جريدة أحوال مصر
نتيجة الاحداث الارهابية الاخيرة لشق الصف المصري
اطل علينا الشاعر الشاب محمد فضالي باحدث قصائده بعنوان “كمت” وجاءت كلماتها كالتالي :
(كِمت)..
يوم عيدكم وعيدنا
جوه بيتكم وبيتنا
عدت سحابة سودة
لأجل ماتفتت وحدتنا
الجمعة ضربوا المسجد
الأحد ضربوا الكنيسة
يومها أحمد استشهد
وكمان زيه عيسى
عند جامع السلام
وف وسط الزحام
نفس السحابة السودة
وفجأة حل الظلام
في محيط العباسية
في شارع الكاتدرائية
نفس السحابة السودة
طالت كنيسة البطرسية
يامصر يام الأديان
يا شرف كل الجدعان
مسلم أنا أو مسيحي
كلنا ولادك شجعان
الدم هنا أو هناك
متفرقوش من بعضه
كلنا يا وطن فداك
مالإبن دايما فدا أمه
إن كان الدم دم قبطي
ماهي الروح من قلب كمتي
عشانك يابلادي أزيد وأزود
وقبطي من كمتي ومنها جت إيجيبتي
وإن كان الدم دم مسلم
روحه كمان من كمتي
وكل المصريين في الأصل قبطي
وقبطي من كمتي ومنها جت إيجيبتي
نفس الملامح هي هي
إن كان في الهرم ولا العباسية
الأرض واحدة والسما واحدة
ومصر المسلمة كانت قبطية
الخاين بينا مالوش مكان
لا له أرض ولا عنوان
مسيره يبهت ويخفت
مصيره دايما دايرة النسيان
يا فكر ملكش أمان
يا كاين تملي جبان
دايما تخون..ويهون
عليك الوطن ودم الإنسان
دايما ناكر للجميل والمعروف
لو فاكر إنك بتزرع خوف
وإنك هتجبرنا ع الطوف
تبقى غبي عديم الشوف
دايما بتنسى الحضن اللي أواك
وتترمي في أحضان اللي جفاك
فكر مرة .. قبل ماتحرق
وشوف مين إداك ومين مادّاك
لو فاكر إني منك خايف
لا..يبقى انت مش شايف
مهما حرقت .. مهما خربّت
آسف..حزامك الناسف زايف
يا عيون أطفال قافلاها الدموع
يا قلب أم على ابنها موجوع
نظرة للسما وإيد بدعوة
تشفي قلوب وتنور شموع
عيون بتبكي..دموع بتنعي
عيون تخون..شموع بتطفي
وقلب موجوع وروح بتروح
وعمر جاي وعمر بيمشي
يا مصريين خليكوا إيد واحدة
خليكوا دايما مثل لكل وحدة
ارسموا نهار من ورا الستار
ارفعوا دايما شعار إيد واحدة
مش بقولك متدمعش..
الدمع بيهون
مش بقولك متتوجعش..
الوجع بيهون
لكن بقولك ابتسم
ضحكتك لما بتترسم
رهبة في قلب العدو
وف نفسه ميت مرة بيتهزم
وف نفسه ميت مرة بيتهزم
ابتسم ،، ابتسم
محمد فضالي (13/12/2016م.)
