جريدة أحوال مصر
انطلقت منذ الطفولة وكان لديها الحلم لتصبح نجمة وها هي تعلو وتعلو من نجاح الى نجاح حتى تمكنت اخيرا من ايجاد شخصيتها التي عبرت من خلالها عن موهبتها في مسلسلها الاخير في رمضان الماضي هي الفنانة الشابة علياء عساف ، فكان لنا معها هذا الحوار الصحفي :
* بعد نجاح مسلسل (الداعية ) هل تشعرين بانك ملكة ؟
ملكة دي كبيرة شوية ، بس انا لما بقعد على النت بلاقي ماسيدجات بالهبل ،فاكيد المسلسل فرق معايا ،لان الفيس الكل بيقعد عليه من الناس اللي تابعت المسلسل وكله بيتكلم عن دوري وبيشكر فيه اوي لدرجة ان فيه ناس عرضوا عليا الجواز
* كم شخص عرض عليك الزواج ؟
حوالي 6 عرسان
* ما هي البداية الحقيقية لعلياء عساف ؟
مسلسل ( كاريوكا) كان هو البداية بس مكنش فيه ناس كتير اتفرجت عليه ، بس الداعية جه كمل وبالذات ان مساحة الدور فيه اكبر بكتير
* من رشحك للمسلسل ؟
اترشحت للدور عن طريق المخرج / محمد العدل ، كان شافني في كاريوكا فعرض عليا دور حنين اخت هاني سلامة الصغيرة الملتزمة دينيا ، وكفاية انه مع عائلة العدل ،اكيد مكنش ينفع ارفض
* انا اعلم انك عازفة كمان ، والمفترض في المسلسل ان الفنانة/ بسمة هي التي تعلمك العزف ، لكن في الواقع انت من علمها العزف ، فهل كانت متجاوبة معكي ؟
كل الناس هتكرهني لما تعرف اني كنت بعلم بسمة ، بس مكنش فيه وقت لاني قعدت معاها اربع او خمس مرات فدي كانت حاجة مستحيلة انك تبقى عازف كمان في الفترة دي بس الحمد لله على اد ما قدرت علمتها
* كيف تري عرض مسلسل الداعية في رمضان وبهذا الوقت تحديدا بعيدا عن التيارات المتشددة ؟ وهل حقق المطلوب منه ؟
الناس كلها قالت ان المسلسل جه في وقته لانه بيحكي كل حاجة بتحصل من تجار الدين فمثلا كان فيه مشهد في المسلسل بيقول ا/هاني فيه للسكرتارية : قولتلهم لأ ليه ،كله بتمنه ، وزي ماتقال في المسلسل انهم مش حاسين بالناس عايشة ازاي وبيتكلموا في الحرام والحلال وبيحرموا حاجات هما في بيوتهم بيعملوها ـ ففي المسلسل كسر الكمان وفي الاخر راح حب واحدة بتعزف كمان
* ما هو اصعب مشهد لكي في المسلسل ؟
مشهد تكسير الكمان ، ا/هاني كسر فيه سبع او تمن كمانجات
* انت تعملين بمجال التمثيل منذ الصغر اليس كذلك ؟ من من النجوم الحالين كان معك منذ الطفولة ولا يزال في المجال ؟
وانا طفلة ابتديت في الاعلانات وكان ساعتها الاطفال عددهم قليل فكنت متبروزة صح ، كان معايا شيري عادل وهبة مجدي
* اول فيلم سينمائي لكي كان مع الاسطورة احمد زكي هو فيلم نزوة ،احكي لنا عنه ؟
فيلم نزوة عمري ما افتكرته لاني كنت ضغيرة اوي بس حاجة تحسب لي وانا طفلة اني امثل مع العظيم احمد زكي ، لكن انا فاكرة مشاهدي في الكواليس وان بلعب في اوضتي باللعب، لكن مكنتش اعرف قيمة احمد زكي ، انا مضايقة جدا دلوقتي اني مكنتش اعرف مين احمد زكي
* ما هي الاعمال التي شاركت بها بعد ذلك ؟
بعد فترة عملت فيلم (شجيع السيما ) مع الفنان/ احمد ادم ،وبعدها فيلم (بلية ودماغه العالية ) في دور الطفلة ام الشحات وده كان دور مميز مع الفنان/ محمد هنيدي
* لماذا اختفيتي عن الساحة لفترة ، وما هي الاعمال التي شاركت بها بعدما اصبحت انسة ؟
اثناء فترة المراهقة اغلب الناس بتبعد فيها فوقفت شوية وكان بيتعرض عليا ادوار فيها مايوهات وانا كنت برفض ، وبعد كدة رجعت بفيلم (اوقات فراغ) كان دوري اخت كريم قاسم وبعد كدة عملت مسلسل (كاريوكا)
* كيف استطعت تجسيد شخصية تحية كاريوكا وهي صغيرة ، وهل كان سهل عليك هذا ؟
كان فيه حاجة في صفي انها ملهاش فيديوهات وهي صغيرة ، ولان الصغير لما بيكبر شكله وحركاته بتختلف ،ىوانا كان دوري بين 12 و14 سنة ، غير انها ببتعذب ، فمثلته كأنها بنت عادية بتتعذب ، لكن بالذات لما تعمل دور حد معروف بيبقى الموضوع صعب ،والحمد لله عملته كويس
* هل التعذيب كان حقيقيا ، واريد ان اوضح للقراء انك تخافين جدا ؟
*فعلا اتعذبت حقيقي ،كان من المشاهد المهمة في احداث المسلسل وكان لازم اعمله
* هل يمثل شهر رمضان بالنسبة لكي فاتحة خير ؟
من وانا بيبي ، شهر رمضان بعتبره احسن شهر في السنة واكيد وشه حلو عليا
* وانت في سن الشباب لابد وانك تحلمين بلعب ادوار معينة فما هي ؟
اللي يجرب يعمل قصة حياة حد مشهور او شخصية تاريخية هيقع في مقارنة شديدة فانا مش هكرر ده تاني ، لكن لو على الادوار فنفسي اعمل دور سعاد حسني في فيلم (صغيرة على الحب ) بكل مراحله وهي صغيرة وهي كبيرة
*ماذا تقولين لو طلب منك وصف مصر ؟
الحضارة المصرية مفيش زيها في العالم كله ،مهما شفت حضارات ، المصري هيفضل هو هو ، والمرأة المصرية صبورة وعطوفة وحنونة ومصر احلى من اي بلد تانية
يذكر ان علياء هي بنت من عائلة مصرية وليس كما يعتقد البعض انها من الشام فهي في الاصل من الشرقية وتدرس حاسبات ومعلومات ، بالاضافة الى عزف الكمان على ايدي الكثيرين منهم الفنان / احمد فهمي ، وقد شاركت في تجارب اداء برنامج عرب ايدول 2013 ولكنها لم تتمكن من دخول المنافسة
شاركت علياء في الطفولة في افلام : رحلة حب و ديل السمكة ، وفي الكبر : كابتن هيما وحين ميسرة ، وفي الدراما : بطة واخواتها ، وابن النظام ، وحكايات بنات – في دور مي الاخت الشقية لريهام ايمن – ، ونحن ننتظر منها المزيد .
