(رولا اسير) تحتفل بعيد ميلادها رغم الحظر ، وتدعو لمصر برئيس مثل السيسي او اقوى منه

اقامت الفنانة الشابة / رولا اسير مساء الاربعاء الماضي حفل عيد ميلادها والذي استمر من الساعة 9 مساءا الى الساعة 6 من صباح يوم الخميس تنفيذا لحظر التجوال المفروض على انحاء الجمهورية في حديقة احدى فيلات العبور

بدا الحفل على انغام الدي جيه وتوافد الحضور على فترات متباعدة نتيجة الاحداث الساخنة التي شهدتها منطقة المهندسين بالجيزة ودخول الحظر حيز التنفيذ فما بين الرقص على البيست و تارة وبين الجلوس على حمام السباحة تارة اخرى وتبادل الحضور الادوار بعد تقطيع التورتة واخذ الصور الفوتوغرافية للذكرى ، فكان بمثابة داي يوز ، فكانت ليلة ممتعة ابهجت جميع من حضروا

فكان بالامس عيد ميلاد رولا وبعد الغد عيد ميلاد ابنتها (حبيبة) فكان العيد عيدين وكانت الهدية الكبرى بعد استيقاظ الحضور بعد انصرافهم من الحفل صباحا ونومهم ; هي القبض على بعض قادة الاخوان الهاربين من الملاحقة الامنية

وكان لنا هذا الحديث مع نجمة الحفل رولا اسير :
*من هي رولا اسير ، وهل لعائلتك جذور فنية ؟
انا رولا بنت محمد اسير الدين ، وجدتي حفيدة احمد باشا عرابي ، عم والدتي هو الفنان الكبير/ محمد السبع ، وكان رافض فكرة دخولي المجال الفني

*كيف كانت بداية رولا ودخولها مجال التمثيل ؟
بدايتي كانت في سن السابعة تقابلت مع المخرج الكبير / عاطف سالم وكان يحضر لفيلم (سفروت وسفروتة) ولكن الفيلم توقف لاسباب انتاجية ثم في سن العاشرة شاهدني الفنان الراحل / احمد مظهر وكنت في حينها احب ركوب الخيل وكان الدور يتطلب ذلك ولكن لم يكن مكتوب لي حينها ان ادخل المجال ، مرت السنين وحلم التمثيل مازال يراودني وكنت اذهب لشركات الانتاج ومكاتب الكاستنج ، حتى 2007 تم اختياري كموديل لاعلان هشام عباس لشركة كوكاكولا ، ومن بعده انشغلت في دراستي للارشاد السياحي وتزوجت وانجبت ابنتي الوحيدة (حبيبة)

*ربنا يخليهالك ،هي في سنة كام دلوقتي ؟ وما هو سر نجاحك في الرجوع في الفترة القصيرة دي وبعدك عن السياحة؟
عندها 8 سنين وهي لسه مخلصة تانية ابتدائي وعيد ميلادها بعدي بيومين
والسر اني عشرية وبحب يكون ليا علاقات بناس كتير، السياحة درستها لكن الفن بحبه فاشتغلت الحاجة اللي انا بحبها

*وبعد الاختفاء ده ، كيف كان الرجوع ؟
من حوالي 4 سنوات رجعت مرة اخرى للمجال بمشاهد بسيطة كان اولها مسلسل (فرح العمدة) 2010 بالصدفة كنت بعمل كاست لمسلسل (شيخ العرب همام) في الهرم وحد اتصل بي وقالي تعالي استوديو المغربي ، فذهبت عملت تيست وخدوني في دور سكرتيرة لبنانية وكان فتحت خير عليا والفضل يرجع لـ ا/ احمد صقر – المخرج الكبير- لاني بعد كدة اشتغلت معاه في (كيد النسا) ج1 في دور الفلاحة اللي بلغت عن جوزها تاجر المخدرات ومسلسل (حارة خمس نجوم) ، في دور صحفية متنكرة بتكشف الفساد اللي بيحصل في المستشفيات الحكومية ، والدور ده كنت عملاة مجاملة عشان كان نفسي اشتغل مع قطاع الانتاج

*عشان تابع للدولة ! ما هي الاعمال اللي صورتيها بعد كدة ؟
بعدين صورت مسلسل (بنات في بنات) بطولة: رانيا فريد شوقي وهو حلقات منفصلة متصلة كنت عاملة حلقتين : واحدة كنت مذيعة وواحدة كنت زميلة رانيا ، وبعدين اتعرض عليا سيت كوم (البنسيون) اخراج/ ممدوح شاهين في دور حفيظة بنت ميمي جمال 2012، ومسلسل (قضية معالي الوزيرة) في دور عاملة باديكير بتساعدها مدام/ الهام شاهين هي وخطيبها عشان يقدروا يكملوا حياتهم ، ومسلسل (الدالي) ج 2 ، ومسلسل (موعد مع الوحوش) مع الفنان الكبير /عزت العلايلي في دور عشيقته ، ومسلسل (العنيدة) اخراج/ عادل الاعصر وبطولة ميس حمدان في دور دكتورة ولكنه لم يكتمل بعد

*ما هي اعمالك التي عرضت في 2013؟
اخر اعمالي كان مسلسل (المنتقم) وعرض 2012-2013 وهو120 حلقة اخراج/ حاتم علي ، ومسلسل (طيري يا طيارة) بطولة: بوسي واخراج/ ضياء فهمي واللي عرض في رمضان 2013

*هل قدمتي عروض مسرحية من قبل؟
كنت هشتغل في مسرحية (سلقط في ملقط) لكن ظروف شغل الفيديو منعتني من ده مع المخرج/ اميل شوقي ، وفيه نص معروض عليا دلوقتي وهو (احدب نوتردام) والمخرج بتاعه شاف اني فيا ملامح اغريقية فعرضه عليا ، وشرف ليا اني اشتغل مسرح بس انا مركزة في الدراما عشان اقدر اوصل لكل الناس في بيوتها الاول فيعرفوا مين رولا اسير وبعدين تيجي السينما والمسرح

* ما مدى رضاءك عما حققته من مشوارك الفني حتى الان؟
كل الحاجات اللي عملتها راضية عنها ومحتاجة اخذ ادوار كتير لان اللي جوايا لسه ماطلعتوش

*من المخرج الذي تطمحين في العمل معه ؟
حلم حياتي اشتغل سينما مع المخرج الكبير/ داوود عبد السيد وا/خالد يوسف وساندرا نشأت ، اما الدراما فانا وقفت قدام عتاولة مخرجي الدراما : شيرين عادل وجمال عبد الحميد ويوسف شرف الدين وعادل العصر واحمد صقر ، بس نفسي اشتغل مع محمد سامي وا/ محمد النقلي وا/ مجدي ابو عميرة

*من الممثل الذي تحلمين فب العمل امامه ؟
اموت واشتغل مع الزعيم/ عادل امام

*من هي المثل الاعلى لـ رولا ؟
نفسي اكون زي هند رستم في دلعها وانوثتها ونعومة شادية وهدوء فاتن حمامة وبعشق جاذبية سهير رمزي وخلطة سعاد حسني ، ومن النجوم الحاليين : بحب غادة عبد الرازق لانها حوت تمثيل ومي عز الدين وطبعا يسرا وليلى علوي والهام شاهين

*ما رأيك فيما يعرض من افلام بالسينما المصرية الان ؟
بكره الافلام التافهة ، انا اشتغلت في فيلم (نور عيني) اخراج/ وائل احسان وانتاج محمد السبكي في دور صاحبة اسلام اخو تامر حسني
ومتقدرش تقول ان افلامه تافهة فيه وفيه حسب ظروف الفيلم والسوق

*كيف كان تعامل السبكي معك ؟
انا كنت رايحة يوم التصوير خايفة من اللي بيتقال عليه لكن بالعكس خالص طلع طيب جدا معمليش اي حاجة وحشة وعاملني زي بناته بالظبط

* في مسلسل (العار) كان دورك احدى مضيفات الكباريه ، هل توافقي لو عرض عليكي دور به مشاهد جرئية ؟
بحب اعمل ادوار غيرمبتذلة ، مابحبش كلمة مشاهد جرئية انا بشوف هل دراما الدور تحتاج لده ولا لأ ، انا عملت اغراء قبل كدة في العار ومكنش مبتذل ،على حسب الدور ورؤية المخرج ، انا ممثلة اجسد اي شخصية ولا اضع موانع في المطلق

*ما رأيك فيما يحدث الان في سورية ؟
بخصوص سوريا كنت وقعت على بيان بشأن الاحداث هناك من سنتين انا و 160 فنان وفنانة وادانا العنف اللي حصل هناك وبيحصل وانا مش مع اراقة الدم في سوريا وتحويلها الى عراق اخرى بعد تدخل امريكا عسكريا ، مصر مقدروش عليها وميقدروش عليها فراحوا على حتة تانية

*كنت من مؤيدي ثورة 30 يونيو ام الا ؟
انا من اوائل الفنانات اللي نزلت ضد مرسي بعد ما خرج المساجين الارهابيين وقطع الكهرباء واحداث الاتحادية وكان معايا بنتي (حبيبة) وشلنا روحنا على كفنا ، واتضرب علينا طلق حي على عربيتي حتى بعد الاحداث وبعتولي رسائل تهديد وعملت محضر في وزارة الداخلية

*كانت ايه تجرتبتك مع الناس في الشارع ؟
اكتشفت حاجات كتيرة وانا على الرصيف فبقيت ضد مرسي وضد البرادعي بعد ما عرفت اتفاقه القذر مع مرسي من تحت الترابيظة والناس اللي بيتأجروا بالسلاح والمخدرات ، انا اتعلمت حاجات كتير زي اني امسح دم بني ادم معرفوش واضمد جراحه

*شاركتي في 25 يناير ؟
في 25 يناير منزلتش كنت من انصار حزب الكنبة لكن في 30 يونيو نزلت ومكنتش نازلة ضد مرسي كشخص انا اصلا مانتخبتهوش لكن ضد المواقف الخيبة اللي كان بيعملها وتصدر عن رئيس مصر

*شايفة حال البلد دلوقتي ازاي ؟
مصر دلوقتي احلى وانضف وهتقوم من تاني فحال البلد بالفعل في تحسن ربنا يكرم السيسي دة ولد ماجبتوش ولادة ،احنا محتاجين واحد زي ده ، زيه زينا ، مصري ، الشعب فوضه فاتحرك ، شوفت الاتحادية ومنظر الناس ، الناس خلاص كانت اتخنقت

*ترشحي السيسي للرئاسة ؟
لا هو في مكانه احسن ما يمسك الرئاسة ، وبقول يارب يرزقنا برئيس زيه او اقوى

*انتخبتي مين في انتخابات الرئاسة الماضية في الجولتين ؟
انا انتخبت حمدين في الجولة الاولى وشفيق في التانية وكويس ان مرسي هو اللي نجح لان شفيق لو كان كسب كان اللي بيحصل دلوقتي كان حصل ساعتها واكتر ، الناس قلتها لمرسي احنا اديناك صوتنا وتتقطع ايدينا لما علمنة على اسمك

*هتنخبي مين في الانتخابات الرئاسية القادمة ؟
مش هنتخب حد من اللي اترشحوا قبل كدة غير لما اكون مقتنعة بيه وممكن شفيق لو ننزل

*لو فرض جدلي : مبارك اترشح هو وجمال وعلاء ومرسي تاني ، تنخبي مين فيهم رئيس لمصر 2014 ؟
مبارك انا بحبه ، ممكن علاء ، لكن جمال سياسي فاشل ومرسي طبعا لأ

*ما جديدك في الفترة القادمة ؟
فيه حاجة بحضرلها بعد العيد ان شاء الله سينما مع اخويا وحبيبي المخرج اللي نورني الليلة احمد شاهين ، وعندي مشروع فيلم من تأليف/ محمد حسانين وهو بطولة جماعية اكشن رومانسي ودوري فيه صحفية تكشف الفساد وخلال الاحداث تقع في قصة حب ، عرضته على كذا مخرج واعجب بيه ، لكني ابحث له عن منتج .

وقد احيى الحفل كلا من الفنانين الصاعدين : محمد عزت وعصام ياسين وشريف سعد وجهاد امين وامجد عفت وعلاء الحسيني ، بالتعاون مع الدي جيه : مارتن وشيكو

حضر الحفل العديد من اقارب واصدقاء رولا : جيجي اسير وياسمين غنيمي ، ونانسي زهني و سحر مكي واميرة الكيلاني وروني سلطان ، ومن اهل الفن : المخرجين : احمد شاهين و اسامة عمر وسامح فارس واميل شوقي ، ومن الممثلين : فادي غالي ونشوى عادل و شيما الحج ، ومصمم الازياء /عبدة امير الذي صمم فستان رولا ، والتي ظهرت به بالحفل وادى الى انها اصيبت بالحسد فبعد انتهاء الحفل اصابتها حالة من الاعياء ، كل عام وانت وحبيبة بخير وصحة وسلامة ؟!