جريدة أحوال مصر
اقامت شركة عامر جروب حفلا للنجم / تامر حسني في بروتو مطروح – احلى حياة على احلى بحر – من تنظيم شركة W.M Talent لصاحبها وليد منصور في اطار حفلات كرنفال “بابا بورتو” خلال هذا الصيف ،والذي بدأ منذ اجازة عيد الفطر بالفنان / حسام حبيب والساحر / جينو ثم فرقة “واما” ثم فرقة “سلالمط ثم الفنان / لؤي ، والليلة حفلة الفنان / محمود العسيلي
في بداية اليوم تم تجهيز ساحة الحفلة من بوبات الدخول والمسرح والاضاءة ثم قام “بابا بورتو” بالترحيب بجمهور الحفل من رواد البورتو وسكان محافظة مطروح و رابطة “اولتراس تامر حسني” القادمين من القاهرة ، وقام “بابا بورتو” بعرض مائي بالجت سكي امام الجميع
ثم حضر مدير امن مطروح اللواء/ العناني حمودة لتفقد الحالة الامنية بالبورتو وتأمين الحفل من الداخل والخارج وصاحبه مجموعة من امن البورتو خلال جولته
وقبل الحفل كان لنا هذا اللقاء بنجم الجيل / تامر حسني والذي فتح لنا قلبه وحاورنا بكل صراحة كما يلي :
- ماذا عن ألبوم 180 درجة ؟
180 درجة ده اسم الألبوم الجديد وان شاء الله نازل يوم 25 اغسطس الجاري وانا كنت قاصد بيه حاجة وظهرت في الكليب في فكرة المطرب والجمهور انهم روح واحدة فالمطرب هايص وسط الجمهور وحوله الوان ، وفيه حالة من الحب وانهم نسيج واحد ، فبتعبر عن فكرة التغيير فألبوم دعوة لتغير 180 درجة
- هل ترى ان هذا الألبوم مختلف عن باقي ألبوماتك ؟
اكيد لان ثلاث سنوات فاتوا عليا وعلى الكل كانوا صعبين والناس كلها مكنتش في احسن حالتها وده حصل معايا تحديدا وانا معترف بده وهي كانت حالة عامة عند بعض المطربين تحس انك لسه مش في الفورمة لكن انا حاسس ان بالألبوم ده الحمد لله استعادت نفسي تاني ورجعت ركزت بنفس القدر اللي كنت مركز بيه زمان فمفيش حوليك احداث بتأثر عليك بالسلب فانت عارف تفكر كويس واحنا بذلنا مجهود فيه كبير وان شاء الله يحقق النجاح المطلوب - بعدما كنت “مش عارف تتغير” الان تغيرت “180 درجة “، ماهي الظروف التي ادت الى ذلك التغير ؟
اكيد بعدما رزقت ببنتي “تالية” ربنا يخليهالي اكيد اتغيرت وانا حاسس اني انا مشاعري اتغيرت فبقيت باشتغل وبتعب وطموحي هو هو بس عشانها ، لكن في الاول كنت باشتغل عشان احقق نفسي لكن دلوقتي عشان بنتي عشان حد مسئول منك عشان الاسرة عشان بيت ، فدي حاجة تانية خالص
- اكيد وهذا ظاهر من رغرغة عينيك بالدموع وانت تتحدث عنها ، فهل هذا الالبوم هو رسالة لها ؟
فعلا وده ظهر من الاغنية اللي نزلت وكلماتها : “جت اللي خلاص حتنسيني جرح سنيني .. ليالي كتير مستنيكي بحلم بيكي .. احساسي بيكي اول ما شفتك دبحني .. صالحت بيه الدنيا وسامحت اللي جارحني ” ، كل ده كنت بقولو ليها وحصل لي اول ماشفتها فهي غيرت فيا كتير ، و انا عايش عشانها وعشان بيتي واسرتي
- ماذا عن تعاملك مع شركة روتانا للصوتيات ؟
بشكل عام انا باشكر “روتانا” شكر رسمي على المجهود اللي عاملوه معايا تحديدا وعلى شعورهم بحجمي كفنان مصري واحتضانهم ليا وتقديرهم لكل ما طلبت ، وبجد هما عملوا اللي عليهم واكتر بكتير وده ظهر من رد فعل الاغاني اللي نزلت وفالمستوى السنة دي مضروب في خمس اضعاف ما كان عليه في الماضي
- لماذا تم اصدار الاغاني منفردة قبل نزول الالبوم كاملا هذه المرة ؟
بعد قرصنة الاغاني على الانترنت ، بقت كل شركة بتدور انها ازاي تبيع الالبوم بشكل يقدر يدخلها دخل ، فمثلا الشركة شايفة انها ممكن تعطي” اي تيونز” بعض الاغاني عندها يبدأوا ينزلوها الاول وممكن يكون ليهم علاقات مع مواقع تانية ممكن تشتري الاغنية ، فهو من حقه كشركة انتاج انه يرجع الفلوس اللي صرفها بطريقته وهو متفق معايا لان الالبوم لما بينزل على الانترنت بيبقى ببلاش ، اما على اليوتيوب الاتفاق اني انا وهو بنرفع الاغاني على قناتي وقناته وده تم في اغاني مسلسل “فرق توقيت” واغاني الالبوم ده
- ما عدد اغاني الالبوم ، و من شاركك من الملحنين والمؤلفين به ؟
فيه 12 اغنية وفيه جيل جديد طالع في الألبوم ده بالاضافة الى اصحاب الخبرة زي امير طعيمة ،كريم عبد الوهاب ، احمد ابراهيم ، والحمد لله ان الناس الجداد معايا لما اغانيهم نزلت عاملة نسبة استماع عالية - هل ترى ان مسلسل “فرق توقيت ” ظلم بعرضه حصريا على قناة “النهار” ؟
بص هقولك حاجة ، مسلسل “آدم ” كان نازل على قناة “النهار” بس وحقق نجاح بس الفكرة ان وقت “ادم ” مكنش فيه المسلسلات الكتير اوي دي ، لكن دلوقتي ما شاء الله ربنا يزيد ويبارك المسلسلات كترت جدا ، ففكرة زحمة المسلسلات خلت فيه مسلسلات كتير لم تشاهد جيدا لكن ده بيبان في العرض التاني
- لكن هل قصة المسلسل كانت وراء قلت المشاهدة عليه ؟
انت ممكن تعمل قصة تجذب عدد كبير من الناس وممكن قصة ماتجذبش عدد كبير من الناس لانها حاجة جديدة عليا انا ، مثلا وانت متوقع من تامر انه يعمل العادي بتاعه ، لما تامر بيفاجئك بحاجة ممكن انت تستوعبها وممكن لأ لكن ممكن تستوعبها في العرض التاني وانت في الروقان ، وده العمل اللي انا عملته كانت قصته تشويقية – سيسبينس – وانا اول مرة اعمل كدة وكان بيدور حول سؤال معين مين اللي حاول يقتلني وكان محير ناس كتير لغاية اخر حلقة
- لماذا تم تأجيل تصوير اخر حلقة الى آخر رمضان ؟
عشان اجابت السؤال ماتنكشفش : مين الي ضرب “ياسين” بالنار ؟ ومكنش ينفع اصوره في نص رمضان كان تاني يوم اي حد عرف هيحط المعلومة على الانترنت – ربنا يخليهولنا – وتتفرج على مسلسل محروق ، فكان لازم الحرص
- لماذا ابتعدت عن السينما في الفترة الاخيرة ؟
فعلا انا بقالي 3 سنين معملتش افلام ، وده لسببين : المنتجين مبقاش عندهم الاستعداد الرهيب ورجعوا خطوة ورا شوية ، لكن اعتقد دلوقتي ان احنا اتقدمنا تاني خطوة ، ولان 3 السنين اللي فاتوا كان فيه طابع من الافلام هو اللي غالب ممكن يكون ناتج عن شحنات نفسية عند الناس فظهر بشكل معين من الافلام
- هل انت ضد هذه النوعية من الافلام ؟
انا هكون صريح معاك لان الموضوع ده نسبي فمش هاقدر اقولك اني انا ضده ، فمثلا “السبكي” ليه افلام كتير حلوة ومهمة وافلام ممكن تنتقدها وانا كلمته في حاجات كتير ، “فبيقولك كل حاجته كدة” فلازم واحنا بننتقد مننساش انه عمل شغل كويس في السينما لكن بشوف اقلام رهيبة بتجرح فيه ونسينا انه عمل افلام حلوة برضوا ، حتى فيه بعض الفنانين اتهمناهم انهم بيعملوا اسفاف وبيبوظوا الذوق ، فمش عارف ليه فيه جاب في الموضوع ده ، حتى انا لما ظهرت اتهمت بنفس الاتهام ، وانا عايز اقول لو احنا متعودين مثلا لو حد نجح من ولاد بلادنا وشفنا فيه بعض الانتقادات ليه مابنكلمهوش وناخذه في حضننا كدة ونقوله : تعالى انت بقى ليك بعض الجماهيرية والناس بقت بتشوفك وتصدقك فلو سمحت تعالى اعمل كذا وكذا ، فمش لازم نهينه ونجرحه وكل الناس تخونه وتسخن عليه فجأة ، في حين ان احنا بكلمة طيبة ممكن نخليه يتوازن ويفكر مع نفسه بدل ما هو ماشي مش فاهم وفاكر انه بيتحارب بس
- هل تفكر ان تدخل السباق الرمضاني في 2015 ايضا ؟
لأ السنة الجاية هريح شوية من المسلسلات وهاعمل فيلم باذن الله وانا بحضر فيه دلوقتي وهو فيلم اكشن والشخصية بعيدة تماما عني وعن اي حاجة قدمتها وانا مبطئ في خطواته عشان يظهر بالشكل المطلوب
- “وليد منصور” منظم حفلاتك هل تنصحه انه يدخل عالم التمثيل ؟
شهادتي هتكون مجروحة فيه وانا باشكر “وليد” على المجهود الكبير اللي بيعمله معايا بجد
- “وليد منصور” دخل مؤخرا في مجال الانتاج السينمائي ، هل سنرى عمل يجمعكما سويا قريبا ؟
ورد على هذا السؤال “وليد منصور” بدلا من “تامر” وقال : والله العظيم هو اللي نصحني اخوض تجربة الانتاج ، وانا اتمنى اني زي ما بنظم له حفلاته كمان انتج له فيلم في السينما
- ما رأيك في مشروع قناة السويس الجديد – تفريعة الاسماعيلية – ؟
ربنا يكرمنا ان شاء الله واي حاجة هتنهض بالبلد اواي حاجة في مصلحة مصر اكيد انا معاها
- هل ممكن تشارك في الحفلات التي سيتم اقامتها لدعم القناة وصندوق “تحيا مصر” ؟
اكيد طبعا ، وانا عايز انفذ فكرة انا طرحتها على بعض الفنانين ، وفيه ناس وافقت وفيه ناس رفضت عشان هتقول : اهه هو عايز يعمل الموضوع ده عشان يتقال انه هو اللي جمعنا ، لأ احنا مش هنروح ، فاهمني ، فعشان كدة الموضوع مابيكملش ، فانا نفسي وسهل جدا وممكن نسمي المشروع “صفارة .. اجمع ” لان البلد محتاجة الفنانين لانه بمنتهى الصراحة كل فنان عندنا ليه قاعدة جماهيرية كبيرة ويقدر بسهولة جدا يطلع فلوس كتيرة للبلد ، ومش انا اللي هطلب انا عايز جهة معينة تطلب وتقول المسرح الفلاني هناخده شهر وعندنا مهمة هنعملها للبلد فمش هيعمل بس حفلة واحدة وخلاص لأ ، فناس بتحبك هتيجي تتفرج عليك عشان بتحبك وعشان راحة البلد وانت مش هتاخد فلوس معلش وممكن الدعم يروح لكذا جه للمستشفيات وللشوارع ، وربنا يكرمنا كفنايني ونتحد ونعمل المشروع ده فناخد مكان معين والجمهور عارف حفلة الفنان فلان النهاردة وله 3 حفلات كأنه جاله 3 افراح في اليوم وهيعملهم فنعمل يوم كامل لفنان ،فحفلة الظهر وحفلة قبل المغرب وحفلة بالليل وانا جاهز اعمل ده قدامكم كلكم وان شاء الله نتحد وانا حاسس اننا هنقدر نجمع حاجة كويسة للبلد
- ما سر نجاح كليب “ويلكم تو ذا لايف” مع المغني / ايكون ؟
انا كنت متوقع نجاح الكليب ده لانه فيه مجهود وفيه فكرة ، وهي اني بحاول بقالي 3 سنين اخد لهجتنا وموسيقتنا العربية برة وفيه ناس انتقدتني في الاول وانا عازرهم لانهم تخيلوني مجرد فنان طالع يغني مع مطرب برة والموضوع مش كدة خالص بدليل ان مفيش اغنية متقالتش فيها اللغة العربية ، وانا قعدت برة فترة وشفت ازاي فيه عنصرية كبيرة قصاد اللغة دي وقصاد المزيكا وقصادنا كاشخاص ، ففيه ناس بتتنازل عن بعض الحاجات لكن انا ماتنزلتش عن اي حاجة وصممت في وقت كنت حاسس فيه بالاحباط الرهيب وانا عنيد بطبعي وصممت اني ارجع وكنت عايز اعمل الفكرة وفضلت وراهم ، لان لما الناس بتشارك مغني اجنبي انت اللي بتتأثر بيه انت اللي بتنطق لهجته لكن انا فرضت نفسي ونطقت ولبست الزي بتاعنا وهزرت بنفس الروح بتاعتنا فلازم نأثر فيهم مش احنا بس اللي هنفضل نتأثر بيهم ، ودي كانت الرسالة اللي نفسي اوصلها والحمد لله عملته ، وفيه كوبليه كامل مغني اجنبي بيغنيه باللغة العربية بيقول :”احساسي بيكي اول مانا شفتك .. دبحني ” ، فانا شايف ان دي حاجة مهمة في نجاح الكليب ، وتاني حاجة المخرج / ياسر سامي الحقيقة انا باشكره لانه عمل مجهود كبير معايا والمكتب بتاعه كله كان شغال للاغنية دي بس
- ما رأيك في حفلة الليلة في بورتو مطروح ؟
طبعا انا مبسوط جدا من المشروع وبالمجهود اللي بيعمله “عامر جروب” لانه مجمعنا كلنا كجمهور وفنانين وكصحافة وكإعلام ، وبدأنا نشوف بعض لانكم واحشتوني بغض النظر عن البعض اللي بينتقدني ، فالموضوع ان المطربين رجعوا يغنوا والناس رجعت تنبسط والحفلات بتبقى مليانة ناس وزحمة ، وربنا يكرمهم طول ما هما بيجمعونا وبيثبتوا ان البلد بخير وانها صاحية من خلال الحفلات والحب وتجمع الناس وربنا يوفقنا جميعا
وفي الختام صرح انه سيقيم حفلة كبيرة قريبا خصيصا لطرح اغاني الألبوم الجديد كلها وقام باخذ صورة تذكارية مع منظم الحفل وليد منصور ومسئولي شركة عامر جروب ومسئولة العلاقات العامة / شيرين عجينة ، ومدير اعمال تامر / محمد فؤاد
وقد دخل “تامر” على مسرح الحفل وسط دخان كثيف وقام بالسجود على المسرح بعدما شاهد الأعداد الضخمة التى حرصت على حضور الحفل ” 15 الف متفرج” ، وقال تامر: ” مش قادر أوصف سعادتي بيكم النهاردة وده شرف كبير لي أن أغنى وسط جمهوري”. وقدم أولى فقراته الغنائية فى الحفل بأغنية “smile”، والتي كان غناها مع المطرب العالمي “شاجي” في سنة 2012 ، والتى تفاعل معها الجمهور المتواجد بشدة، ورددوا كلمات الأغنية معه وسط صيحات كثيفة.
وقد شهد الحفل إغماء عدد من الفتيات فور صعود تامر حسني المسرح، بسبب التدافع الشديد بين الجمهور. وقد شارك في الحفل الدي جيه / وليد الحريرى وفنان الألعاب النارية / أحمد عصام – فاير وورك – . و استمر الحفل لأكثر من 90 دقيقة حيث قدم مجموعة كبيرة من أغانيه القديمة مثل اغنية “بتغيب” والتي غناه في الموبيل لفتاة صديقة شاب من الجمهور كان يكلم حبيبته امامه والقفى لو تلفونه ليغني لها لايف مباشرة اثناء المكالمة ، بالاضافة الى اغاني : ” تلفوني رن ” و”قرب حبيبي”، “أكثر حاجة”، “ميحرمنيش منك”، “نور عيني” ليعقبها بعدد من أغاني ألبومه الجديد “180 درجة”، ليشعل بها حماس الجمهور منها : “كل اللهجات ” فيغني بها باللهجات المغربية واللبنانية والتونسية والخليجية في أغنية واحدة ومن كلماتها : هلبة هلبة برشى برشى ، واغنية “ولا في الدماغ الا انا ” ، فيما رفع اعضاء رابطة “اولتراس تامر حسني” لافتات باسم ألبومه “180 درجة” .
واثناء الحفل فؤجي الفنان / تامر حسني بصعود شاب على خشبة المسرح وقام بتقبيله وإحتضانه ثم سجد شاكرا الله على تحقيق حلمه ثم طالبه الجمهور بغناء اغنية لمصر فغنى ” انا مصري فوق رأسي بلدي “
وقد احتفل منظم الحفل / وليد منصور بعيد ميلاد “تامر حسني” الذي صادف قبل أيام قليلة من يوم الحفل ، فقدم له تورتة على المسرح اثناء غنائه لاغنية “كل سنة وانت طيب” لكل من كان عيد ميلاده موافقا ليوم الحفلة من الجمهور ، وقام الجمهور بتحيته والغناء له احتفالاً بهذه المناسبة. وبدأت الهدايا تنهال على “تامر” من جمهوره من رمى عليه ساعة، ومن أعطاه سلسلة فضية مما جعل تامر يقول لجمهوره : بلاش الهدايا الغالية خلينا في الحاجات العادية.
وفي نهاية الحفل شكر “تامر” منظمي الحفل وعلى رأسهم : شريف خليل – صاحب الايفينت- ، ووليد منصور منظم الحفل، ووليد الحريري، وتامر فوزي مصمم المسرح وجميع فرقته الموسيقية ، و”احمد عصام” مصمم الالعاب النارية ،وداليا ،والمصور/ روميرو
وقد حضر الحفل : محمد منصور ، و الفنانة المعتزلة / بسمة بوسيل زوجة طتامر حسني” وبهذا قد ردت “بوسيل” على شائعات انفصالها عن “تامر” بحضور الحفل حيث تواجدت معه منذ وصوله، وتابعت الحفل مع صديقاتها بعيداً عن عدسات المصورين، ثم غادرا معاً بعد انتهاء الحفل في سيارته .
يذكر ان “تامر حسني”، قد سلم ماستر ألبومه الجديد والذي يحمل اسم ” 180درجة” لشركة روتانا للصوتيات، وهو التعاون الأول له معها وقد طرحت شركة “روتانا” صباح الإثنين 25 أغسطس ، الألبوم . حيث صرح “محمد أبو تكية” مدير شركة “ميوزيك مصر” التي تتولى توزيع الألبوم في مصر، أن الألبوم تم طرحه صباح الإثنين في الأسواق، وهو متوفر حاليا لدى منافذ البيع. ويضم الألبوم 12 أغنية هي:
“مين ممكن” كلمات وألحان / تامر حسني وتوزيع / نور.
“دنا بابا” كلمات وألحان / تامر حسني وتوزيع / عبد الرحمن شوقي.
كل ده على ايه” كلمات / أمير طعيمة وألحان / شريف بدر وتوزيع / شريف مكاوي.
“180 درجة” كلمات / محمد عاطف وألحان / رامي جمال وتوزيع / أحمد إبراهيم.
“زي النيل” كلمات وألحان / تامر حسني وتوزيع / جلال فهمي.
“العقدة اتفكت” كلمات / صابر كمال وألحان / شريف بدر وتوزيع كل من :عمرو إسماعيل وخالد عصمت.
“نرجع تاني” كلمات / السيد علي وألحان / أحمد يوسف وتوزيع / محمد شفيق.
“اطمني” كلمات / هشام صادق وألحان / شريف بدر وتوزيع / أحمد عبد السلام.
“في الحياة” كلمات / أحمد علي موسى وألحان / محمد عبيه وتوزيع / أحمد إبراهيم.
“متتغيري بقى” كلمات / تامر حسني وألحان / علي شعبان وتوزيع / كريم عبد الوهاب.
“بحبك بكل اللهجات” كلمات كل من : تامر حسني والسيد علي وألحان / أحمد يوسف وتوزيع كل من : عبد الرحمن شوقي وخالد عصمت.
بالإضافة إلى أغنية welcome to the life التي قدمها “تامر حسني” في شكل “دويتو” مع المغني العالمي / إيكون، وهي من كلمات وألحان / تامر حسني ومن توزيع / Brain Haze.
