ساميه عابدين تكتب… “انزل ابني بلدك..”

هيكون يوم جمعة..عارف تنزل تروح فين؟خد اسرتك واهلك وروح اتفسح في بلدك الجميلة وصور احلى مكان تشوفه ونزل الصورة ع النت واكتب نبذه عنه..اعمل رواج للسياحة الداخلية ويمكن الخارجية ربنا يكرم وترجع….او روح زور قرايبك وانوي انها صلة رحم تاخد عليها ثواب…..الاصلاح مش لازم يكون بالهتافات والتجمعات والفوضى….الاصلاح بكلمة حق طالعة من القلب ..الاصلاح الفعلي ان كل واحد فينا يخلص في شغله …الاصلاح الحقيقي انك تبدا بنفسك وتراعي ربنا وتواظب على عباداتك وتدعي من قلبك سواء كنت مسلم ادعي ف سجدة ف اي جامع..او مسيحي ادعي ف كنيستك واصرخ وقول يارب اكشف عنا البلاء والغلاء…..يارب ارفع مقتك وغضبك عنا…خلي انتمائك لتراب وطنك وهواه وحدوده ..علم ولادك ان الدفاع عن الارض شرف ورفعة وكرامة…خدهم ف اليوم ده البانوراما مثلا وفرجهم على نصر اكتوبر …وكلمهم عن عدو صهيوني غاشم طردناه من سينا وكلمهم عن زعيم الحرب والسلام الشهيد الراحل محمد انور السادات…..لو انت اعلامي راعي ضميرك واتكلم بس في الحق انتقد السلبيات باعتدال وبدون تجني على حد…واتكلم عن الايجابيات بدون نفاق ولا تطبيل ….تعالوا نخلي اليوم ده عيد وبداية من جديد ننويها من قلبنا اننا نخلي مصر فوق الكل …..بس من غير مانعطل مصالح الناس ولا نوقف حال البلد ..كفاية اللي خسرناه…