرة بعد كده.
وبعدين أنا عاوز أسأل حضرتك سؤال ؟أيه اللى يخلى الجماعة بتوع ميدان التحرير يعملوا منظمة ويروحوا يقعدوا هناك .طيب أنا بأه هعمل منظمة بولاق وهروح ونشوف منظمة ميدان التحرير ولا منظمة بولاق على النعمة همشى اليهود فى أسبوع.
قلت لى قبل الحوار بفترةأن صدام حسين هيرجع يحكم العراق تانى لكن مرجعش وأنعدم كمان أيه رأيك ؟
مين اللى قال أن صدام أنعدم يا عمى أنتوا بتصدقوا الأمريكان..اللى أنعدم ده واحد تانى خالص..صدام عايش وهيرجع تانى علشان ياخد تاره من الأمريكان والجماعة بتوعهم ..على النعمة راجع …راجع.
وأيه رأيك فى باراك أوباما؟
والله راجل جدع بيدافع عن ((مزاجه))..كل واحد يدافع عن مزاجه.
وأيه رأيك فى حكاية تخصيب اليورانيوم فى إيران؟؟
أولاً أنا محبش الكلام فى قلة الأدب وهمه عايزين يغتصبوا إيران ليه؟
تخصيب مش إغتصاب
معرفش ..أنت سألت وأنا جاوبت .
طيب واللى بيحصل فى لبنان ؟
همه بيضربوا الناس علشان قاعدين فى نهر ((البارد))يعنى الناس تقعد فين فى الحر ده فى جهنم مثلاً…دا حتى ((اللبنانى)) مش لا قيينه.
تقصد التفاح؟
تفاح أيه يا عم ..الحشيش يا أستاذ!
طيب والأفغانى موجود ..الناس هناك بيبعوا علشان يحاربوا الأمريكان وأحنا بنشترى منهم علشان نساعدهم.
أنتوا مين؟
الكييفة
تعرف طالبان؟
أعرف ولا خمسين طالب وفيهم ناس بتشرب معانا.
أيه رأيك فى السينما؟
فين السينما دلوقتى ..فين أفلام الكيف والمساطيل والعار ولخمة راس معدش فيه أفلام تكيف.
بتسمع أغانى؟
بركب الحنطور وأتحنطر وبحبك يا حمار وأغانى المهرجانات ((الهيسه يعنى)).
بتسمع أم كلثوم؟
اَه طبعاً وخصوصاً سهرة الأمس.
أيه رأيك فى الوسط الثقافى؟
تخين حبتين.
نسيت أسألك عن أسعار الحشيش دلوقتى؟
مولعه نار وبصراحة الجماعة بتوع الداخلية خلوها زفت كل يوم حملات وحاجات نعمل أحنا أيه بأه.
تبطل الحشيش؟
أزاى حد يقول كده برضوا !!
أحسن الحشيش ولا البانجو؟
لا يا راجل البانجو حاجة بيئة قوى لكن الحشيش دا حاجة تانية خالص بتحس أنك إنسان مهم.
الحشيش يخليك إنسان مهم؟
اَه لأنه كيف ولاد الناس وكيف العباقرة وكيف الفنانين وكيف الناس اللى فى السحاب.
مين دول اللى فى السحاب؟
أنت عايز تحبسنى يا عم أنا بتكلم عن الدخان والنجوم والكواكب وفيروز بنتى وكمان شكسبير.
شكسبير مرة واحدة ؟!.
اَه وأنت لو قارىء هتعرف أنه كان بيشرب حشيش وبياكل أفيون وحاجات تانية بلاش أقولها .
أنت أهلاوى ولا زملكاوى ؟
حسب ..الفريق اللى يكيفنى أحييه .
مين أحسن لاعب من وجهة نظرك ؟
محمد حشيش.
أيه اّخر نكته ؟
أقولك ..واحد بيسأل الثانى ويقولك مين كسب فى كأس العالم قال ألمانيا ومين كسب حرب 73 قاله أحنا رد عليه يعنى أحنا حنقابل ألمانيا فى النهائى.
وده كان أجرىء حوار مع أخطر مروج للمخدرات والحمد لله تم بسلام.
