الاعلامي عمر أنور يكتب… “أنا… والصندوق..!!”

رغبه مني ومن كثيرين في رفع الحرج عن رئيس الوزراء والوزراء وكل سادتنا من كبار المسؤلين انهم ياخدوا اجراءات تجرح مشاعر شعبهم الرقيقه, وبرغبه اكيده من داخلي بدافع وطنيتي وغيرتي علي وطني وبكل اريحيه وراحه نفس فقد قررت كما يقول المثل …ابدأ بنفسك.

ان اضع لنفسي خطه خمسيه طموحه ….لا كخطه السيد وزير البيئه لزياده ضريبه جمع القمامه…. وانما خطه بسيطه ومريحه ووصحيه ايضا تناسب ظروف مرحله عنق الزجاجه التي تعبرها بلادي….مع اني اكتشف بعد ستين سنه ان الزجاجه التي نعبرها هي عنق فقط ليس الا…..واهو برضه حته خبث مني واضيع علي صندوق النكد الدولي فرصته لخنقنا والتنكيد علينا وفرصه برضه نبعد عينه الوحشه عن صناديقنا الخاصه واللي زي لهطه القشطه وماحدش راضي يفتحلنا ابوابها يمكن ينوبنا لهطه زي اسيادنا اللي شغالين لهط فيها ليل نهار وما بيشبعوش ولا اي حد عايز يتكلم عنها مع انها زي ما بيقولوا اخواننا البعدا فيها فوق 100 مليار جنيه مش عارفين بيروحوا فين ولمين….اه لو صندوق النكد عرف طريقها….ماهي الصناديق برضه بتغير من بعض….كان شحتف حكومتنا ونكد عليها

ماعلينا حكلمكم عن الخطه النميسه اللذيذه:

أولا…. بالنسبه للأكل فقد قررت مبدئيا الاستغناء عن وجبه الفطور وممكن الواحد يجوع شويه لغايه الغدا ما يستوي واهو برضه المعده بيت الداء فلنريحها قليلا واهو كله في سبيل صحه احسن .

بالنسبه لوجبه الغداء فقد قررت وتخفيفا علي المعده الاعتماد علي هياكل الفراخ سعرها رخيص ومتوفره جدا نظرا لحب سادتنا الاغنياء والكبار في اكل الفراخ بانيه…يعني مشفيه بس بيدلعوها شويتين لزوم التعليم الفرنسي……ويفرق ايه ناكل الهياكل ما كلنا حنبقي هياكل في القبر ولحمنا حايكله الدود يبقي نعود نفسنا علي عيشه القبور واهو كله بثوابه, يعني اللي كلوا فراخ كامله عملوا ايه….ما كله للدود ..كمان صحيه ومافيهاش اي دسم لزوم الكوليسترول يعني الفايده من كل ناحيه….وادينا بناكل لحمه 30 يوم في رمضان في موائد الرحمن وكمان بناكلها في العيد الكبيرمن صدقات الاضحيه.. وبلاها سمك وكائنات بحريه غريبه زي الجمبري والاستاكوزا والسي فوود والحاجات الغريبه دي… وبعدين يكفي ان السمك المستورد بيقولونا انه متربي في ميه مجاري كوريا وفيتنام….يعني ناكل سمك ونضر نفسنا …كفايه علينا مجاري مصروخضارها وفاكهتها ولازم برضه نشجع المنتج المحلي, وعلي رأي امي…..ألحس مسني وابات مهني ولا كبابك اللي قتلني….والله كان عندها رؤيه وبعد نظر الله يرحمها.

اما العشا فأمره سهل فول وطعميه وبطاطس ….بس فول ندمسه في البيت لأن فول بره وحش وغالي شويتين تلاته خليها بيتي واهو شويه ملح كويسين وشويه كمون وهيلا بيلا ندب الدبه المتينه وبلاش طعميه لأن القرص في احسن الأحوال بنص جنيه …حاتقولي بيتي برضه لأ هنا تفرق يا ناصح لانها محتاجه زيت والزيت غالي جدا مع انه من بقايا مصانع الشيبسي الليتر بجنيه وبيتعاد تكريره ببعض الاضافات ويتباعلنا بعشره وخمستاشر جنيه واهو معدتنا بتهضم الزلط برضه يعني عادي انشالله يكون زيت مجاري…..وبعدين الطعميه بتحتاج تتسوي علي النار والغاز بقي غالي مع ان حكومتنا خفضت سعر الغاز لمصانع الحديد واصحابها الغلابه اللي يجوز عليهم الصدقه….يبقي خلاص نمشيها فول بالملح والكمون كفايه من غير اي اضافات لأن الاضافه والمضافه (ماقصدش اي ضريبه طبعا) من عمل الشيطان.وممكن من باب الاريحيه ناكل معاه عيش بس من غير نقاط لأني منقوط ومش فاهم ايه حكايه النقاط وقلت في نفسي يمكن حيقلبوا العيش زي الدوري بتاع الكوره واللي يكسب يفطر ويتغدي ويتعشي واللي يخسر يبات من غير عشا واللي يتعادل كفايه عليه الغدا بس يمكن دي نظريه نقاط الخبز اللي فاتحه بيوت حراميه كتير…..وبكده نبقي خلصنا اهم حاجه وهو الاكل …..لا تقولي شاي ولا حاجه ساقعه كفايه ميه النيل اللي الخواجات بيشربوها ومايرجعوش تاني مع انها ملوثه وبتدي مناعه ضد الامراض ومليانه بالمعادن من الصرف الصناعي يعني لا تقوللي فيتامين ولا حديد ولا كلام فارغ ميه النيل وجبه كامله متكامله بروتينات وفيتامينات واملاح ومعادن .

اما بالنسبه للحاجات الباقيه التافهه زي تعليم الاولاد فكفايه عليهم يتعلموا صنعه ونرجع العصر الذهبي للاسطي بليه وبلاها مصاريف مدارس وجامعات ودروس وكتب وحاجات من اللي مالهاش لازمه لان الولاد بعد كل دا بيطلعوا اغبياء ومابيفهموش ولا حتي يعرفوا يقروا او يكتيبوا…..يبقي بلاها تعليم يعني هو الشغل مستنيهم علي باب الجامعه مثلا بلا خيبه…

اما بالنسبه للعلاج فدا اصبح من الرفاهيه مالوا الاسبيرين والليمون الدافي للبرد واربط دماغك من الصداع وطلق مراتك علشان ضغط دمك يتظبط وابعد عن البيت والعيال والعيش والعيشه واللي عايشينها ونعناع للمغص او كمون ….ارجع للطبيعه ونعيش عيشه اهالينا وعمرك ما تحتاج دكتور ولا دياولو… يعني هما الدكاتره بقوا يفهموافي الطب او المرض ….بلاها علاج … والامراض المزمنه اللي زي الكبد والسرطان والفشل الكلوي والشرايين والقلب والسكر اهو نسيبهم لنصيبهم والبقاء للأغني….او نبعتهم بطريقه غير شرعيه يتعالجوا في ايطاليا زي طفل كفر الشيخ بس شوفولنا طريق شرعي وقانوني للهجره الغير شرعيه لانها بقت غاليه علينا واهو برضه نخف من عددنا اللي تاعب الجكومه وبتذلنا بيه مع انه زي ما درسنا اسمها الثروه البشريه بس من امتي الدراسه والتعليم بنصدقهم دا حتي الامتحانات بالاجابه النموذجيه الحكومه بتنزلهم علي النت ماهي حكومه الكترونيه بقي.. بس يطمر فينا.

اما بالنسبه لباقي متطلبات الحياه من مواصلات ولبس ومصاريف نور وميه وزباله وصرف صحي وقيمه مضافه ومكوه وغسيل ونضافه وايجار ونت وتليفون وكل الحاجات العبيطه دي فليها كلام تاني وحلول عبقريه ومخ كبير وانا قاعد اخخطط وامخمخ لغايه المقاله الجايه …..مع.تحياتي للمواطنين الشرفاء.

دا احنا اللي غلبنا الصندوق