جريدة أحوال مصر
اقام الاستاذ / يوسف سباهي “رئيس وكالة فيس تو فيس للموديلينج ومؤسس مهرجان جمالك يا مصر لاختيار ملكة جمال مصر ” مؤتمرا صحفيا بحضور معظم المشتركات في مسابقة 2014 للرد على الاكاذيب التى رددتها احدى المتسابقات عبر وسائل الاعلام المختلفة وخاصة برنامج “من الاخر” للاعلامي / تامر امين على شاشة روتانا مصرية
وقد كان لنا مع يوسف هذا الحوار المطول الذي تم في جو من الصراحة المتناهية وجاء فيه :
- من هو يوسف سباهي ؟
انا درست في سويسرا ادارة اعمال وبعد كدة درست تصميم الازياء في ميلانو بايطاليا وسافرت عشت في ميامي بالولايات المتحدة سنيتن وبعد كدة نزلت مصر واستقريت واتجهت لتصمصم الازياء وفتحت محل خاص بيا في الزمالك لمدة 3 سنوات وبعدها فتحت وكالة “فيس تو فيس” ، حاولت انسق وقتي بين المحل وبين الوكالة معرفتش فوقفت تصميم الازياء ، بس انا شكلي كدة هوقف ده برضوا ومش عايز اكمل في الشغل ده ،ههههه !!
- متى بدأت مسابقة ملكة جمال مصر ؟
انا بدأتها من 1998 وقبل كدة كانت اللي بتنظم المسابقة مدام / ماري فرانس وهي امريكية وكانت مقيمة بامريكا وكانت تأتي لتنظيم المسابقة لمدة اسبوع وابتدت اول دورة سنة 1987 لما “هدى عبود” كسبت اللقب
- بذكر مدام / هدى وهي خالت ملكة جمال مصر 2014 “لارا دبانة” ، ردد البعض انها كانت تتحكم بالمسابقة حتى تفوز بها لارا ؟
“هدى عبود” معرفتي بيها انها كانت ملكة جمال مصر سنة 87 واتقابلنا كذا مرة من خلال مناسبات ليها علاقة بالازياء والجمال ، وهي لما جابتلي لارا كانت مترددة تشترك السنة دي ولا السنة الجاية وكانت هتشوف لو هتقدر تاخد اجازة من الكلية بتاعتها ولا لأ ، وقرروا في الاخر انهم يشتركوا حتى للتجربة لان لارا من النوع الخجول شوية وماتعرفش فكرة الصعود للمسرح ومواجهة الناس ، فملهوش اي علاقة ان هدى تبقى خالت لارا انها تفوز ، لكن لارا كسبت عشان هي كانت اكثر واحدة على المسرح بتتكلم بطبيعتها جدا ، وحتى لو هدى اثرت عليا انا ، هل انا هأثر على لجنة التحكيم مكونة من سفير وكتّاب وناس اجانب ، وماينفعش ابوظ سمعتي في حاجة زي كدة ، ومش عيب ان لارا تكسب وتكون خالتها ملكة قبل كدة ، وحصلت قبل كدة في ايطاليا ملكة سنة 87 والدتها كانت ملكة سنة 1957 ممكن تقول جينات ، ورغم كل ده لارا مكنتش المفضلة جدا بالنسبة لي في المسابقة هذا العام
- من هم اكثر فتيات مفضلين شخصيا ليوسف سباهي في مسابقة 2014 ؟
امينة اشرف وبيرهان فطين وسماهر سعد بالاضافة الى لارا دبانة
- بالحديث عن امينة – الملكة الثانية – ، ما تفاصيل رحلتها في مسابقة ملكة جمال العالم بلندن ؟
هي كانت عاقدة شهر هناك وانا رحت اخر 48 ساعة وهما اختاروا 25 بنت من اكثر من 120 بنت ،ففيه بلاد كتير جدا وبنات حلوة جدا مدخلتش بس الحاجة المشرفة ليا هو المشروع الخيري اللي قدمته “امينة” مسجل في فيلم صغير ونافست بيه وكانت المشاريع بتدور حول ان البلاد فيها مشكلة : امية او مرض السرطان والايتام ، فهي اتكلمت عن حاجة معينة وازاي نفكر اننا نعالجها وهما اختاروا اهم 27 مشروع وكان من ضمنهم مصر وده بالنسبة لي كان كافي وفكرته عن الادمان وكيفية وصوله لاطفال الشوارع وازاي ممكن نعالج الموضوع ده
- احكي لنا ما الانتقادات التي وجهت لك وللمسابقة وما هو ردك عليها ؟
الاعلام والصحافة الشريفة هي اللي فيها الرأي والرأي الاخر وللاسف ده مش موجود في جهات كتير لان ممكن وانت بتكتب خبر اد ايه ممكن تأثر في حد او تتكلم عن شرف عائلة او شخص لمجرد انك سمحت لحد انه يتخذك منبر للهجوم على شخص اخر وبغض النظر عن المشاكل اللي ممكن تتسبب فيها
احنا هنا بنتكلم عن انتقاد من شخص واحد بس بيهاجم مسابقة كبيرة زي “جمالك يا مصر لاختيار ملكة جمال مصر 2014” واحب اكد ان المسابقة دي تحت رعاية وزارة السياحة وهيئة تنشيط السياحة لان فيه ناس شككت ان الحدث ليس له صلة بالوزارة وانا ابقى متخلف لو وضعت لوجوهات الوزارة وهي مش معانا وهاعطي الفرصة للناس انهم يهاجمونا ويستغلوا الفرصة دي ووجودي في الليلة قبل النهائية في القلعة اكبر دليل ان الوزارة معايا
بالرجوع للمتسابقة دي كانت بتحاول توصل للشهرة باي طريقة بدليل انها اشتركت في برامج كثيرة وكان هدفها لقب الملكة وللاسف فيه ناس كتير عشان يوصلوا للشهرة لا يوجد لديهم مشكلة انهم يدوسوا على شرف اي حد ، لكن انا هنا بقولها استوب – قفي عند حدك – لانك بتمسي شرف كل البنات اللي اشتركوا في المسابقة وبتمسي شرفي ومهنتي وبتحاولي تفسدي شغلي ومصدر رزقي ، فهي مثلت علينا شخصية مختلفة تماما عن اللي ظهرت بيها دلوقتي فهي كسبت ضمن جوائز الحفلة قبل النهائية لقب مس كونجنيالتي – الفتاة الودودة – وبعد ما كسبت اللقب ده ابتدت شخصيتها الحقيقية تظهر نوعا ما لكن مكنش فيه مشاكل منها لان كان في لسه الحفل الختامي في شرم الشيخ وبعد الحفل الختامي ، والذي دخلت به التوب تن – افضل 10 متسابقات – وبأكد على ده لان فيه كتير قالوا انها من ضمن التوب فايف – افضل خمسة – وكتبوا دموع الوصيفة الاولى وهي دموع التماسيح طبعا لكن الترتيب الثاني في المسابقة بعد لارا هي امينة لكن الوصيفة الاولى هي : هبة هشام ، والتي ذهبت ومثلت مصر في مسابقة ملكة جمال القارات – مس انتركونتينتال – بالمانيا ، لكن اللقب اللي اخدته قالت عليه ده حتة قماش وعلى فكرة في العالم كله اللقب ده هو حتة قماش وجائزة احتياطية من الشركات الراعية والجائزة كانت رحلة لباريس لمدة 3 ايام مقدمة من فندق “سوفتيل” للملكة لارا وللفتاة الودودة المفروض ” ماري منصور ” لكن واحدة شتمت لجنة التحكيم وهما شخصيات مهمة جدا منهم : سفير الارجنتين ومجموعة كبيرة من الاعلاميين منهم : رولا خرسا ، مها بهنسي ، تامر بشير ، دكتورة / نائلة عمارة ، الصحفي / محمد الشبة ، مريم امين ، وشككت فيهم وكان عضو منهم هو ممثل راعي الجائزة طب ازاي هتسافر بعد اللي حصل ده ،
ومن ناحية تانية بتقول ان لارا صديقتها منذ الطفولة طب ازاي كتبتي على الفيس بوك بتاعك : ان البلد دي عمرها ماهتنضف والبلد بقت كلها مليانة صراصير ودبان – استهزاءا من لارا ان اسمها لارا دبانة – فازاي تعملي في صاحبتك كدة وكمان بتشتم في مصر بطريقة غير مباشرة لانها بتتحيز لاصولها الارمينية ، فخط احمر انك تنحازي لجذورك على حساب البلد اللي انت مولودة فيها وبتحملي جنسيتها ،
وانا اتكلمت معاها عن الهجوم ده بعد المسابقة سواء على الفيس او في الجرايد زي الفجر والقنوات زي روتانا مصرية مع الاعلامي / تامر امين وتطرقت لعائلتي واني شغال في المجال ده واسطة معرفش مين جوز اختي ويقرب لمين وعشان كدة لارا كسبت ، فانك تشككي في اللجنة والمتاسبقات وفيا وفي الشركة المنظمة وفي المسابقة ، فراحت قالتلي انا مليش دعوة دي اختي هي اللي بتكتب بس انا هقولها متكتبش ،
وبعد كدة قبل وقت السفر وبعد المسابقة المفروض كل بنت بتمضي على عقد بين الوكالة وبينهم لادارة اعمالهم في الفترة القادمة فكلمتها كذا مرة عشان تمضي العقد فكل شوية تتحجج بحاجة ومتجيش وفي الاخر رفضت تمضي وقالت : انا معروض عليا بطولات وحاجات كتير ، يعني هي هدفها صريح “الشهرة ” ، وقالت : فالعقد كدة مش هيخليني اشتغل ، فرديت عليها وقلت لها : لا العقد ما بيقولش كدة ، لكن بيقول لو انت جالك شغل من جهة تانية فانت بتبلغيني بيها وانا بظبطلك الشغل ده وانا كمان ممكن اجيبلك شغل ، ومكتوب في العقد ان انا ليا من 25 : 30 % من نسبة العقد في حالة اي شغل تم ، وكمان مكتوب في العقد انه لا يحق للطرف الاول – اللي هو انا- اجبار الطرف الثاني – اللي بيمثله المتسابقات – على اي عمل هي غير راغبة فيه او مقتنعة بيه ، وطبيعي في اي مسابقة في العالم سواء كانت تمثيل او غنا او موضة فانت بتشهر المتسابقات اللي فيها عن طريق تدريبهم وتمرينهم واظهارهم على شاشات التلفزيون ، واحنا مش بنعمل المسابقة والبنات بتبقى جاهزة للشغل عشان المكاتب التانية تاخدها على الجاهز وتشغلها واحنا لا نمنعهم انهم يشتغلوا مع المكاتب التانية لكن من خلالنا ويكون الشغل على اد مستوى اسم المسابقة اللي انت كنت فيها ،
ومن السنة الجاية هيتم توقيع العقود قبل بدء المسابقة عشان اللي يرفض يمشي من الاول واحنا اتقدملنا السنة اللي فاتت حوالي 95 فتاة والعدد كان محدود بسبب اننا عملناه في يوم واحد وتم اختيار 20 بنت ومشي لسوء السلوك واتبقى 18 و كل بنت ليها نفس العقد بس بيختلف في بنود حسب الترتيب النهائي للمسابقة فمثلا الاولى و الثانية يجب عليهم انهم يقوموا اعمال خيرية وعليهم ان يسافروا لتمثيل مصر في المسابقات الدولية فكل واحدة ليها إلتزامات محددة وممكن واحدة بعد ما تخلص المسابقة ومدخلتش في التوب تن تقولي انا عايزة اكمل دراستي ومجالي الاصلي ومش هكمل في الفن او الاعلانات فعشان كدة لازم نستنى لغاية اخر المسابقة ونعرف الترتيب وبناءا عليه بيتم كتابة العقد لاننا مش عارفين مين اللي هيكسب في النهاية لان المسابقة مش كوسة
والبنات مش دافعين قرش عشان يدخلوا على الرغم من ان الناس دائما بتقولي انت ليه مابتدفعش اللي بيشتركوا وكمان اللي بيقدموا زي ملكة جمال امريكا مجرد انك تملئ الاستمارة بتدفع 300 دولار لكني قلت اني لا اترك مجال لحد انه يهاجم المسابقة لو دفعت وما دخلتش ،
فهي كانت بتقول انه اتعرض عليها شغل ، طب مين قبل المسابقة كان يعرفك فانت اتعرفتي من البروموهات اللي كانت بتنزل على تلفزيون المحور : انا اسمي كذا وسني كذا صوتولي واتعمل فوتوسيشن ليكي في اماكن مختلفة ، فكل ده وسائل للشهرة فانا جهزتك انك تكوني نجمة ،
و”امينة اشرف” ملكة جمال مصر للعالم لما سافرت لندن قابلت ملكة الهند وعرفت منها ان عقدها خمس سنوات واحنا العقد بتاعنا سنة واحدة ، وده غلط المفروض يبقى اكتر لاني في سنة ممكن اعمل حاجات كتير ليها فتتعرف وتلمع والسنة اللي بعدها يبتدي الشغل يجيلها ،
- هل علم الجميع انهم سيوقعوا عقد في نهاية المسابقة ؟
كلهم كانوا عارفين بيه قبل نهاية المسابقة وانا فاكر اني جمعتهم في الجيم وهما بيتمرنوا وعملنا اجتماع وقلتلهم انه فيه عقد فيه إلتزامات عليكم ، وانتوا بتمثلوا مصر فيه منكم هيسافر مسابقات دولية فازاي بعد كدة هي جاية تعترض على القعد ، والمفروض جائزتها هي السفر لباريس فانا قلتها ماينفعش ما تمضيش العقد لانك مسافرة حاجة برة مصر و جائزتك مش نظارة شمس او علبة مكياج هتاخديها وتمشي ، لأ انت مسافرة بإسم مصر وبإسم شركة “فيس تو فيس” وبإسمي ، رايحة تشاركي في محافل لترويج السياحة لمصر ،ولان الفندق لازم اكون انا مسئول قدامه ان البنت دي تبعي ، فهي ردت وقالت : انا مش هاقدر امضي وبالتالي قلتلها يبقى مش هتقدري تسافري وكان شاهد على الكلام ده زميلتها “يسرا بوهرجة” وانا قلتلها لو فيه بند من بنود العقد تحبي نغيره ممكن ، وفيه كتير من البنات غيرنا في عقودهم نتيجة ظروفهم الدراسية او العائلية فهي قالت : لأ ، لكن في البرنامج قالت العكس قالت هي طلبت تغيير العقد وانا رفضت وده مش حقيقي – مرفق بالخبر صورة العقد –
- كيف فازت بلقب مس كونجنيالتي – الفتاة الودودة – ؟
هي مش ودودة خالص ، والجائزة دي كانت من خلال تصويت داخلي بين البنات مش من لجنة التحكيم وانا احب اوضح فكرة التصويت فازت بيها ازاي ، وده حصري ليك ، احنا كان عندنا 18 بنت في المرحلة قبل النهائية والتصويت تم بحيث كل واحدة تكتب اسم واحدة من اللي موجودين معاها شايفة انها تستحق الجائزة فاللي كتبوا اسمها من 18 : كانوا 3 بنات فقط لكن الباقيين في الترتيب كل واحدة حصلت على صوتين فمش معنى انها اخذت اللقب يعني ان 16 بنت مثلا اختاروها لكن محدش خد 3 اصوات زيها وبالتالي فازت باللقب
- أثيرت بعض الاقاويل على معرفة اسم الفائزة قبل اليوم الختامي بشرم الشيخ ولذلك تم توزيع بعض الالقاب على اسماء اخرى في اليوم قبل النهائي ؟
لو الكلام صحيح مكنتش “امينة” اللي هي “مس ايجيبت وورلد” مكنتش كسبت لقبين ساعتها وكنت سيبتها لليوم الاخير لو عارف انها فازت بالمركز الثاني ، وفي العالم كله ممكن تلاقي واحدة كسبت كذا جائزة ومطلعتش ملكة جمال وتلاقي واحدة مخدتش جائزة وطلعت ملكة جمال ، فالجوائز دي ملهاش دخل في النتيجة النهائية بتاعت المسابقة وانا كصاحب المسابقة وعضو لجنة التحكيم لغاية اخر لحظة مكنتش عارف مين الفائزة لكن من اسكور – نتيجة- كل واحدة شايفه بعرف اتوقع مين هيكون في التوب ثري مثلا وكتير جدا من اللي بيكسبوا ما بكنش مقتنع بيهم بس السنة دي انا مقتنع بلارا
- مَن مِن ملكات جمال مصر السابقات لم تقتنع بها للفوز باللقب ؟
اقدر اقولك انا صريح ومعنديش مشكلة ، مثلا في سنة 2007 – احسان حاتم – ، وفي 2006 – فوزية محمد – انا كنت عايز جدا نسرين امام كنت هموت انها تكسب وانا صاحب المسابقة ومش عارف اعمل حاجة لكنها طلعت الوصيفة الثالثة وانا اتقهرت وقتها ، لاني زيي زي اي حد موجود لاني لو اتدخلت يبقى بضحي بشرف المهنة
- ماذا عن تغير اسماء لجنة التحكيم بين اليوم النهائي وقبل النهائي ؟
طب ما ده احسن ومقصود عشان يكون عندي آراء مختلفة وده بيدي مصداقية اكثر للنتيجة وبالعكس دي حاجة تم شكرنا عليها في وسائل الاعلام الدولية اللي كانت تتابع المسابقة اننا لم نكتفي بسبعة او تسعة اعضاء للجنة لكن احنا لما كنا في محكى القلعة كنا 11 و11 على الجانبين يعني 22 وفي اليوم النهائي كانوا 9 و9 يعني كان عندنا اكثر من 30 عضو في لجنة التحكيم من مجالات مختلفة ومن دول مختلفة وكلهم خبراء في مهنتهم وهما اللي بيحددوا مين ملكة جمال مصر فده شيء يحسب لنا مش ضدنا
- لماذا تم اختيار 3 ملكات ووصيفتين هذا العام ومَن اقترح عليك هذا التغيير ؟
توبة اني اعمل كدة تاني ، ومحدش اقترح عليا ، لكن فيه مسابقات دولية كتير بتتراوح اهميتها وعادة ممكن نفس الملكة نسفرها كذا مسابقة لكن السنة دي اكثرية المسابقات الدولية كانت متزامنة مع بعضها في نفس التوقيت فلو سفرت واحدة اليابان مش هتلحق ترجع عشان تروح لندن ، وعشان كدة قسمناهم وقلت ممكن ده يعمل حماس عند البنات عشان تفوز لانها عارفة انه مش لقب واحد ، بالاضافة اني كنت عايز مصر يتم تمثيلها بشكل واسع في كل المسابقات الدولية بعد فترة توقف للمسابقة المحلية ، لكني اكتشفت ان فيه مسابقات مهمة ممكن نتواجد فيها وفيه مسابقات ضعيفة ممكن نتجاوزها
- هل سافرت بعض المتسابقات من التوب تن بدلا من الفائزات بالمراكز الخمسة الاولى ؟
بالفعل حدث ذلك فمثلا : “سماهر سعد” مسافرة مسابقة “ملكة جمال البحر المتوسط” بقبرص ، و”بيرهان فطين” كان ترتيبها السادسة سافرت لمسابقة مس انترناشونال – ملكة الجمال الدولية – باليابان بدلا من الترتيب الخامس وهي الوصيفة الثانية “شيماء بكر” نتيجة سفرالاخيرة للاقامة بدبي
- هل الفائزات الخمسة جميعهم وقعوا على العقد ولو الاجابة نعم فكيف لم تسافر شيماء لمسابقتها ؟
كل اللي سافر مضى على العقد ومش بس الخمسة ، وجزئية انها لم تسافر ، ده بيثبت اد ايه احنا متفاهمين ، فشيماء لو سافرت هيحصلها مشكلة في الاقامة بتاعتها ففكرة الاجبار مش واردة لانه مادام فيه عامل قوي هيضر بالبنت طب البند يتنفذ ليه ، فمثلا الفائزة الاولى / لارا “ملكة جمال مصر للكون” غيرنا لها بند في العقد عشان دراستها في بيروت ونتيجة تواجدها في المسابقة معانا في مصر راح عليها الترم الدراسي هناك ودلوقتي لازم تسافر تمثل مصر برة فوالدتها كانت قلقة من العقد انه هيخليها متكملش دراستها فغيرنا بند في العقد انها بعد رجوعها من مس يونيفرس – مسابقة ملكة جمال الكون – هي حرة تسافر تكمل دراستها في بيروت ولو فيه اي إلتزامات للقب مس ايجيبت – ملكة جمال مصر – واحنا محتاجينها في شغل او عمل خيري معين لو الوقت مناسب ليها ومش هيضر دراستها تيجي لو لأ مفيش مشكلة فاحنا متفاهمين جدا
- قيل ان الشرط الجزائي بالعقد مبالغ فيه ؟
فعلا زي ما البنت اياها قالت هو شرط جزائي ضخم ، هو 10 الاف جنيه !! يعني الرقم ده مقارنة بالشروط الجزائية في اي برنامج او مسابقة تانية لا يذكر وهي قالت انها مكنتش تعرف وده مش حقيقي
- هل ترى ما يحدث الان نوعا من انواع اكتساب الشهرة التي كانت تسعى لها ولم تتحقق نتجية خسارة اللقب ؟
طبعا طبعا ، وهي قالت جملة > انا سألت يوسف : قولي مين من البنات اللي قبل كدة طلعت الخامسة او السادسة وبقت مشهورة ؟ وقالت : اني وقفت قدمها ومعرفتش ارد ، وانا هرد اهو وعندي امثلة : “اروى جودة” دخلت المسابقة ومكسبتش و”نسرين امام” و صفا تاج الدين – بطلة فيلم اوقات فراغ- و”هبة مندور” واللي بقت مذيعة – حيلهم بينهم كمان وكمان – ، “مها بهنسي” دخلت وبقت مذيعة ، ففيه ناس كتير دخلت المسابقة ومكسبتش واشتهرت ، فهي من الجملة دي كان هدفها الشهرة فبالتأكيد قالت لنفسها : أنا مخدتش لقب ودلوقتي مفيش رحلة باريس طب هاشتهر ازاي وعايز تمسك شغلي كمان ؟!
- ما هو هدف البنت حين تتقدم لمثل هذا النوع من المسابقات ؟
فيه ناس بتدخل عشان شهرة ودول عددهم كبير وفيه ناس داخلة تكتسب ثقة بالنفس لمجرد انهم يقدروا يقفوا على مسرح وامام حكام وجمهور يتكلموا ويعرفوا انفسهم ، ففيه ناس قالت لي انهم كانوا بيروحي مقابلات شغل – بعيد عن الموديلينج والتمثيل – ويفشلوا فيها لكن لما دخلوا المسابقة اتعلموا ازاي يقابلوا المسئول عن توظيفهم
- وهذا ظهر للجميع حين سُئلت احدى المتسابقات عن ماذا ستفعلين لو علمت انكي ستموتين بعد ساعة ؟ وردت فعل المتسابقة والتي تفاجأت ؟
تفاجئت بسبب ان السؤال ده اتسأل قبل كدة سنة 2005 لكن الاعلامية / مها بهنسي اللي سألته متعرفش ده وهي قالته بطريقة تانية لكن بنفس المعنى ، واحنا دائما بنمرن البنات بكمية من الاسئلة اللي اتسألت في المسابقات الدولية والمصرية على مدار السنين اللي فاتت عشان يكون عندهم فكرة عن نوعية الاسئلة اللي ممكن تتسأل ، ففي 2005 “ملكة جمال صربيا” كانت عضو لجنة التحكيم وسألت واحدة من البنات تعملي ايه لو ده اخر يوم في حياتك ؟ فرديت وقالت : هقضيه مع كل الناس اللي بحبهم وبعدها بشهر البنت دي عملت حادثة وماتت ووقتها كلنا انهارنا ، واحنا حكينا الحكاية دي للبنات فلما السؤال ده اتسأل للبنت واللي هي “بيرهان فطين” فهي اتخضت وخافت على نفسها وباقي البنات لو الكاميرا جابت وشوشهم خافوا عليها يحصلها زي اللي حصل للبنت في 2005 ، وبعد المسابقة ما انتهت كان المفروض “شيماء” هي اللي هتسافر طوكيو وبالصدفة هي مقدرتش تسافر وسفرنا “بيرهان” فكلنا قلنا القدر هيلعب لعبته وبدل شيماء تروح بيرهان فكنا قلقنين جدا لغاية ما الطائرة وصلت وخلصت المسابقة ورجعت
- لماذا تم تغيير القسم الخاص بملابس السباحة في المسابقة وتحويله لملابس رياضية ؟
دي كانت فكرتي وعلى فكرة مسابقة مس وورلد – ملكة جمال العالم – اللي كانت في لندن السنة دي المنظمين برضوا قرروا انهم يلغوا مسابقة ملابس السباحة لانها مش من الاساسيات لانهم بيهتموا بحاجات تانية ، ومس يونيفرس – ملكة جمال الكون – بتهتم باللياقة البدنية اكثر ، لكن احنا السنة دي فكرنا ان فكرة المايوة – واللي انا مش ضدها خالص لان مخي متفتح جدا- بس انا مكنتش عايز كتير من الناس ينتقدوا الموضوع ده بطريقة مش لطيفة لان المايوة بيبقى على البحر لكن على المسرح ؟! ومع ان السنة دي كان النهائي في شرم الشيخ فكان من الطبيعي جدا اني اعمله لكني فكرت اركز على اللياقة البدنية للبنت وابعد عن فكرة الغريزة الجنسية فانا ابحث عن فتاة رياضية ، فاللبس كان بنطلون رياضي تايت – ضيق- وتانك توب ، فباين ان جسمها رياضي ولا لأ ، واحنا بنحاول نظهر مصر باحلى صورة ، وللاسف صورة المرأة المصرية برة وحشة جدا جدا على اسوأ ما تتخيل ، لان المرأة المصرية بالنسبة لهم المرأة الطخينة اوي اللي على طول بتعمل الكرنب ، وانا لسه منزل على الفيس صورة بقارن فيها بين “لار”ا وبين “منى” بتاعت برنامج “عربز جوت تالنت” واللي رايحة تمثل مصر امام الوطن العربي فازاي قناة زي “ام بي سي” توافق على اشتراك واحدة زي دي في البرنامج وتسافر بيروت وتقدم اللي قدمته ده فعلى اي اساس وافقته عليها ، عشان كدة احنا لازم نحسن صورة الشعب بتاعنا لازم نحاول نحسن جمالنا
- هل ترى انهم يريدون ارسال رسالة من خلالها اننا مازلنا جهلاء ؟
مش عارف ، بس ليه دائما نحاول اظهار اننا ناس معندناش لغة ، فمثلا انا كنت عضو لجنة تحكيم في مسابقة اسمها “ميشن فاشون” كانت على قناة “إل بي سي” تبع مصمم الازياء / ايلي صعب لمدة 3 مواسم متتالية وانا كنت المصري الوحيد في اللجنة وكلهم يا لبنانيين او ضيوف فرنسيين ، فكنت بعلق على حاجات فعشان فيه اجانب وانا بتكلم الحمد لله 5 لغات : انجليزي وفرنساوي واسباني وايطالي وعربي ، فكانوا بيقولوا انت منين اقولهم من مصر يقولولي : هو في مصر بيتكلموا لغات ؟! احنا كل اللي بنشوفه في التلفزيون ناس زي “فيفي عبده” ، فالفكر المأخوذ علينا ان مصر محدش فيها بيعرف لغات وان ستاتها معندهمش رشاقة ، فانا شايف انه لازم يبقى فيه كدة وكدة لان مصر فيها كدة وكدة وماينفعش يبقى الفوكس – التركيز – كله على كدة الوحش
- هل اللغة عائق امام اي بنت عايزة تقدم في المسابقة ؟
احنا لا نمنع احد من دخول المسابقة لو معهوش لغة لكن يكون عنده مواصفات تانية كتير ، فازاي هاخد واحدة مابتتكلمش لغة وقصيرة وطخينة واخلاقها وحشة ، لكن ممكن اخد واحدة مخها زكي جدا ومتفوقة في دراستها ووشها مقبول وللاسف مابتتكلمش لغة ، فهناك بعض الدول زي: فنزويلا واسبانيا ودول كتير من بلاد امريكا اللاتينية مابيتكلموش لغة تانية غير الاسبانية فبيبقى للبنت الحق ان يكون ليها مترجم بس هتكون مشكلتها انها مش هتعرف تتواصل مع زمايلها اوي وتكون صداقات ، لكن مفيش اجبار انها تعرف انجليزي لانه من حقها وجود مترجم ، بس انا بشوف انه احلى اننا نوري اننا عندنا بنات بتتكلم لغات ، واحنا كذا سنة قبل كدة قدمنا ناس مكنش معاهم لغات زي : هبة السيسي – ملكة جمال مصر 2004 – ورغم ده لما راحت مسابقة “ملكة جمال الكون” في الإكوادور بامريكا الجنوبية ، سفير مصر هناك كلمني وقالي : مسئولين المسابقة كلموه وبيقولوله البنت المصرية هايلة وعايزينك تحضر المسابقة ، فبرغم اللغة الا انها اثبتت نفسها بروحها الحلوة ، لكن لو البنت المصرية معاها لغة فدي ميزة اضافية تقدر تخليها تنافس مع الباقيين
- ماذا يقدم يوسف سباهي للفائزة بلقب ملكة جمال مصر ؟
احنا بنقدم حاجات كثيرة هدايا وسفر وفرص للدخول في مجال الازياء والفن زي التمثيل مثلا لكن “لارا” مش عايزة ده دلوقتي هي عايزة تكمل دراستها ، فمثلا تارا عماد – بنت الزعيم في مسلسل صاحب السعادة ، ملكة جمال مصر وافريقيا للمراهقات 2010 – من زمان وهي عندها 11 سنة وهي معايا هنا في الوكالة لدرجة انها لما كبرت بقت تدرب كورسات للموديلز اللي بيقدموا هنا فلما “عادل امام” كان عايزها معاه في المسلسل والدتها كلمتني رغم ان العقد بتاعها منتهي لكن بتكلمني تأخد رأيي وبدون اي ماديات
- وفي ختام حديثي معك ، ماذا تقول لكل بنت تريد ان تشترك معك في مسابقة ملكة جمال مصر 2015 ؟
متخافيش من اللي بيتقال انا وكل فريق شركتي بنظم المسابقة دي من سنين ولنا سمعتنا في الوسط المصري والعالمي ولو شايفة انك ممكن تمثلي مصر في الخارج وعايزها تبقى احسن وعندك الفكر ده تعالي وقدمي ، وبقول لكل الاهالي بناتكم في ايد امينة مع “فيس تو فيس” ولا تستمعوا لمروجي الاشاعات والتجربة خير دليل واخيرا انا بتمنى التوفيق لملكة جمال مصر 2014 “لارا دبانة الصفدي” والتي تشارك في مسابقة “ملكة جمال الكون” نهاية هذا الشهر بالولايات المتحدة وترفع اسم وراية مصر ورأس المرأة المصرية فوق
حضر المؤتمر : من متسابقات 2014 : سماهر سعد واختها خلود ، يسرا بوهرجة ووالدتها مدام / هبة ، بيرهان فطين ووالدتها مدام / منى ، انجي سمير ، امينة اشرف – ملكة جمال مصر للعالم 2014 – ووالدتها مدام / ريم ، سارة محمد “والتي ستمثل مصر في مسابقة توب موديل – احسن عارضة ازياء -” ووالدتها مدام / سميرة ، مس فوتوجينيك – الفتاة الوسيمة – : مروة طلعت ، بالاضافة الى : الفنانة / ياسمينا اغاخان ، استاذة / ميسون محمد ” مسئولة تجهيز المتسابقات ” والمنسق الصحفي للوكالة / كريم حسين
يذكر ان المتسابقات الذين سيمثلوا مصر في الخارج هم :
- لارا دبانة – ملكة جمال مصر للكون 2014 – وستشارك يوم الاحد 25 يناير الجاري في الدورة الـ 63 لمسابقة “ملكة جمال الكون Miss Universe ” من دورال بولاية ميامي في الولايات المتحدة الامريكية والتي ستبث على قناة NBC وستقوم الفنزولية ملكة جمال الكون العام الماضي / غابرييلا إسلر بتسليم الجائزة هذا العام ، و ملابس “لارا” هناك من تصميم مصممة الازياء المصرية / ديانا شعبان
- امينة اشرف – ملكة جمال مصر للعالم 2014 – وقد شاركت في التصفيات الاولى بمسابقة “ملكة جمال العالم” بالعاصمة البريطانية لندن
- نانسي مجدي – ملكة جمال مصر للارض 2014 – وقد شاركت بمسابقة “ملكة جمال الارض” بالفلبين واستطاعت ان تكون في التوب سكيستين – افضل 16 فتاة –
- هبة هشام – الوصيفة الاولى مصر 2014 – وقد شاركت في مسابقة “ملكة جمال القارات” بألمانيا
- بيرهان فطين – المركز السادس مصر 2014 – وقد شاركت في مسابقة “ملكة الجمال الدولية” بالعاصمة اليابانية طوكيو
- سماهر سعد – المركز السابع مصر 2014 – وتشارك حاليا في مسابقة “ملكة جمال البحر المتوسط” بدولة قبرص
