ابطال فيلم “نظرية عمتي” يعقدون مؤتمرا صحفيا احتفالا بنجاح الفيلم رغم حالة الإرتباك الأمني

بعد مرور اكثر من شهر وتحقيقه المركز الثاني في موسم عيد الفطر المبارك رغم حظر التجوال الذي فرض على البلاد بعد نزوله بايام اقام ابطال فيلم (نظرية عمتي ) مؤتمر صحفي يوم الخميس الماضي ليحتفلوا بنجاح الفيلم في مقر شركة نيو سينشري المنتجة له

حضر المؤتمر : حسن الرداد وحورية فرغلي ولبلبة ، وتاتيانا ومخرج الفيلم/ اكرم فريد واللذان لم يحضرا العرض الخاص للفيلم في وقفة عيد الفطر المبارك لسفرها خارج البلاد ، وقد صرح كل منهم لنا بردود الفعل التي جائتهم عن الفيلم وكانت كالتالي :

في البداية تحدثت لنا تاتيانا قائلة : انا كان لدي فيلمين في موسم العيد الماضي وهما (نظرية عمتي) و (توم وجيمي) و بصراحة الفيلمين حلوين ، فنظرية عمتي ابطاله : حسن الرداد وحورية ، ويعتبر اول بطولة لحسن وحقق نجاح كبير جدا كل الناس كانت منتظرة زحمة عيد الفطر لكي تحقق ايرادات عالية لكن لسوء الحظ حصل حظر تجول ، واهم حاجة تبقى مصر بخير ،

وتعليقا عن ان فكرة الفيلم اتعملت قبل ذلك قالت : فكرة الفيلم فكرة مش جديدة اه التيمة اتعملت قبل كدة ان شاء الله 70 مرة لكن اهم حاجة طريقة تناولها والمواقف الجديدة ،

 وعن دورها في الفيلم ذكرت انا صديقة نور – حسن – والتي يتتخلى عنها في النهاية ويتركها بعد حبه لسارة – حورية – هذا ما اتذكره لاني انا بطلع من الشخصية بنساها ، انا بعيش الشخصية وانا بصورها فقط ،

وتعليقا على العمل مع زوجها المخرج/ اكرم فريد قالت : ده العمل رقم 3 مع زوجي المخرج / اكرم فريد ، وغالبا بتكون اعمال صغيرة لا استطيع القول بانه عمل لي لكن عندما اعمل معه من الجلدة للجلدة سموه عمل عليا

وعن نوعية الادوار التي تفضلها قالت : انا لا اميل الى الكوميديا او غيرها ،انا في توقيت اللي بتعرض عليا بختار منه اللي يناسبني ايا كان

وعن فيلم توم وجيمي قالت : الفيلم اتظلم في الدعاية ومتعملوش عرض خاص بس الحق يتقال هما كانوا منتظرين بعد العيد لكي يكسفوا الدعاية لكن بعد العيد الحظر بقى الساعة 7 م فاكيد محدش هيروح حفلة 10 ص ، وانا باقترح اننا نعمل لجنة للعيد اللي جاي لو هما خايفين على الشركات التي مازالت تنتج مثل :  نيو سينشري والسبكي يبقى زي اتحاد عشان الصناعة متوقفش وخصوصا ان الشركات الصغيرة والمنتجين الجداد وقفوا شغلهم مش عايزين نخسرهم

وعن جديدها قالت : فيلم (القشاش) انا طالعة فيه ضيفة شرف مرات ابن وزير ومن اخراج/ اسماعيل فاروق ومن بطولة : حورية فرغلي وده صدفة اننا نشتغل عملين ورا بعض مع بعض

ثم تحدثنا الى المخرج / اكرم فريد والذي صرح لنا : اول ليلة عرض لم اكن موجودا في مصر كنت انا وزجتي وبنتي في المجر وقعدت هناك اسبوعين ونص وانا كنت حاجز الرحلة دي من فترة فماصدقت ، وفي الفترة الاخيرة مكنش ينفع نعمل عرض خاص انا مكنتش موافق عليه لان ظروف البلد لا تسمح ، ومع اجازة العيد وانا بدرس في معهد سينما فعندي شغل كتير ومش هفضى فمش هعرف اسافر فقلت اخلص موضوع السفر

وعن مدى اختلاف هذا الفيلم عن باقي افلامه قال : اختلاف نظرية عمتي عن باقي افلامي بيبتدي من اول الورق اللي كتبه/ عمر طاهر ، كاتب قصة جميلة وجديدة وفيه ناس قالت انه شبه افلام اتعملت قبل كدة ، ممكن يكون الشبه تعدد شخصيات الفيلم لكن مش القصة ، وحتى حسن كان قدم دور الكوميدي في فيلم (انسة ماما) قبل كدة لكن هنا مقدم الدور بشكل اعمق

وعن كاست العمل ومن اختاره قال : مش انا اللي اخترت حسن وحورية لان الفيلم كان ليه مخرج تاني وانا جيت مكانه وكنت مبسوط بالكاست ده وحتى لو مكنش موجود كنت انا هختارهم لانهم اتنين دمهم خفيف وممثلين كويسين وركز على ممثلين كويسين دي لان الممثل الكويس بيقدر يعمل اي حاجة كوميدي رومانس وتقدر تصدقه وحورية وحسن انا صدقتهم

وعن كواليس العمل قال : اخر يوم تصوير كان الكل يبكي لاننا خلصنا تصوير الفيلم فكانت مأساة

وعن نوعية افلام الكويميدا في ظل ظروف البلد الكئيبة قال : الفيلم الكويس بينجح سواء كوميدي او اكشن فمثلا فيلم (قلب الاسد) يصنف اكشن وناجح فليس شرطا ان احداث البلد كئيبة ان الكوميديا هي اللي تكون مطلوبة وتنجح مع الناس فالفيلم الجيد هو اللي بيثبت نفسه

اما عن الفنانة القديرة لبلبة فقد تحدث بتقائية بحتة وقالت : فيلم (نظرية عمتي) انا طالعة بدور العمة في الفيلم وبدي خبرتي وافكاري للشباب المتعثرين في الحب وهما سمعوا كلامي وحبوا بعض فعلا واتجوزوا

واضافت : بعد ما عملت الفيلم ده لاقيت ناس كتير بتكلمني بنات وولاد بيقولوا احنا عايزين نأخد افكارك عشان نحل مشاكلنا العاطفية وازاي نقدر نتجوز ، قلتلهم يا جماعة انا في الحياة العادية ادي افكاري في اي حاجة لكن في موضوع الجواز اكون انا السبب في انفصالكم

اما عن بطلة الفيلم نجمة مصر الاولى المتربعة على عرش السينما النجمة / حورية فرغلي فقالت لنا : السنة دي كانت مرهقة جدا عملت عدة اعمال الحمد  لله كانت كلها ناجحة ابتديتها طبعا مع ا/ وحيد حامد في مسلسل (بدون ذكر اسماء) وده كان وسام على صدري اني اشتغل مسلسل من تأليفه ويكون ناجح ومشتاف ، وده يرجع لـ ا/ وحيد ده ماركة مسجلة  ومسلسل تقيل وصعب ومتشعب وقصص كتير ،

وعن دورها قالت :كنت بلعب شخصية بنت فقيرة بتتزوج من شخص منغلق  وبتسافر الخليج وتتحول 180 درجة بعد دخوله عالم الدعاة الاسلاميين السفيين وتنتقب والناس صدقتها  

اما عن افلامها في العيد فقالت عنهما : في العيد اول مرة في حياتي اطلع من جلدي واعمل حاجة كوميدي في (نظرية عمتي) لان الكوميديا حاجة مش سهلة ، مش سهل انك تتضحك حد وخصوصا في الظروف اللي احنا فيها دي ، انا شخصيا لم اكن اعرف اني استطيع اضحاك احد ام لا ، لكن عمر طاهر كاتب سيناريو ظريف ولذيذ والتوليفة الجميلة بيني وبين مدام/ لبلبة وا/ حسن حسني وحسن الرداد وا/اكرم فريد كل ده شجعني اني اعمل الفيلم

وعن كواليس الفليم قالت : الكواليس كانت جميلة لدرجة اني اخر يوم تصوير في الفيلم بكيت مكنتش عايزاه يخلص ، اد ايه كانت الكواليس جميلة وضحك طول الوقت ، وبصراحة دي اول مرة يحصل معايا كدة ،

وعن علاقتها بفريق العمل قالت : دايما انت بتعمل العمل من هنا وخلاص وبتبعد عن مدير التصوير والممثلين انما (نظرية عمتي) لغاية النهاردة انا ومدام/ لبلبة انا بعشقها هي الوحيدة في الوسط الفني اللي دخلت بيتها ، الوحيدة اللي دخلت بيتي هي الوحيدة اللي بكلمها كل يوم بعتبرها ام واخت وصديقة ومثل اعلى ، بأخذ رايها في كل حاجة وبحبها جدا كممثلة وكانسانة فنانة هايلة  – وابلغ دليل على ذلك فقد قبلت حورية يد لبلبة عند دخولها مقر الشركة في مشهد حقيقي بدون رياء – ، وحسن صاحبي جدا بنسأل على بعض كل شوية ، واكرم فريد انا في البيت عنده هو ومراته خلاص اصبحنا عائلة واحدة

وعن اصعب شخصية لعبتها في الفيلم قالت : بالنسبة لي كانت سارة نفسها اللي هي الشخصية الاصلية  في الفيلم لكن الشخصية اللي كنت حباها اوي هي بهجة شديدة اللهجة 

وعن ماذا تعلمت من نظريات العة في الفيلم قالت : من النظريات اللي علمتهالي لبلبة في الفيلم نظرية ولع الكشافات وهي يعني تخلي اللي قدامك يأخذ باله منك ، منتوا الرجالة الواحد بيعملكوا شقلباظ وانتوا ولا هنا

اما عن فيلم الثاني (قلب الاسد) فقالت : فيلم قلب الاسد هو تاني تعامل ليا مع (محمد رمضان) بعد فيلم (عبده موتة) والحمد لله الفيلمين عملوا ايرادات عالية جدا ، محمد رمضان فنان شاطر جدا وذكي جدا قدر يكسب نوع من الجمهور اللي هما الاغلبية في بلدنا الفئة الشعبية البسيطة وخلاص بقى محبوب جدا وبقى نجم شباك وانا بالنسبة لي حبيت اعمل معه حاجة تانية فحاولت اغير جلدي برضوا معاه فدوري معاه كنت شريرة جدا مرات زعيم العصابة اللي بيشتغل معه

وعن اي الفيلمين احب لها اجابت : الفيلمين بالنسبة لي معزة واحدة انا تعبت وسهرت في الاتنين والحمد لله ان الاتنين نجحوا

وعن الاشاعات التي اثيرت حول خلافها مع الفنانة/ روبي في مسلسل (بدون ذكر اسماء) قالت :  انا بنفي كل ما قيل عن خلافات بيني وبين روبي لاني مشفتهاش ولا مرة  في المسلسل لانها في قصة وانا في قصة تانية خالص ، هي زميلة عزيزة جدا ولو شفتها هاخذها بالاحضان ، وانا ممثلة مش انا اللي هاقول اسم مين اللي يتكتب الاول دي حاجة بترجع للمخرج

وعن فتى الاحلام المنتظر قالت : مواصفاتي في فتى احلامي يكون ابن ناس وابن حلال ويراعي ربنا فيا بس للاسف مفيش حد بيتقدم من ساعة اشاعة زواجي من الثري العربي

وعن جديدها قالت : جديدي فيلم (القشاش) انتاج/ نيو سينشري واخراج/ اسماعيل فاروق وسيناريو/ محمد اسماعيل مبروك ،بطولة : محمد فراج ودلال عبد العزيز وحسن حسني وصلاح عبد الله ، هو فيلم تقيل وكبير فيه كل حاجة اكشن و دراما وتراجيدي ، ودوري لاول مرة طالعة غازية مش راقصة زي فيلم  (كف القمر) و الفرق كبير هتعرفه لما تشوف الفيلم ان شاء الله

وفي ختام اليوم تحدثنا مطولا مع بطل الفيلم جان مصر القادم النجم / حسن الرداد والذي ذكر : انا ببص على الدور الحلو لا يفرق بالنسبة لي ان اصنف كجان او اي شيء ، انا اريد عمل ادوار حلوة تلقى اعجاب الناس ، فمسلسل ( ادم وجميلة ) مسلسل مختلف وجديد بالنسبة لي حاجة رومانسي ، وانا لم اقدم هذا النوع من قبل حاجة رومانسي طويلة كدة ، ونظرية عمتي حاجة كوميدي لايت شكل تاني فالعملين مختلفين عن بعض وانا لما بلاقي عمل حلو كممثل صعب اني اقدر اسيبه لازم ادخل فيه ، بيبقى عندي حالة من التحدي والرغبة اني اشتغل دور كويس

وعن احب شخصية له في فيلم (نظرية عمتي ) قال : بالنسبة لي احب شخصية هو الامين احمد لكن كل الشخصيات عارف انت لما تقعد تشتغل عليها وتعملها دم ولحم على ايديك  وتفكر فيها وتأخذ منك مجهود ، فبحب كل الشخصيات ،

وعن صعوبة اداء خمس شخصيات قال : كان صعب طبعا تعمل شخصيات كتيرة في وقت واحد وكمان تضحك  فكان فيه صعوبة في مذاكرة الشخصيات ، تلاقي مثلا شخصية في السبعينات وشخصية في الثمانينيات وشخصية في التسعينيات ، انك تقدر تعمل منهم مفردات مختلفة فانت عايز تغير ميبقاش كلهم بيتكلموا بنفس الطريقة فحاولت اعمل لكنات مختلفة وعلى مستوى الصوت ، فكان فيه شغل على التفاصيل الصغيرة الي استطعت اشتغل عليها وافكر عشان يحصل اختلاف بين الشخصيات ودي كانت الصعوبة

وعن غناءه في الفيلم بجانب حورية قال : انا ممكن اعمل اي حاجة في التمثيل ، اي حاجة ، انا مش مطرب ولا بافكر اني اغني انت سامع صوتي عامل ازاي لكن في الفيلم انت بتغني من خلال الشخصية كلنا بنغني في حياتنا ، فالشخصية بيغني اغنية مع حبيبته فمن هنا انا غنيت فهما لما قالوا لي قلت لهم حرام الناس ، لكن لو على  الشخصية مفيش مشاكل

وعن رسالة الفيلم هل لايقاع الرجال في شبكة الزواج ام ماذا ؟ قال : خليهم يتزوجوا – ضاحكا – واكمل : الفيلم بيقول في النهاية ان الانسان ربنا خلق له حاجات كويسة وهو فاكر انها مش حلوة وباصص لحاجات عند ناس تانية وفاكر ان دي الكويسة ، لكن كل واحد ربنا خلقه فيه ميزة معينة ، واللي ان فاكره مش حلو فيك ممكن الناس تحبك عشانه ، لكن تغير من نفسك وطباعك عشان شخص تاني مش هتقدر تستمر ، فانت لو بتحب الهزار وواحدة بتحب الشخص الجد  فهيتغير، الطبع هيغلب ، التغيير ممكن في حاجات سيئة مش في الحاجات الكويسة اللي موجودة فيك ، اغيرها عشان خاطر واحد تاني او بني ادم تاني كل واحد ليه جمال في حاجات معينة ، ممكن انت بتشرب سجاير فحبيبتك ما بتحبش فلما تبطل عشانها فدي حاجة كويسة

وعن مسلسله الساب اوبرا – الممتد لاكتر من 30 حلقة- (ادم وجميلة) قلل : هو مسلسل اجتماعي رومانسي بعمل فيه شخصية ادم من طبقة غنية معتمد على نفسه ومسئول بشكل كبير عن اخواته البنات وعن امه ، بشكل معنوي مش مادي ودي اللي غابت كتير عن واقعنا دلوقتي في ظل ايقاع الحياة والظروف الاقتصادية اللي موجودة عند الناس ، فالشباب اغلبهم بيحب اهله وكل حاجة بس عنده شغله ويادوب يرجع بالليل ينام يتكلم كلمتين معاهم ، مفيش حد دلوقتي بيعقد مع اخته يسمعها يعرف مشاكلها ويحاول يساعدها على حلها ، مع ولاد خلتوه ، مع امه ، مفيش الكلام ده ، فغابت معاني كتير جدا في الحياة بتعاتنا اليومين دول بنحاول نسلط الضوء عليها  في المسلسل من خلال شخصية ادم بالاضافة لقصة حب قوية جدا مع جميلة اللي بتجسدها (يسرا اللوزي ) وبيحصل مشاكل فيها  وفيه حكايات اجتماعية كتير 

وعن جزء المسلسل الثاني قال : الـ 30 حلقة الاولى اذيعوا في رمضان الماضي وانا بصور في الـ 30 حلقة التانين دلوقتي المسلسل اعتبره كله جزء واحد 60 حلقة الاحداث فيه بتتصاعد كلما شاهدت حلقة جديدة  بتلاقي سخونة وتعقيد

وعن تجربته مع كلا من : يسرا اللوزي وحورية فرغلي قال : انا اشتغلت معاها قبل كدة في مسلسل (الجماعة) وهي شخصية متعاونة جدا طيبة وهادية جدا في اللوكيشن مابتعملش مشاكل خالص وحبيت جدا الشغل معاها ،اما حورية فهي ممثلة مجتهدة وهي من اكتر الشخصيات اللي فيه بيني وبينها كيميا عالية جدا ، اتبسط اوي بالشغل مع حورية وحاسس اننا لازم نعمل حاجات كتير مع بعض ، انت عارف من زمان في السينما بيبقى فيه كابيلز – ثنائيات – كتير ظهروا عملوا نجاحات كبيرة مع بعض مثل :  ا/ فؤاد المهندس ومدام/ شويكار

وعن جديده قال : فيه اعمال سينما ودراما معروضة عليا بس لسه لم استقر بعد على حاجة فيهم لكن ان شاء الله قريبا

وعن دخوله قفص الزوجية بعد الفيلم قال : بخصوص الوزاج لسه مستني  حد يتفرج على الفيلم ويطبق النظرية معايا وربنا يسهل يسمع من بوقك ربنا ، اديني مستني

يذكر ان فيلم ( نظرية عمتي ) بطولة : حسن الرداد وحورية فرغلي ولبلبة وحسن حسني وايناس كامل وتاتيانا وسما المصري واحمد الحلواني

 يدور الفيلم حول مذيع مشهور – حسن الرداد – يقع في حبه الكثير من البنات ، ومعدة برنامجه –حورية – يعملان معا منذ سنوات وهي تحبه ولكن من طرف واحد ويقرر المذيع السفر لقناة خليجية ، فتنهار المعدة لعدم بوحها له بحقيقة مشاعرها تجاهه ، وتقرر صديقتها –ايناس – الذهاب بها الى عمتها – لبلبة – المختصة في مجال توقيع الرجال في شباك النساء عبر خطوات عدة يجب تفيذها حتى يتم المراد واثناء تدريبها للمعدة تحكي لهم العمة عن قصص لفتيات على مر السنين نجحت معهم الخطة مع اختلاف ظروف كل زمان من السبعينيات وحتى وقتنا هذا