قصة رفض نجيب الريحاني نيشان الملك فاروق.

 حكت الفنانة مارى منيب قصة عن نجيب الريحانى قالت أن مرة حضر الملك فاروق عرض لفرقة الريحانى فى مسرح عابدين وبعد العرض أحمد حسنين باشا رئيس الديوان الملكي  قابل الريحانى وقاله جلالة الملك انبسط وضحك من العرض وأمر بمنحك نيشان النيل من الدرجة الخامسة ، والنيشان محدش حصل عليه غير فرقة سيرك أولاد عاكف ..

150 جنية كانت معونة الحكومة لمسرحه ف الوقت اللى كانت معونة يوسف وهبى من الحكومة بتتجاوز 400 جنية .. يوسف وهبى وسليمان نجيب حصلوا على البكاوية ،وعاش الريحانى حياته كلها أفندى صعلوك مجنون بفنه ومسرحه لحد ما أصبح رائد من رواد فن الكوميديا ، وللاسف فيلسوف السينما المصرية ف  نظر الملك مجرد مضحكاتى ..

رد الريحانى على أحمد حسنين باشا وبشئ من المرارة قاله :  المرة دى أنتم ساويتونى ببهلوانات ، وأن شاء الله المرة الجاية تبقوا تجيبوا قرداتية يحيوا معايا الحفلة .. يا باشا يفتح الله أنا ف غنى عن النيشان.