جريدة أحوال مصر
انطلقت بسرعة الصاروخ مابين الارشاد السياحي ثم العمل كموديل كليبات ثم البطولة السينمائية لفيلم كان الانطلاقة لها ، نعم هي تعلمت الارشاد بلغتين الانجليزية والفرنسية ولكنها ابدعت في الالماني ، عن من نتحدث عن الصباح في عالم البلطجة والجريمة عن الفنانة الشابة / داليا التوني ، والتي كان لنا معها هذا الحوار الصحفي :
* هل هناك علاقة ما بين الارشاد السياحي و الفن ؟
الحضارة الفرعونية بنيت على الفن ، الرقص والضرب على الدف والغناء ، من دراستي للتاريخ عرفت انه كان فيه معابد الكهنة فيها كانوا ستات مش كلهم رجالة وكان فيه فتيات المعبد وكانت هي رئيسة الكهنة كمان وساعات كتير بتكون مرات الوزير الاعلى او مرات الحاكم
* هل الكهنة الستات كان لهن مكانة دينية عند الشعب ؟
اه طبعا ليها احترامها وكل حاجة وفي نفس الوقت دي بالنسبة لهم اللي بتوصلهم ان الاله راضي عنهم لانها اكتر واحدة بتعبده وكانت بتقدمله رقصات معينة واغاني معينة للالهه ، حتى انك تلاحظ ان في كل الرسومات الفرعونية هتلاقي بنات كتير اوي بيغنوا ويحملون الدفوف وبيرقصوا رقصات ، ده كله في اي مقبرة
* جربتي ترقصي فرعوني ؟
لأ مجربتش بس هما لو جم علموني انا هرقص
* قوامك رشيق ممكن تأدي بعض الاستعراضات ؟
اكيد اه انا كنت بلعب جمباز وكنت برقص باليه على خفيف
* عايز اعرف بدايتك مع الفن ؟
بدايتي كنت شغالة مذيعة فترة في تلفزيون الامارات برامج ترفيه خفيفة تقديم اغاني واشتغلت موديل فترة الحمد لله كنت هيرو في شوية حاجات كويسة في كليبات واعلانات
* مين اشهر مطرب اشتغلت معاه كموديل ؟
سامو زين عملت معاه كليبين والحمد لله حصل بنا كاريزما فطلبني تاني
* النقلة من الكليبات الى التمثيل ،كنت مخطط لها ولا اتت بالصدفة ؟
لأ بصراحة هي جت بالصدفة بس كانت صدفة حلوة والتمثيل ده بحبه جدا ساعات لما بشوف نفسي ماببقاش مصدقة ان دي انا
* ما هو اول عمل اشتغلت فيه ؟
انا كنت موديل وجالي فيلم (رامي الاعتصامي ) كان دور صغير 5 مشاهد وفيه منهم مشهد علق مع الناس اللي كنت بقول فيه : مامي انا بايتة برة النهاردة اصلي انا معتصمة
* هذا الفيلم كان الباب الذي فتح لكي يشجع الشباب على الاعتصامات ؟
الفيلم ده كان قبل الثورة تقريبا بسنتين ، بعد ما جت الثورة كنت بضحك على موضوع النت هو اللي جمع الشباب عشان ينزلوا يعملوا ثورة كان مطالبهم حاجات تافهة وبعدين تحولت بعدين لحاجات حقيقية حققت في الاخر ثورة للمجتمع ، فكان الفيلم سابق عصره بس طبعا بطريقة كوميدية
* داليا شخصيا ممكن تعتصم ؟
والله داليا في التحرير من اول يوم لحد قريب ، بايتة في التحرير ، اهلي مكنوش بيشفوني
* نزلتي 30 يونيو ؟
اكيد نزلت ، مفيش حاجة حصلت مانزلتش فيها
* احساسك ايه وكل الملايين بتتفق معاكي في الرأي ؟
اجمل احساس في الدنيا ، انا اول مرة نزلت في الثورة الاولى 25 يناير ، اصلي الثورات عندنا بقت كتيرة اوي ، الله يكون في عون طلبة التاريخ بعد كدة ، فكنت فاكرة اننا هنضرب وهنروح ومحدش هينزل تاني فلقيت اصرار من الشباب فالاصرار ده خلاني انا كمان ثابتة على موقفي مبقتش قلقانة ، وكنت شايفة مصر اللي نفسي فيها ، المحجبة جنب المش محجبة الشيخ جنب ولد بيشرب سيجارة كلنا بنساعد بعض وبنعدي بعض وبنوزع الاكل على بعض وكان في حب رغم الزحمة ومفيش اي مشاكل ولا تحرش ولا اي حاجة ، كان الموضوع حلو اوي
* كان فيه روح حلوة لكن دلوقتي الروح شايفاها ازاي ؟
كان فيه حب وهزار والناس دايبة في بعضها لكن دلوقتي حصلت كراهية غريبة وانقسام في مجتمعنا وحاجات غريبة اوي مكنتش حابة انها تحصل مع مصريين عمر ماكان عندنا مسيحي ومسلم ولا اخواني ومش اخواني كنا منصهرين مع بعض ، حتى انصهارنا مع الدول لكن دلوقتي بقى فيه دول معينة لقيناها بتساعد ارهابيين عندنا فبقينا زعلانين منها ، حصل حاجات كتير اوي مش حباها
* من وجهة نظرك ما هو الحل ؟
المصالحة الوطنية لازم نتصالح مع بعض كلنا ده اللي احنا عايزين نوصله بس لازم برضوا كل واحد يعرف ان خلاص بقى فيه قانون وبقى فيه دولة ومفيش حد هيمشي اللي في دماغه بالبلطجة او بالاسلحة
* من رامي الاعتصامي للالماني كان فيه اعمال ؟
لأ مكنش لسه فيه اعمال ، الحمد لله دور البطولة ده جه على طول – الله اكبر –
* الالماني كانت تجربة شخصية شديدة الخصوصية على كل اللي اشتغل فيه المخرج/ علاء الشريف واوكا وارتيجا وبوسي ، هل كان ذلك في مصلحتك ؟
التجربة دي كانت بالنسب لي مخاطرة ان انا من دور 5 مشاهد ومفهوش تمثيل وبنت استايلش دلوعة ، لدور بنت في حارة بلدي وفتاة ليل ومشاعر جامدة جدا بتحب واحد وهو مابيحبهاش وبيحب واحدة تانية فكنت متخوفة منه
*كيف تم اخيارك لدور (صباح) ؟
المخرج لما اختارني اختارني عشان كان عاوز بنت ملامحها حلوة وفي نفس الوقت تدي على جو البلدي وبتعرف تمثل وتكون جديدة لان الفيلم كله وجوه جديدة ، في الكليبات لما انت بتكون الهيرو او البطل فبتمثل بمعنى اصح لانك بتطلع فيه مشاعر حب ومشاعر كره وبتضايق وبتتخانق مع المطرب كله د بيحصل ، فلما قعد معايا وجدني بعرف امثل وعملنا بروفات قبل اي حد تاني في الفيلم لانه قال لي الدور ده مخوفني ، هو الاساس عندي والحمد لله استقر عليا ، وقعدت شهرين ماتكلمناش وبعدين لاقيته اتصل بيا بيقولي يلا عندك تصوير الاسبوع الجاي
* اصعب حاجة في الشخصية ايه ؟
محمد رمضان ممثل جامد جدا فكان صعب عليا اني اقف قدام ممثل قوي بيمثل بقلب جدا ، ده طبعا خلاني انا خايفة لاني لازم اكون على نفس المستوى لان هو ممكن يأكلوني امام الكاميرا وعايزة اباركله على فيلم (قلب الاسد) ربنا يوفقه هو بني ادم جميل وجدع ، فكانت المشاهد اللي فيها حب بيني وبينه اني انا واحدة بتطلع كل مشاعرها قدام واحد وهو مش حاسس بيها خالص ومستغرب مشاعرها وفي نفس الوقت طول الوقت بيضربها ويبهدلها وبيحكلها على حبيبته التانية ، الحب المستحيل يعني ، انت بلطجي متتنك عليا ليه عشان انا فتاة ليل مانت بلطجي وبتدور على واحدة مؤدبة انت اصلا مش صح عشان تدور على الصح ، وانا الغلط اللي بحبك خليك معايا انا
* بعد الالماني عملت اعمال في التلفزيون ؟
هو عمل واحد مسلسل (الخفافيش) تقريبا كان في نفس توقيت الالماني ، كانت تجربة مختلفة كنت طالعة في عصابة بس المرة دي لم اكن شريرة هي غلبانة لدرجة انها بتوقعهم في الكلام والبوليس بيقبض عليهم بسببي فكانت ساذجة جدا ومهتمة بنفسها فقط لا غير فمش فارقة معايا اي عصابة خالص
* العصفورة قالت لي ان فيه عمل تاريخي ستدخلينه قريبا ؟
هو مسلسل مع المخرج الكبير /عمرو عرفة مشارك في البطولة نجوم سينما كتير قوي وهو عمل ضخم جدا واسمه (الخديوي) عن الخديوي اسماعيل ، انا دوري (جميلة ) هي جارية في احد القصور وبتعمل مشاكل كبيرة جدا بين الهوانم والاميرات ، فتلاقي اميرة بتحب باشا فتروح تخبس عليها ، قاتلة الدنيا كلها
* الشخصيات التي بها شر تحبيها حتى تخرجي طاقاتك الفنية ؟
الشر اللي بيقدمه ، بيكون شاطر شوية لان الطيبة سهل اوي اني اطلع طيبة وغلبانة اتكلم بالراحة وابقى ملاك لكن انا بحب الشر المحبوب ، فصباح في الالماني كانت شريرة بس كل الناس كانت بتحبها جدا وجدعة فمابحش الشر الصرف ، حتى جميلة هي جدعة مع الجواري والخادمات وبتساعدهم لكن مع الاميرات عشان بعاملوها وحش ، فبتعامل كل واحد بطريقته بس هي مش شريرة صرف بس ليها مواقفها
* اما هو اكثر افيه كان حلو لكي في فيلم (الالماني ) ؟
كان مع مروة الازلي اللي قامت بدور (حبيبة) فكنت بقولها : عندكوا شامبو عندكوا دباشيب ، كل الناس كانوا في السينما حبينه قوي
* قبل كدة كنت قلت لي انك تحبين كليوباترا ، ايه اكتر حاجة بتميز شخصيتها ؟
عامة انا نفسي اقدم اعمال تاريخية انا عاشقة التاريخ حتى دراستي دخلتها حبا للتاريخ ، فيه اتنين بالنسب لي كان نفسي اقدم دورهما : حتشبسوت لكن المشكلة المعلومات التاريخية اللي وصلانه عنها كبني ادمة قليلة جدا لكن هي ملكة عظيمة ، و كليوباترا لكن هي وصلتنا قصتها بالتفصيل واللي عاجبني فيها انها ست بتوصل تبقى ملكة لاكبر حضارة في العالم وعارفة مصلحتها جدا وعايزة تغزو العالم بدماغها مش بالجيش ، فقدرت توقع قيصر الروم في حبها وحولت مصر من ولاية الى عاصمة الامبراطورية رغم عدم حبها له ، وعندما احبت انطونيو هزمت في الحرب فانتحرت ، فلديها مشاعر القوة والحب والضعف
* بتعرفي لغة هيروغليفية ؟
اه درسنا منها شوية فمثلا ايب تعني : انا احب
* انت مرشدة سياحية ، ماذا تقولي لسواح العالم الان عن مصر ؟
لكل شعوب العالم مصر اجمل مكان وحضارة هتشوفوها لذلك تعالوا زوروا معالمنا الفرعونية والاهرامات واثارنا اللي مش هتلاقوا في اي حتة تانية ، متصدقوش اللي بيتقال احنا معندناش مشاكل ، واحنا هنكون احسن ان شاء الله
