جريدة أحوال مصر
اتفقت الفنانة الخليجية الصاعدة / هيا فياض مع مدير الانتاج السينمائي / محمود سويلم على ان يكون سويلم هو مستشارها الفني والاعلامي في مصر ويمثلها في جميع التعاقدت الرسمية لاعمالها القادمة، وقد كان لنا هذا الحوار الصحفي الاول لها في مصر لكي يتعرف الجمهور المصري عليها عن قرب ، وقد جاء فيه :
- من هي هيا فياض ؟
انا فنانة خليجية ، كنت باشتغل في مجال الديكور ولي مكتب في السعودية ودارسة حاسب آلي ونظم معلومات
- كيف ومتى اتجهتِ الى الفن ؟
عن طريق استاذ / محمد بخش وهو ممثل ومنتج سعودي ، من خمس سنوات هو اللي شاف فيا الموهبة وهو اللي دخلني معاه بعد ما عمل لي بروفة طرابيزة وانا كنت رايحة مع واحدة صاحبتي هي اللي ممثلة مش انا وكانت اول اعمالي معه في مسلسل ” قصص من الادب السعودي ” رغم عدم اقتناعي حينها بدخول الفن ، لكن بعد اول تجربة ابتديت احب المجال والتمثيل
- احكي لنا عن تجربتك في مسلسل ” طاش ما طاش ” ؟
ده كان تاني عمل ليا وكنت حباه جدا وانا اشتركت معهم في الجزء السابع عشر من المسلسل ، وكان فريق عمل كويس جدا وساعدوني كتير وخاصة الفنانين : ناصر القصبي ،عبد الله السدحان ، وكان دوري في الحقلة بقوم بشخصية مخرجة ومعدة برامج وبتدعم حالة بطلة الحلقة “ريم عبد الله” وهي كانت متزوجة من اربعة ، وحصل اشاعات كتير على الحلقة دي والناس صدقوا موضوع الحلقة واني بحلل للمرأة زواج اربعة وهاجموني لكن ده معناه انهم صدقوني اوي
- وماذا عن تجربة مسلسل “هوامير الصحراء” ؟
دي كانت احلى تجربة ليا وكان معايا : استاذ/ محمد بخش ، عبد الله العامر ، ومجموعة كبيرة من الفنانين وكان دوري زوجة “محمد بخش” في الجزء الرابع من المسلسل وهو بعنوان “هوامير الصحراء – التحدي –” 2012 وكان فيه جزء خامس وسادس للمسلسل ولظروف انتاجية تم تأجيلهما حينها وتم تصوير الجزء الخامس في 2013 بعد ذلك
- ما هي اخر اعمال شاركت بها ؟
شاركت في مسلسل “انتِ طالق ” وهو انتاج / محمد بخش
- ما السبب وراء استمرار تعاونك مع محمد بخش ؟
هو ممثل مريح في شغله وعشان كدة انا بحب اشتغل معاه وهو له فضل عليا انه دخلني المجال فهو الاب الروحي ليا وهو اللي بيديني الدفعة ، فلو مكنش هو اصر اني ادخل مكنتش فكرت اني اكون ممثلة
- ماذا عن تواجدك في مصر ، هل هي زيارة قصيرة انك تفكرين في الاستقرار هنا ؟
انا جيت مصر من ست شهور ومقيمة اقامة كاملة عشان اقدر اركز في الفن و لسه بقول يا هادي مع استاذ محمود سويلم ” مدير الانتاج ” وان شاء الله يكون الاخ الروحي ليا هنا وتكون انطلاقتي المصرية على ايديه
- هل تحبين العمل في السينما ام التلفزيون ؟
الاثنين ، المهم العمل يكون حلو والورق يكون كويس ، وانا جالي سيناريوهات كتير جدا لكن مفيش حاجة شدتني
- ما هي نوعية الاداور التي عرضت عليكِ حتى الان ؟
اغلب الادوار اغراء ، وده انا مش حباه نهائيا وكل واحد مننا ليه عاداته وتقاليده وشفت ان الناس مصنفين الادوار دي لممثلات بعينها ، اه الممثل لازم يعمل كل حاجة لكن مش لازم كل حاجة كل حاجة ، فالافلام اللي اتعرض عليا كانت ادوار فتاة ليل او افلام بحسها هابطة ومش قوية ، فالفنان المفروض يقدم حاجة راقية وجميلة للمشاهد ، ليه عايزين تخلوه يقدم الحاجة اللي مش كويسة وفيه فنانات كتير محترمات وطلعوا واصبحوا نجمات ، فمش عيب الواحد يحترم نظرة الناس له ، حتى لو هو في حياته الطبيعية بيلبس او بيتكلم بشكل معين مش لازم يقدم ده ليهم على الشاشة ، وحتى الاغراء ممكن بالكلمة اوبالنظرة
- هل لو عرض عليكي مشهد فيه ملابس بشكل معين سواء ميكرو جيب او قميص نوم او مايوة ، سترفضين ؟
انا طالعة امثل وباقوم بدور مش طالعة اعمل عرض ازياء وقميص النوم ده من سابع المستحيلات اني ألبسه ، ليه مالبسشي بيجامة مثلا وانا في البيت مع جوزي
- ما الفرق بين الفن الخليجي والفن المصري ؟
عندنا من سابع المستحيلات ان واحدة تظهر على الشاشة لبسة قصير او ضيق ، فمن سابع المستحيلات انه يكون فيه قميص نوم بالاضافة الى امور اخرى كثيرة
- ما النجم الذي تحلمين بالعمل امامه ؟
فيه ناس كتير ، مثلا : استاذ /عادل امام ، احمد حلمي ، احمد عز ، مصطفى شعبان ، ففيه نجوم كتير يكون ليا الشرف اني اشتغل معاهم ، كفاية اني في مصر اللي هي ام الدنيا
- من هي مثلك الاعلى في التمثيل ؟
في الخليج استاذة / حياة الفهد ، ومن مصر فيه كتير ، بس انا بحب “شادية”
- بمناسبة المطربة “شادية” ، هل تفكرين بالغناء ؟
لا انا بمثل بس واتعرض عليا قبل ذلك دور مطربة وقالوا لي هندخلك استوديو ونعملك تدريبات لكنِ رفضت ، يمكن فيما بعد افكر في التجربة دي
- هل تستطيعن لعب ادوار بنت البلد الشعبية ؟
بالتأكيد دي احسن ادوار ممكن اعملها وياريت يتعرض عليا حاجة زي كدة ، وعلى فكرة من وجهة نظري انا لغاية دولقتي مشفتش حد قدم الدور ده على اكمل وجه سواء من الممثلات العرب او المصريات انفسهن لانهم بيزودوها شوية – بيكونوا اوفر –
- هل تستطيعن الردح – اي توبيخ من يقف امامك باسلوب الحارة الشعبية – ؟
الفنان يقدر يعمل كل حاجة وانا لما بتحول بتحول !!
- ما هو الدور الذي ترغبين في ادائه ؟
عايزة العب دور ليه مصداقية يؤثر مع الناس ويفاجئهم ويوصل رسالة كويسة يستفاد منها ، مش حاجات هابطة زي مابيقولي الفن الراقي ، وانا بحب ادوار الشر وبأديها بكل جدارة وخصوصا لما بتحول ، خاف مني بقى بدل ما اعملها معاك دلوقتي ؟! ههههه ، والغريبة الناس حبتني في درو الشر زي ما كنت في “هوامير ” كان دور زوجة شريرة متسلطة ، والفنان لازم يكون متنوع ومايحصرش نفسه في حاجة معينة
- ألا تخافين من الانطباع الاول لدى المصريين تجاهك وانت شريرة ؟
الشعب المصري طيب والجمهور واعي وما يتخفش عليه ، يقدر يفرق بين التمثيل والحقيقة
- ماذا عن ادوار الامومة ؟
ممكن لو اطفال صغار لكن ماتجبليش ناس في سني وتقولي مثّلي ، وده ادى الى انتقادات كتير ليا في مسلسل “هوامير ” فبنتي كانت اكبر مني وانتقدوا المخرج كمان
- ماذا عن جديدك ؟
جديدي هو تعاقدي مع محمود سويلم
وعلى جانب اخر ، اعرب مدير الانتاج / محمود سويلم عن تقديره لـ هيا وانه سيبذل كل ما في وسعه لكي تظهر “هيا” بالشكل المطلوب لها على الساحة الفنية المصرية ، واضاف ان هناك عرضين مقدمين لها تعكف “هيا” الان على قراءتهما بالاضافة الى فيلم فيلم مصري سعودي ييتم تصويره بين مصر والسعودية قريبا جدا
